避談有冇飲酒 楊明露面交代炒車經過

on.cc 東網 更新於 08月08日11:40 • 發布於 08月08日11:40 • on.cc 東網

楊明於今晚播出節目《東張西望》中回應撞車事件,他指:「撞車時撞到個頭,見暈,同埋撞到盆骨,依家冇大礙,喺政府醫院做咗初步腦掃描、X光,骨頭冇事,之後都希望喺私家醫院再做一個詳細(檢查)。」

至於事發經過,楊明則指:「尋晚凌晨點幾鐘左右,我揸車返去我工作室睇劇本嘅時候,喺山頂道嘅彎位,搶一搶軚,跟住就撞埋石躉度,成架車晾起咗,個吓一撞,已經係斷咗片,冇咗記憶,當時點撞、點停已經唔清楚,之後,睇番啲報道,話警察扶住我,話我飲咗酒要人扶,我其實係撞車比較暈啲,唔係太清醒嘅狀態,個一刻做唔到酒精測試。警方係想盡快救我出嚟,因為架車晾起山邊,都有一定危險性,之後送咗我入醫院治療同調查。」

楊明指今次交通意外,撞到政府公物深感抱歉:「撞車時撞到啲欄杆,真係深感抱歉,唔好意思,不過,不幸中之大幸,冇傷到人,我最近比較忙、比較夜瞓,所以駕車時分一分神,搶一搶軚,就出咗意外,唔好意思,呢件事令大家都好擔心,亦有好多輿論講緊,我個人冇事,Thank you!」

主持問楊明,屋企人會否很擔心?他謂:「有,我阿媽想即刻嚟醫院探我,但我唔想佢撲嚟撲去,同佢講冇事,交通意外啫,Liza(莊思明)就嚇死佢啦!」

至於之後會點做?他謂:「交由律師搞,因為我都唔識法律程序,今朝都仲暈吓暈吓,依家先醒番少少,處理緊。」整個對話中楊明未有交代飲酒駕車一事。

東網網站 : https://on.cc/

東網Facebook專頁 : https://www.facebook.com/onccnews/

查看原始文章