政Whats噏:市民狙擊催淚煙影響 高永文勞氣回應

on.cc 東網 更新於 2019年11月17日11:33 • 發布於 2019年11月17日11:33 • on.cc 東網
相中可見高永文激動地說話。
相中可見高永文激動地說話。

還記得喺2015年,時任食物及衞生局局長高永文落區宣傳政改方案,與一名反政改長者激辯,更怒吼對方,最後用「講完」二字作結。今日(17日)網上流傳一段短片,離開熱廚房嘅高永文仍然好有火氣,喺街頭被市民狙擊,批評高迴避有關催淚煙嘅問題,高好勞氣話每一件暴力都會對身體做成傷害,仲反問誰先用暴力?

網上流傳嘅短片長約3分鐘,當時高永文身處慈雲山,有多名市民趨前問佢依家香港各區充滿催淚煙,政府應該點樣保障市民嘅健康?當高想回應時,有市民搶發言,高即刻話:「你想自己講,定我講」,跟住該市民就話講完嘞,叫對方答。

高就話警察有佢哋嘅職務,用最低武力保持社會嘅健康,但面對汽油彈、腐蝕性液體,又有人阻住市民返工生活,呢種情況唔可以繼續,又話知道好多青年心裏有一團火,跟住話:「不過,我話畀你聽,我三十年行醫學咗一樣嘢,就算自己認為好啱嘅‧‧‧‧‧‧」,未講完就瞬即被市民打斷。

該市民搶住講,希望以高嘅專業去解答依家喺人民嘅健康善後應點樣處理?唔係講暴力同汽油彈嘅問題,高即刻黑面,好嚴肅咁話「哎呀,如果你講到汽油彈同腐蝕液體對人嘅身體有幾大傷害,依家有啲執法人員喺醫院,佢哋受到二級、三級燒傷,佢哋將來面對好艱苦嘅生活,我做醫生,我就知道」,該市民隨即話高冇答問題,高即刻勞氣回應,嗰啲汽油彈燒到有人危殆呀!」

市民又話高都係冇答佢哋嘅問題,又話佢哋係問催淚彈!高即發火「我知道,我知道。每一樣嘢,每一件暴力事件都會對身體有影響,你有冇問過邊個人用暴力先?」之後,有市民話明白佢嘅立場嘞,冇嘢再問,喺該等市民離開時,高仲話其實我有一句嘢想講㗎!跟住就冇咗畫面,唔知佢嗰句想講乜呢?

東網網站 : https://on.cc/

東網Facebook專頁 : https://www.facebook.com/onccnews/

查看原始文章