藝人與警隊聯誼惹公審 歐陽震華:小題大做!

on.cc 東網 更新於 02月18日11:41 • 發布於 02月18日11:41 • on.cc 東網
歐陽震華(右圖)覺得只係小題大造,林國斌(左圖)話只係食餐飯。
歐陽震華(右圖)覺得只係小題大造,林國斌(左圖)話只係食餐飯。
羅鈞滿話只係一餐波後飯。
羅鈞滿話只係一餐波後飯。
莊思明覺得去飯局冇問題。
莊思明覺得去飯局冇問題。

明星足球隊日前與警隊踢友誼波,晚上再舉行晚宴。出席的人有成龍、曾志偉、譚詠麟(阿倫)、方中信、林國斌、歐陽震華、張智霖及羅鈞滿等人,同場還有警務處處長鄧炳強。

短片於網上曝光後引起很大回響,有份出席飯局的藝人都認為只是正常聯誼,覺得個別人士借題發揮。歐陽震華受訪時表示:「本來嗰日佢哋叫我踢波嘅,不過我冇踢,咁咪去食飯囉!冇所謂,都係正常、普通飯局,我有我哋嘅朋友,唔使避忌,小題大做,搵嘢嚟講!」至於羅鈞滿表示:「我相信任何試過做運動嘅朋友,無論踢波、打籃球、排球乜都好,都聽過有一樣嘢叫做『波後飯』,而呢一餐就係咁簡單嘅『波後飯』,你哋有你哋『家常便飯』,人哋有人哋『波後飯』,有咩問題呢?只不過,21世紀20年代,任何人嘅私生活都活在鏡頭下,大家見到同瘋傳嘅都只係其他人嘅私生活,如果私人時間做咩、講咩、同咩人一齊都要被公審嘅話,或許真的太可悲。」林國斌則說:「我只係去明星足球隊度食餐飯啫,係咁多,人哋喜歡講咩就講咩。」

而藝人莊思明亦力撐去飯局冇問題,她覺得每個人都有選擇朋友的自由,不應被剝奪:「大家身邊都應該有好多唔同職業、唔同類別嘅朋友,呢個係基本嘅人身自由,唔明點解食餐飯會發酵到咁大,我嘅立場好簡單,只要唔傷害到別人嘅話,大家都有選擇朋友嘅自由。」與圈中不少藝人相熟的飲食作家朱庭萱(Bonnie)亦有感而發,提出警察是否連食飯都沒有權利:「其實嗰啲批評人哋抗疫其間開心聯誼嘅人,唔通真係要長期愁眉苦臉憂廁紙憂米咩先有幫助咩?屋企屈得多唔病都變病啦,抗疫都要食飯㗎。」

東網網站 : https://on.cc/

東網Facebook專頁 : https://www.facebook.com/onccnews/

查看原始文章