我唔會再犯同樣嘅錯,我只會犯新嘅

理性足球分析 更新於 2019年11月22日11:07 • 發布於 2019年11月22日11:07 • 理性足球分析
IMG_20191122_190432_128.jpg

摩連奴以熱刺新領隊身份出席第一次記者會講到自己非常謙虛:

「我發現我曾經犯錯,我唔會再犯同樣嘅錯,我只會犯新嘅,但唔會相同。
我而家非常謙卑,謙卑到嘗試檢討過往嘅工作,唔只係上年,而係整個生涯、過程、出現嘅問題以及解決方法,我唔會去怪責任何人。雖然呢個係我第一個唔需要工作嘅夏天,感覺有啲空虛,但呢一段休息時間對我黎講非常正面,我可以深入分析、檢討過往所有事情。
我不嬲都好謙虛,問題只係你地唔會明白。
當我贏唔到比賽時當然會唔開心,我唔能夠改變呢件事,因為呢個係我嘅性格。我希望藉此影響我嘅球員,因為如果你輸波都覺得開心,好難去成為一個贏家。有時你需要同你唔鍾意、唔夾嘅人一齊工作,而我嘅原則唔會輕易改變,而呢個亦係我其中一個原則。
熱刺呢班波班底已經非常好,我唔需要新球員,我對佢地非常滿意,我只需要更多時間去夾。過往對賽時我已經對佢地有一定瞭解,只係未夠多。
我地今季無可能贏到英超冠軍,但我地下季可以。唔係可能,係可以。」
確實熱刺呢班球員大部分正值當打時期,係後防跌Watt跌得比較犀利,但中前場兵源係非常充足。
摩連奴以往最注重就係防守中場位置,個人認為一直得唔到普帥歡心嘅Wanyama有望得到表現機會,始終熱刺陣中只有Wanyama算係純正防中,雖則唔知佢而家狀態如何。如果繼續源用433,另外兩名中場可以用Sissoko同Ndombele形成中場黑三剎,始終摩連奴比較鍾意用工兵型球員,體能WorkRate行先,仲有防中位Eric Dier都似係佢鍾意用嘅類型,而Eriksen相信難以說服到摩連奴。
當大家諗番以往Oscar、Mata等等進攻中場被嫌棄無體能被改造時,唔知Lo Celso、Eriksen甚至Alli會點呢?
不過摩連奴話有檢討以前嘅工作,又講到唔會犯之前既錯,雖然唔知佢講既錯係乜,戰術上嘅錯?定用人上嘅錯?定待人處事,同球員關係嘅錯?亦唔知檢討左啲乜,會唔會有咩特別嘅改變?
而家講乜都係假,聽日對韋斯咸就知道,到時賽後再出片都大家分析下。
訪問原文:BBC
#理性分析 #熱刺 #摩連奴