近日兔兔好姊妹Jessica舉行生日會，一班LINE FRIENDS約好了當日各自準備一款餸菜到Jessica家中享用。兔兔的拿手小菜是涼瓜炒肉片，於是當日早上兔兔就同熊大一齊去街市買餸準備食材。但兔兔發現，豬肉價格比平日貴近一倍，而苦瓜的售價亦比平日高。
兔兔睇新聞得知非洲豬瘟事件令豬價炒高，但佢就唔明白苦瓜的售價點解都會提高。
兔兔問Boss店長：點解苦瓜要加價？
Boss店長：因為豬價急升囉。
兔兔：苦瓜入面又冇豬肉，豬價急升關苦瓜咩事？
Boss店長：因為我都要買豬肉食。
Boss店長的言論令兔兔摸不著頭腦，於是兔兔就問熊大：點解苦瓜要跟豬肉一齊加價？
熊大：兔兔你有冇留意最近內地公布的居民消費價格指數（CPI）數據？
兔兔：聽新聞講話比市場預期好。
熊大：早前國家統計局公布，8月豬價較去年同期升46.7%，帶動8月CPI按年升2.8%，超出市場預期。本身內地經濟面臨下行壓力，預期GDP增長年底前有機會跌至不足6%水平。加上內地7月生產者物價指數（PPI）出現3年來首次負增長，8月PPI再按年跌0.8%，意味目前內地經濟真係明顯轉差。如果唔係非洲豬瘟事件令豬價急升，相信8月CPI數據未必會好過預期。
兔兔：豬的來貨價急升，令豬的零售價貴了，我可以理解。但點解苦瓜的售價都會變貴了？
熊大：8月豬價較去年同期升46.7%，帶動食品價格上升10%。豬價持續急升會令國家通脹壓力加大，那麼不同的食物變相都有加價的壓力。
兔兔：嗯……我唔係好明白，唔係經濟好先至有通脹咩？點解而家經濟有下行風險，但食物都會因為通脹而加價？
熊大：呢個現象經濟學又稱之為「滯脹」（Stagflation），意味一個國家或地區的經濟增長停濟不前，物價水平反而上升，係一個矛盾的現象。目前PPI出現按年下跌、CPI則按年上升，並預期GDP將持續出現下降。即是經濟增長放慢的同時，預期通脹升溫，是典型的滯脹現象。
熊大續說：為了防止陷入滯脹的風險，國家近日亦推出一系列政策去抵制豬價急升。例如部分城市推出豬肉限購令，當地居民要拎身份證去買豬肉，所買的份量亦有限制；有部分省市啟動價格補貼聯動機制，發布共20億元人民幣的買豬肉錢；最近，中央還投放1萬噸中央儲備豬肉，以保障國慶期間有足夠的豬肉量供應。
兔兔：原來而家啲豬咁矜貴，可謂一豬難求！唔怪得唔見Piggy Brown去Jessica 生日會，可能短期內佢都要避一避風頭。
原來，Piggy Brown因為驚俾人捉去賣，為咗掩人耳目，最近買咗件恐龍衫。結果神不知鬼不覺變了裝，其實Piggy Brown仍是生活在大家當中。
