吓吓都洗錢去主題樂園玩?話你知十大平靚正親子遊好去處!

DailyView 網路溫度計 更新於 2019年11月22日01:15 • 發布於 2019年11月20日00:00
吓吓都洗錢去主題樂園玩?話你知十大平靚正親子遊好去處!
吓吓都洗錢去主題樂園玩?話你知十大平靚正親子遊好去處!

好肉赤呀!次次去主題樂園!

係囉係囉!唔係唔知香港嘅主題樂園入場費有幾貴㗎啦!一張門票都要幾舊水,就算係一家三口嘅小家庭都要一齊去玩都成千蚊以上呀!仲要次次都去你唔悶我都悶啦!唔通…香港真係剩返主題樂園可以喺Family day嘅時候帶小朋友去玩?今日DailyView為咗大家着想,決定搜羅香港十大親子好去處,畀大家認識香港鮮為人知嘅好地方!

DV小教室:網路溫度計透過《KEYPO大數據關鍵引擎》,觀測、爬梳港澳地區近萬個網站、頻道,其中包括新聞頻道、各大討論區、FB、IG以及Blog,從中取得資料樣本數,並以AI語意程式作數據分析。「網路熱度」為主題項目相關的網路posts和comments ,數值愈大代表主題項目的討論度愈高。

親子

10 香港中央圖書館(144筆)

係咪以為圖書館就係一個俾人睇書嘅地方呢?咁你就大錯特錯啦!中央圖書館一直都會為兒童舉辦唔同活動,會利用唔同嘅主題等小朋友學習更多書本以外嘅知識~就好似呢個11月,就搞咗個「童樂牧場」主題。故名思義,呢期嘅活動係俾小朋友認識農場生活。佢哋起嘅名都好有趣㗎!例如叫「親親牛羊」、「牧草雞舍」,小朋友聽到都覺得興奮呀!家長都可以玩埋一份!

image source:官網/香港公共圖書館

9 Why Open Party(152筆)

呢個位於屯門嘅Why open party其實係一個Party room嚟㗎~咁就特別啱晒住屯元天嘅家庭去玩啦!好多爸爸媽媽都會喺到幫小朋友開生日派對,仲會邀請埋啲朋友嚟玩。驚太多人會好逼?呢到可以容納過百人㗎!仲有勁多設施可以使用,例如有個勁大嘅波波池畀小朋友玩。大人分分鐘玩都癲過小朋友呀,因為呢到除咗可以唱k,仲有得督波,仲有街機打𠻹呀!簡直雙贏!

image source:Facebook/Why Open

8 大富翁夢想世界(155筆)

呢個係全球首個以大富翁做主題嘅博物館!喺香港開咗1個月都未有簡直係新鮮滾熱辣嘅景點呀!佢位於太平山山頂廣場3樓,仲要有成差唔多2萬呎咁大!場內超多打卡景點,到到都勁靚㗎,例如係大富翁先生嘅大宅,大富翁市鎮同埋監獄~入面最大賣點就係4dx戲院啦,仲有賣多款主題美食𠻹,成個大富翁擺咗喺嘢飲上面,超可愛呀!離場前記得買埋紀念品呀!

image source:Facebook/MONOPOLY DREAMS

7 BABE HERO(167筆)

呢間位於觀塘柏秀中心嘅親子遊戲室Babe hero係以小朋友做職業角色扮演嚟做主題,小朋友成日都人細鬼大,鬼死咁鐘意扮大人,今次可以畀佢扮飽啦!呢到入面可以試到勁多角色,例如侍應、醫生、消防員等等,佢哋嘅製作十分認真,除咗大量道具之餘仲會有埋制服畀小朋友著,令小朋友盡情投入,冇得頂!除咗職業體驗,佢仲設有「自遊天地區」同「寶貝市集區」畀小朋友玩㗎!

image source:Facebook/BABE HERO 寶貝童盟

6 Donut Village(168筆)

呢間Donut Village開咗喺荃灣嘅愉景新城,一直都好受歡迎㗎!入面有個超矚目嘅大型飛船,成兩層樓高㗎!3-8歲嘅小朋友可以喺呢到玩飛船,繩網同滑梯等設施,而3歲以下嘅家長都唔洗愁冇嘢玩,佢哋仲有提供軟積木區同馬戲團帳篷畀幼兒玩,呢個時候大人就可以喺隔離cafe嘆下啦!為咗預防細菌感染,餐廳內仲要除鞋先入得㗎!係㗎超級貼心呢?而且入場費仲唔貴𠻹!

image source:Facebook/D . PARK 愉景新城

5 Party Queen (216筆)

又係一間好多人推薦搞親子party嘅party room啦!呢間Party Queen係喺荃灣,位置便利,仲可以容納成80位大人,小朋友有得玩波波池、彈床滑梯、玩具車、吹氣城堡等等,一定玩到佢哋個個唔肯走呀!而大人都唔執輸㗎,有麻雀、PS4、飛標、籃球機等,仲有大大小小嘅board game坐陣。呢到仲會提供埋cosplay衫,大人細路都有得簡嚟著,一齊喺呢到喪影騎呢怪家庭照留嚟做留念就最適合不過!

image source:Facebook/ Party Queen 派對天后

4 香港科學館(253筆)

香港嘅科學館由1991年落成,非常之歷史悠久。但過咗咁多年,都仲係會有好多家庭會帶小朋友去玩㗎~,因為佢係政府康樂及文化事務署管理嘅園館,所以收費不貴,其次仲可以等小朋友認識好多可能連大人都未必識嘅科學知識,所以大人細路都可以學到好多嘢!呢到除咗有大型展覽之外,3樓嘅兒童天地更加係畀小朋友放電嘅好地方,因為呢到可以玩成大半日㗎!

image source:Facebook/香港科學館

3 冒險樂園(433筆)

相信唔會有人未聽過美國冒險樂園,唔好以為佢係由美國嚟,其實佢係香港嘅連鎖樂園嚟㗎!由94年成立到目前全港超過30間分店,小編細細個就玩冒險樂園大,入面除咗有廣為人知嘅多款遊戲機之外,宜家原來已經有好多新穎嘅設施畀呢代小朋友玩。就好似大埔富善邨商場嘅冒險樂園咁,除咗有小朋友最愛嘅波波池,仲有彈跳迷宮同車胎滑梯,聽個名都想玩呀!

image source:Facebook/冒險樂園

2 挪亞方舟公園(852筆)

位於馬灣嘅挪亞方舟公園,佔地有成27萬平方尺。入面除咗有勁多設施提供之餘,公園仲設有酒店同度假營,唔洗驚一日未玩完就要走,連假嘅時候就可以入嚟玩番幾日啦!呢個全球首個嘅挪亞方舟係根據聖經以一比一形式打造出嚟,非常震撼!小朋友可以喺園入面玩繩網陣、超高滑梯等等多項遊樂設施,玩到肚餓呢到仲有幾間餐廳可以選擇,簡直係極高水準嘅親子遊景點呀!

image source:Facebook/香港挪亞方舟 Noah's Ark Hong Kong

1 大樹先生的家(1223筆)

呢間大樹先生的家係一間親子餐廳,而且仲要係由台灣開過嚟,喺香港仲要已經有分店啦!好似銅鑼灣新店咁,佢係以運動做主題,有得玩籃球、足球、網球等運動。除此之外,佢哋仲設有繩網同攀爬區,另外仲有個滑板附設喺大型波波池入面。最特別嘅係有個遊戲區會用科技機械做主題,等小朋友喺工作人員陪同下編程控制機械人!宜家小朋友嘅玩具真係非常先進呀!

image source:Facebook/大樹先生的家

分析說明:

本研究資料由《KEYPO大數據關鍵引擎》提供,分析時間範圍為2018年11月20日至2019年11月19日。

網路大數據系統觀測港澳地區上萬個網站頻道,包括新聞頻道、Facebook、Instagram及各大討論區、BLOG等,針對討論『親子好去處』相關文本進行分析,並根據網友就該議題之討論,作為本分析依據。

本文分析之結果,非參考投票、民調、網路問卷等資料,名次僅代表網路討論熱度大小,不代表網友正負評價。

查看原始文章