政Whats噏:被浸大解除教學工作 邵家臻將面對紀律聆訊

on.cc 東網 更新於 01月17日11:40 • 發布於 01月17日11:40 • on.cc 東網
邵家臻(中)曾因佔中案而被判入獄。
邵家臻(中)曾因佔中案而被判入獄。

因2014年違法佔領行動(佔中)案而被判入獄8個月嘅社福界議員邵家臻,今日(17日)晏晝收到浸會大學通知,解除佢嘅教學工作,雖然講師身份仍然存在,但大學已經就佢去年4月9日因喺佔中案被判有罪一事成立內部調查委員會,將會進行紀律聆訊。邵家臻認為事出突然,大學咁做係「政治打壓」,又話法院下月將處理佢嘅上訴,質疑大學喺未有上訴結果嘅時候,急於召開聆訊,係有違程序公義。

邵家臻話佢上個禮拜四(9日)發現下學期嘅教學工作被抽起,所以同系主任了解,但對方話唔知情,佢今日晏晝3點先接獲有關信件,即場要求帶埋律師同工會代表應訊,但大學話過往無類似做法,亦無交代聆訊日期。邵由2007年起正式成為浸大全職講師,佢話自己工作表現一直相當理想,亦得到系主任同學生嘅肯定。

邵強調今次被解除教學職務明顯唔係佢個人嘅工作問題,而係「政治清洗、打壓」問題,形容「一日唔將邵家臻趕盡殺絕,一日都唔收手」,亦唔係守住教席,而係守住大學尊嚴、浸大咁多年嚟嘅傳統同校訓,希望大家關注事件。

東網網站 : https://on.cc/

東網Facebook專頁 : https://www.facebook.com/onccnews/

查看原始文章