政Whats噏:尹兆堅提私人草案處理台灣殺人案 梁君彥話要跟規矩

on.cc 東網 更新於 2019年08月19日14:32 • 發布於 2019年08月19日06:55 • on.cc 東網
尹兆堅提出私人草案,遭梁君彥落閘。
尹兆堅提出私人草案,遭梁君彥落閘。

近期示威衝擊場面不斷,全因政府提出修訂《逃犯條例》惹軒然大波。雖然相關修例工作已壽終正寢,但過去都有立法會議員提出私人條例草案,希望去處理政府所指嘅法律漏洞。立法會議員尹兆堅早喺今年五月着手有關工作,早前提出越級要求,希望直上大會及早首讀,但今日(19日)就畀立法會主席梁君彥正式落閘喇。

《逃犯條例》修訂搞到滿城風雨,呢場風暴早喺今年二月來臨,先喺立法會層面發酵,好似兩次法案委員會無法選出主席、破天荒出現法案委員會鬧雙胎、議會上有肢體衝突等,再逐步發展至政府宣布跪低暫緩修例,到今時今日仍未平息風波。

喺政府宣布暫緩修例前,早有泛民議員提出私人條例草案,希望減少社會憂慮,又可以幫死者沉冤得雪,但議員楊岳橋喺上月獲特首辦通知不准遞交審議,而議員張超雄就惹來重推修例疑慮而認衰,承認錯判形勢而撤回。

至於尹兆堅嘅私人條例草案喺上月尾獲律政司發出證明書,之後佢喺上星期去信梁君彥,話明白要先經事務委員會討論,但因為台灣殺人案疑兇將喺十月出獄,所以想盡早首讀,希望梁君彥安排到喺最近期嘅立法會會議,或者召開特別會議去處理喎。

不過,梁君彥今日就透過秘書處回信決定揸正嚟做,信中指議員法案要依照程序同慣例,提交前應先諮詢事務委員會,之後主席先會徵詢政府意見,考慮埋提出法案嘅議員回應先作出裁決。信中又解釋,面對其他私人條例草案都有要求注意程序同慣例,楊岳橋當時都有諮詢保安事務委員會,所以尹兆堅都要一樣先諮詢咗法案委員會,對其越級要求正式落閘喇!

尹兆堅就批評梁君彥封殺協助討回公道嘅最後機會,證明梁君彥同政府過去係假惺惺,並非真心想死者沉冤得雪,再者時間緊迫,休會期間要先經事務委員會討論並唔合理,希望梁君彥要有同理心。

其實,自從政府跪低後,建制派同政府都好似無再跟進呢件事,而疑犯出獄日子正在倒數,十月刑期屆滿時真係好大機會可以重獲自由。

東網網站 : https://on.cc/

東網Facebook專頁 : https://www.facebook.com/onccnews/

查看原始文章