政Whats噏﹕嶺大同牛有淵源　《嶺南牛》聽過未？

聽日就係牛年，估唔到嶺南大學同牛有好深厚淵源，唔單止學生會會徽有牛嘅圖案，仲有首名為《嶺南牛》嘅歌曲添！

嶺大校長鄭國漢喺鼠年最後一日向學生發信，提及新一年嘅祝願，話有首名為《嶺南牛》嘅歌曲曾經喺廣州嶺南校園廣為流傳。而喺12生肖中，牛象徵力量、勤懇同誠實，正正呼應嶺南精神，鄭深信呢類特質有助克服逆境。鄭又提到香港仍然受傳播速度極快嘅新冠病毒所蹂躪，但大學始終堅定不移咁向學生提供最好嘅學習體驗同支持，同時祝福所有嶺南人喺疫情下平安、健康。

實際上，嶺大喺舊年設立「2020年畢業生支援基金」，至今捐款已達到400萬港元，鄭指基金不但幫助應屆畢業生順利度過疫情帶嚟嘅經濟風暴，同時為佢哋提供輔導同指導，幫助佢哋發展事業。目前為止，已有600幾名畢業生受惠於計劃，有超過85%已經就業，另外有9.5%選擇繼續深造。校方決定將基金延長至明年5月，受惠對象亦會涵蓋其他年份嘅畢業生。

東網網站 : https://on.cc/

東網Facebook專頁 : https://www.facebook.com/onccnews/