柏原太賀:兩個天堂(九)

she.com 更新於 2019年11月13日11:31 • 發布於 2019年11月13日10:41 • 柏原太賀

咖啡的香氣在充滿工業風的房間飄逸,婉婷坐在屬於自己學生時代的美術室木椅,靜靜地觀看一絲不苟的耀達。似乎這幾年來,他已變得更懂生活品味。
 
「呢隻咖啡係我一個客送俾我。好濃,但唔駛加糖或奶。細細杯咁飲就夠,否則會醉。」耀達為婉婷送上咖啡說。
 
「咁識享受呀?」
「賺到錢,人自然就有要求,咁先會進步。個人係咁,社會都應該係咁。」
「又係我搞到你變成咁㗎?」
「都係。貧病夫妻百事哀,雖然我哋當年只係同居,唔係結婚。但同妳分開之後,我同自己講唔可以俾自己衰落去。做人,一定要有目標,唔可以得且過。」
 
婉婷微笑卻沒有搭話,細嘗了一小口咖啡後,果然混和香濃及激烈的獨有味道在口腔及喉嚨久久未散。
 
「妳呢?妳同妳老公點呀?」
「我覺得佢同公司果秘書仔有嘢。」
「有冇證據?」
「就係冇。不過,女人嘅直覺話我知佢哋嘅關係唔太尋常。」
「佢經常收工都仲 WhatsApp?定係妳見過佢哋單獨一齊果時有曖昧?」
「兩樣都唔係。不過,佢而家每次返國內都會帶埋個秘書仔。同埋,上次佢哋 annual dinner 果時,兩個人好似眉目傳情。」
「妳覺得佢秘書對妳係威脅?」
「你指邊方面?」
「外型上。」
「後生,靚得嚟少少清純,身材又好。係男人都會鍾意果種。」
 
耀達也飲一口咖啡。這一次,輪到他笑而不語。
 
「你笑咩呀?」
「不如我由結論開始講起,就係我哋冇辦法證明。」
「咁你不如唔好講!」
「所以我頭先咪冇出聲囉。」耀達慢條斯理,待婉婷報了一個懶得說下去的表情後,才續說:「首先,女人一定會提防自己男人身邊嘅其他異性。放唔放心,除咗睇個男人有冇前科之外,重點係對自己嘅信心有幾大。」
「咁佢應該冇前科嘅。」
「所以,好明顯係妳對自己冇信心啦!頭先聽妳形容個秘書果時,我當妳話佢後生同靚係客觀。但男人一定會鍾意呢個形容,太主觀啦!同埋,眉目傳情呢啲咁難捉摸嘅界線,好難作準。妳老公同得妳結婚,唯一可以肯定嘅就係佢鍾意妳呢類型。」
「就算當日結婚果時係。不過,所有男人都貪新忘舊㗎啦!」
「妳只係當男女關係好似經濟學上嘅貨物咁睇的話,應該就冇錯。不過,人同貨嘅最大分別係感情會累積。佢可能都貪新鮮,但如果佢一諗到因為貪一時新鮮而失去一段感情嘅成本,就未免太大啦!」
「或者佢唔覺得我會發現呢?」
「點解女人成日以為男人會蠢到咁?如果真係有偷食,點收都收唔埋。男人可以控制自己,但係另一個女人一定會唔甘心去挑釁或者爭風吃醋,件事就一定穿。」
「所以,佢刪晒所有同個秘書嘅對話紀錄囉。」
「但妳剛剛話佢哋每次返國內都一齊,又真係冇需要傳任何message,係唔係?」
 
婉婷突然無語,她實在無法把事情想得如此簡單直接。或許,這正正是當事人的關係,夾雜了主觀的個人猜測所引致。
 
「你覺得我嘅擔心係多餘?」
「唔一定係。不過,我只可以講妳擔心都冇用。反而唔好因為時間耐咗,就對自己冇晒自信。對好多男人嚟講,妳依然好有吸引力。」
「由你講出口,真係份多有說服力。」婉婷知道那是安慰說話,便打算自嘲。
 
由兩人獨處一室開始,婉婷想不到氣氛竟會如此轉變。起初,她以為藉由一點點回憶,還有公式化的浪漫會產一種令人擔心……不!誠實地是期望的失控。可是,這個令人失望的對象竟然充當起聆聽者的角色,還把理性推到遠遠拋離感性的高度。
 
原本來如此氣氛下,即使一時意亂情迷得宿醉,也應該清醒起來。
 
可是,耀達卻突然又一下子墜落到感性的語言攻勢。
 
「原本過咗咁多年,我嘅後悔已經少咗好多。但係一見番妳,我啲後悔又返晒嚟。」
「講到好似你飛我咁好喎。」
「不過,分手係我一手做成嘅。」
 
婉婷不知如何接下去,畢竟剛剛才像是叫她多信任丈夫的男人,突然又對自己憐惜起來。她甚至對耀達模稜兩可的取態感到氣憤。
 
「唔怪得你。當年,你都任何辦法。」
「但係如果我聽妳講,妳最起碼唔會咁失望,係唔係?」
「你算係自責,定怪我先?」
「當然係怪自己當時唔識諗啦!」
「咁你幾時開始識諗咗?」
「喺知道妳結婚果時,我終於明白自己欠缺咗咩。」
「係咩?」
「膽量同自信。一種願意承擔任何後果嘅我量,同埋要令人無法拒絕嘅自信。」
 
耀達深情地望了婉婷一眼,害她立即避開對方的視線。
 
可是,當她一回神便發現明明剛才兩人還是對坐着,中間被那張殘舊的美術枱阻隔。但不知不覺間,耀達原來已悄然站起來,還走進了婉婷的警戒線範圍內,正眼尷尬地望著耀達腰間的皮帶釦。婉婷緊張得只懂抬頭,呆呆地仰望着耀達。反過來說,耀達輕輕彎身,微笑地向着她。
 
婉婷嘗試從塵封的記憶中找尋相同視角,卻遍尋不獲。婉婷不得不承認,如今的耀達是一個全新的男人,一個充滿魅力的男人。
 
耀達的頭肆無忌憚地移近婉婷的臉,在互相感受到彼此的呼吸時停下來。
 
「你想點呀?」
「妳覺得呢?」
 
嘴唇進一步侵襲過來,在他的上唇尖與她的鼻尖碰出一下極微弱花火,瞬間即逝卻足以挑逗情緒。婉婷閉上眼,享受耀達輕吐出來的絲絲暖意滑過臉頰,懸空在最敏感的耳窩,還有只差毫里便交疊一起的雙唇。
 
婉婷以為時間停止了,因為那心跳加速的激動很漫長,但即使享受也未免太漫長。於是,她悄悄地張開眼,卻發現耀達竟然在那毫釐之間停下,定眼地望着自己。
(待續)
 
 
重溫:
兩個天堂(1 -8)
愛上不存在的妳(全十六集)
靈玲(全八集)
野.火(全十集)
前度暫存迷你倉(全兩集)
如果Double May有特異功能(全十五集)
 
柏原太賀facebook:
https://www.facebook.com/Kashiwabara30
Follow she.com on Facebook & Instagram

查看原始文章