【梁詠琪獨家】幸福肥44歲梁詠琪湊女野餐 半山豪宅示範貼地教育法

東方新地 更新於 08月08日21:28 • 發布於 08月06日08:14

世紀疫症令不少星爸星媽計劃打亂、工作擱置,突如其來的悠長假期惟有乘機做吓湊仔公、煮飯婆,重拾久違的親子時光和家庭樂。不過早在疫情爆發前,梁詠琪已經把生活重心放在西班牙籍丈夫 Sergio和女兒 Sofia身上,電影和音樂工作曝光愈來愈少,倒是女兒成長五年來的片段從來不見她缺席。

昔日歌影兩棲的天后級人馬梁詠琪,日前和丈夫帶著女兒相約友人到草地野餐,從前華麗耀眼前呼後擁,今天素顏便服跪在草地上為女兒擦汗、與師奶朋友打成一片,好勝一面早就成為歷史。

撰文、圖片:東方新地

梁詠琪一家三口野餐晒幸福

梁詠琪11年與相識半年Sergio Crespo Gutes閃婚,婚後第四年迎來女兒Sofia。當年39歲懷胎生女,Gigi已經不下一次表示過希望抓緊時間盡快生多個,不過努力多年未有聲氣,態度亦從開行turbo變成佛系追多胎,一切順其自然。15年產女,產後兩年才復出拍攝電影《骨妹》,打後電影一年接不多於一套、唱歌作品亦是相隔四年才推出只有三首新歌的概念EP《 Preludio 》,演藝事業上放慢腳步幾近收山,倒是在同聲同氣的媽咪群組裡愈來愈活躍,一家三口一齊行山一齊shopping一齊出席Sofia朋友仔生日會,日前又約埋一齊去搭營野餐。

15年產女後工作產量逐漸減少,相隔四年才推出EP《 Preludio 》,Gigi更為新碟宣傳舉行小型網上音樂會。
為人母後放下事業全心投入家庭,Gigi早前在疫情稍為緩和時同老公、囡囡約埋幾家友人一齊去數碼港紮營野餐。已經高到去媽媽胸前、手長腳長嘅Sofia其實只得5歲, 卻 似8歲 小朋友的高度。
同場當然唔少得顧家又為 Gigi專程從巴塞搬到香港工作的Sergio,二人相識半年閃婚,結婚九年女都5歲大依然恩愛黐到實,Gigi呢個依賴又快樂嘅背影證明當年選擇正確。

毫無架子與素人媽咪打成一片

數碼港外的大草地一向是一家大細玩樂放電好選擇,這一天梁詠琪一家亦是其中一分子。目測三、四家人約埋一齊,裝備齊全帶埋簡便帳篷一家一個鄰近搭好,Sofia和小朋友們踩車、放風箏、踢波追逐不亦樂乎,Gigi追著女兒擦汗又餵水飲,爸爸Sergio則是像每個爸爸一樣揹住大機成為大會攝影。烈日當空,5歲Sofia跑跑跳跳、跟每個朋友仔都玩得埋,話咁快汗流浹背面仔紅通通;而Gigi則是素顏上陣、打扮樸素,做好準備落埋場陪女玩,裝束輕便寬鬆以通風為主,哪像在當年做偶像天后時,無論舞台上定舞台下一絲不苟化行妝襯到絕。陪女玩裝束貼地,Gigi言行更加貼地,與普通家長無異,陪玩睇實女兒以外,又同其他媽媽圍埋一堆閒話家常又撩吓初生寶寶,友人湊B餵奶忙不過來,Gigi就貼心整理嬰兒車、又舉起風扇幫友人母女吹風降溫,無分彼此毫無架子。

少女時代已經係當紅偶像一直慣了前呼後擁,做了媽媽後的Gigi放下身段與素人媽咪輩朋友們打成一片,朋友湊BB手忙腳亂,Gigi就幫手整理BB車仔又做人肉風扇架貼心降溫。
5歲的 Sofia(祈淑菲)愈大愈靚女,五官標緻,純港女梁詠琪溝西班牙佬的愛情結晶品,竟然激似大美人關之琳的小時候。
關之琳童年
為免小朋友成為蚊蟲獵物,梁詠琪揀放置帳幕的地方也揀正電動捕蚊器旁,認真夠細心。準備走前,Gigi把食剩的生果小零食、自備飲品逐一收拾,而大件及粗重功夫全交晒畀老公負責。
Sofia亦都有樣學樣,易相處受朋友歡迎外,亦識幫忙收拾物品,自己凳仔車仔自己負責執番。昔日偶像天后嚴控體重悉心打扮,如今的 Gigi素顏便裝玩得盡興最緊要,還有幸福肥發福跡象。
Sergio背囊已經塞滿,兩隻手也滿是沉重野餐物品,Gigi則細心幫女兒抹汗餵水。

分工合作教女有方

玩了接近三粒鐘,Gigi一家似有事先行告退,Gigi開始收拾女兒的用品,草籃、毛巾、水樽,每收一樣,就伸手遞給在旁待命的老公 Sergio,話咁快專責擔擔抬抬的 Sergio背囊和雙手都已經塞滿。爸爸媽媽忙收拾,囡囡 Sofia亦自動自覺主動幫手,自己摺凳自己收好、散落在草地上的車仔又係自己收番。不過始終五歲人仔仲未玩夠,邊收嘢又乘機玩多陣,要Gigi叫完又叫,拖拖拉拉半粒鐘後終於起行。

Sergio一家另有活動要先行告退,小朋友們依依不捨,素顏 Gigi踎低同大家影大合照,之後又為女兒跟朋友仔影相,影完又影,露出幸福雙下巴都冇所謂。
離開空氣清新的公園前,一家三口立即戴番個罩,Gigi兩母女輕鬆離開,老公一人揹起塞滿的背包再手拎兩大袋物品先行去攞車,讓兩母女漫步尾隨,期間Gigi更跟女兒介紹公園不同品種的花。
Gigi上車前見到記者,即教囡囡跟記者講拜拜,十分友善。

17歲已經開始做模特兒幫補家計、其後入行迅速走紅,Gigi日夜顛倒忙足廿年,直到婚後生女,本來家庭事業都在西班牙的 Sergio移居香港,加入雀巢公司任職食品研發專家,後來轉職做西班牙童裝代理生意,做了大半世天后的 Gigi才可以放心退下來一嘗做背後女人的滋味,全心投入教女新事業。對於育兒經,Gigi身體力行陪伴至上,亦在訪問中表示過培養孩子正確學習態度、學懂計劃有始有終最重要,眼見全日 Gigi笑容都掛在臉上、Sergio顧家投入、Sofia好家教又聽話,可見放棄幕前一切都值得。

抗疫日常留家過日辰,意外亦讓 Gigi半山豪宅陳設曝光,月前契爺許冠傑開騷,Gigi帶埋 Sofia一齊睇直播支持,半山無敵靚景的巨型露台亦是Gigi放空、兩母女玩樂的小天地。
芭蕾美少女背後是落地玻璃、巨型露台和維港無敵海景,簡約布藝梳化上放滿Sofia的小玩具、獨角獸,非常溫馨。
一家三口人唔多但都選擇大圓枱做飯桌,招呼親朋戚友同開生日會都冇問題。
母女夾手夾腳畫個人風格新浴簾,可見巨廳闊落空間感十足。
走廊又深好多房門,裝修簡潔有氣質,更大到好似大型時裝店的試身室一樣。
梁詠琪明白陪伴及伴讀之重要性,每日都陪女睇圖書,而女兒亦喜歡黐實媽媽聽故事,既可學習又可增進母女感情。
除了跳芭蕾舞,Gigi不用女兒報課外班學到周身刀,反而一有時間帶Sofia行山去農場,感受大自然並從中學習。
見到攝影鏡頭,Gigi展現笑容又叫Sofia打招呼,教育女兒有禮待人最直接係身教。除此以外愛護小動物領養唐狗、注重環保身體力行,Gigi亦是帶著 Sofia一齊做一齊學。
母女一齊煮食,從入廚讓女兒學懂照顧自己,Gigi亦說過從一齊完成一件事讓Sofia學會計劃、學會有始有終再從中得到成功感。Gigi趁放慢步伐而重拾自己的興趣,近來學國畫和刺繡,每天都在家練習,給女兒一個榜樣重要過一切。
家中常備大量桌上遊戲,在這段留家抗疫的日子大派用場,Gigi指例如玩UNO時可順道訓練囡囡數學,在遊戲中學習。