請更新您的瀏覽器

您使用的瀏覽器版本較舊,已不再受支援。建議您更新瀏覽器版本,以獲得最佳使用體驗。

【搵食CONY】中秋撐本土手工禮盒!15款創新口味總啱心水

LINE TODAY 發布於 2020年08月20日13:38 • 搵食CONY

中秋仲有個半月先到,但咪話CONY唔提你,如果要送禮的話,而家差唔多時候要訂定。除咗因為唔少品牌設有早鳥優惠,亦有好多手工禮盒限量發售,賣晒就要等下年!貼心嘅CONY除咗有溫馨提示,仲為大家搜羅咗4個本土品牌。佢哋嘅中秋產品均以全人手製作,無添加又足料,仲有多款特色口味,包保送禮得體又有新意!

芫荽月餅引熱話 薑汁紫薯純素之選

近年芫荽抬頭,不少食品只要加入芫荽都立即引起熱話。不過CONY點都冇諗過,今年竟然連月餅都有芫荽味!話說去年「Dion The Eater」引入咗台灣品牌「香菜先生」大受好評,今年更聯乘由蛋撻王子主理嘅「秋夕」推出「香菜月餅」,一推出就引起熱話。與此同時,「秋夕」又推出另外5款創新口味,想搵特色月餅嘅朋友不能錯過!

秋夕月餅禮盒(上)以獅子山及月光為設計主題,而香菜月餅禮盒則以食材最具標誌性嘅草綠色為主調。
香菜月餅$268(8月31日前購買$228)

▲「香菜月餅」嘅餅皮同餡料都加入芫荽製作,因此內外都係自然嘅草綠色。當中餡料更加入「香菜先生」出產的芫荽粉和乾燥芫荽末,再加入新鮮芫荽製作,難怪芫荽味道由內而外散發出嚟,十分濃郁!

另一邊廂,「秋夕」又推出5款不同口味的月餅,包括3款用上不同茶品製成的「尊貴伯爵茶」、「港式奶茶」、「香濃抹茶」,以及兩款全素口味「紫薯薑汁」及「山楂烏梅」,全部都採用好似CONY咁可愛嘅玉兔造型,叫人點捨得食?

港式奶茶月兔$238/4件(左)、尊貴伯爵茶月兔$238/4件(右)

▲伯爵茶月兔採用英國皇室御用嘅伯爵茶為餡料,香氣濃郁,而奶茶月兔就採用錫蘭茶葉,並加入淡奶調配,好似港式奶茶咁口感順滑!

全素月餅六件裝$288

▲內含紫薯薑汁月兔和山楂烏梅月兔各3件,前者有啲似食緊蕃薯糖水,後者就有啲山楂餅嘅味道。雖然月餅無加蛋奶製成,但外皮亦口感香脆,亦唔會感覺單調。

取餅日期:9月1日至9月30日
取貨地址:觀塘興業街4號地下The Wave觀塘限定店
訂購網址:https://hokimshui.store 
備註:限定店有現貨發售,售完即止

創新南棗月餅 承傳中秋之意

「麥籽」係由美女廚神Kit Mak創辦嘅月餅品牌,「麥」係佢嘅姓氏,亦意指豐盛美好嘅食材,而「籽」就代表生命嘅相傳。以往Kit嘅媽媽每年中秋都會造月餅,因此佢對月餅有深厚嘅情意結,亦希望將對月餅嘅情懷承傳下去。

麥籽禮盒為橙色,並以燦爛花卉點綴,充滿喜慶節日感。

今年品牌首次推出「正南棗合桃月餅」,將傳統革新,以南棗糕嘅原材料放進牛油曲奇皮,製作新式月餅。佢嘅工序十分繁複,要先將南棗去核後煮透打成漿,再加入麥芽糖、糖及海鹽煮成蓉,而合桃就要炒香後拍碎,最後再混合南棗蓉,以牛油曲奇皮包裹焗製。

正南棗合桃月餅$238(8月31日前購買$209)

▲一切開就見到入面超足料,翻熱後嘅曲奇皮十分香脆,加埋濃郁香甜嘅南棗味道,以及香脆合桃嘅咬口,充滿層次。

除咗新口味,品牌仲將招牌產品加以改良和升級,例如「十勝紅豆陳皮月餅」選用十五年新會陳皮及北海道十勝紅豆製作;而「老師金沙奶黃月餅」則加重咗鹹蛋黃份量,並師承Kit Mak恩師何齊歡老師嘅食譜。

(左至右)老師金沙奶黃月餅$238(8月31日前購買$209)、十勝紅豆陳皮月餅$228(8月31日前購買$200)

▲奶黃月餅口感唔係超幼滑嗰種,而係食到粒粒鹹蛋黃,因此味道十分香濃。至於紅豆陳皮月餅甜度剛好,因為佢嘅陳皮味好突出,味道香醇唔會澀口,仲中和咗紅豆嘅甜膩。

取餅日期:9月13日至9月27日
取貨地址:旺角MOKO、元朗YOHO及沙田新城市一田超市
訂購網址:http://www.mugiko.hk
備註:可送貨,購買20盒以下,需繳付$85運費,購買20盒以上另議

人氣小店積極研發 大熱伯爵茶風味

一向深得CONY歡心嘅烘焙品牌「Valérie Pastry」,創辦人曾在米芝蓮三星餐廳工作,對產品質素要求甚高,而品牌每逢中秋推出嘅「流心奶黃月餅」及「流心抹茶月餅」都大受歡迎。不過佢哋冇「食老本」,反而每年積極研發新口味,為客人保持新鮮感。

今年繼續有精美嘅「湖畔小兔9件裝禮盒」,不過推出不久就賣晒,想買嘅朋友唯有等品牌加推!

今年佢哋推出咗3款新口味,包括用上近年甜品界大熱嘅伯爵茶製作「法式伯爵茶月餅」,以及揉合懷舊與創新嘅「蛋黃黑芝麻月餅」和「陳皮紅豆蛋黃月餅」,仲以可愛嘅小兔月餅模印製月餅。

法式伯爵茶月餅(左)、蛋黃黑芝麻月餅(右):4個裝$188(9月6日前購買$168)、8個裝$328(9月6日前購買$278)

▲伯爵茶月餅一咬落去,真係好似以為自己飲緊伯爵茶!茶味超濃郁,而且甜度適中。蛋黃黑芝麻月餅內餡以上等黑芝麻磨粉,芝麻芳香撲鼻,加埋鹹香蛋黃,估唔到味道會咁夾!

流心奶黃月餅4個裝$198(9月6日前購買$178)、8個裝$348(9月6日前購買$288)、流心宇治抹茶月餅4個裝$208(9月6日前購買$188)、8個裝$348(9月6日前購買$298)

▲兩款流心月餅係品牌招牌之作,亦係CONY心頭好,奶黃月餅嘅鹹蛋和奶味平衡,抹茶月餅則茶味濃郁而不膩。

訂購日期:即日至9月27日(售完即止)
取貨日期:9月10日至30日
取貨地點:新蒲崗大有街2-4號旺景工業大廈7樓C室Valérie工場、銅鑼灣東角道 24-26號東角2樓Valérie Pop-Up Store
訂購網址:http://www.valeriemooncake.com 
備註:可送貨,購買滿$1,400送貨免運費

香港製造鳳梨酥 「疫」境創就業

位於旺角嘅小店「阿木台灣麵」由一對夫婦主理,由於妻子係台灣人,而佢嘅屋企人都係開食店,佢哋就諗到不如將家人嘅台灣風味在香港承傳。講咁多,相信大家都發現佢哋其實唔係主打烘焙,不過今年中秋就伙拍「烘焙愛麗斯」推出本地製作嘅鳳梨酥。其實由台灣直接引入當地出品成本會更低,但小店希望能藉此創造就業,聘請失業年輕人,係咪值得支持先?

手工鳯梨酥8個裝$158:包裝以簡單紙盒盛載,並附上環保袋。

產品有意義,質素又如何呢?餐廳嚴選台灣金鑽鳳梨製作內餡,甜而不膩,充滿台灣地道風味。而法式酥皮或者因為係在港新鮮製作,因此比一般鳳梨酥嘅外皮香脆鬆化,更帶陣陣牛油香。坦白講,質素真係有驚喜!

取貨日期:8月24日起
取貨地點:旺角廣華街8號阿木台灣麵
訂購網址:https://forms.gle/nnUv4PGotM56GNFE8 
備註:可送貨,運費到付