供股究竟值唔值博?熊大教你睇清背後危機

LINE TODAY 發布於 2019年12月11日05:00 • Anna

兔兔:熊大熊大,N年前我聽班姨媽姑姐講買嗰隻細價股,近年隻股唔聲唔聲跌到變毫子股,最近仲宣布供股。死火喇!我連供股都唔知係咩,而家點算好呀?

熊大:供股,簡單嚟講,就係大家原本一齊夾錢做生意,基於某些原因,間公司需要班股東再夾多啲錢落嚟。而供股一般可分為兩類,一類設有供股權買賣,英文叫rights issues,另一類則不設供股權買賣,英文叫open offers。設有供股權買賣的話,班小股東就可以喺市場上出售供股權。

兔兔:咁供股對隻股票好定唔好?唔供會唔會連本金都蝕埋㗎?

熊大:頭先簡單講過供股的概念,就好似夾錢做生意咁。如果肯夾錢,就要真金白銀拎錢投入間公司度,如果唔想夾,股份比例就自然會被攤薄,令所佔的公司權益比例減少。再講白些,即係明明股價冇跌,但手頭上的股票價值已經減少。

兔兔:如果唔想無啦啦股份比例被人攤薄,係咪就一定要供股?

熊大:如果真係唔想供股,又唔想權益被攤薄,可以選擇直接在股票市場上沽出呢隻股票。不過要留意,通常公布供股消息之後,股價已經大幅下跌。原因係上市公司一般會宣布大折讓的供股,目的係想提高股東供股的意欲。

兔兔:折讓供股?!又係咩嚟㗎?

熊大:頭先咪講到供股會對股份的價值帶嚟攤薄效應。而供股比例同折讓愈大,攤薄效應就會愈高。譬如間公司股價原本係5元,突然宣布以一股供十股的比例,供股價折讓8成,即是1元的話,除權後每股的理論價會由原先5元變到僅得1.36元。

兔兔:嘩,5元變到1.36元?!點計出嚟㗎?

熊大:除權後的理論價,係以除權日前一天的股價乘以供股股數,即係5元乘以1股,然後加上供股價乘以所供股數,即係1元乘以10股,兩者加起嚟就係15元,再除供股比例的總數,即1股加10股係11股。15元除以11股,每股便是1.36元。假設原本有1,000股,供股前股價5元去計,持股價值係5,000元。如果間公司宣布以上述比例和折讓價供股,而妳又不供,股權價值在除權後會變成1,360元,即係少了七成幾!

兔兔:咁如果我按比例供股呢?

熊大:妳就要拎10,000元(1,000股x 10股x 1元)。供完股之後,妳就有11,000股。如果每股維持1.36元的話,持有的股權價值就係14,960元。原本已持有的股權價值係5,000元,加埋供股的10,000元,除權後如果股價冇再改變,妳的股權價值大約為15,000元,同妳拎出嚟的錢相若。

兔兔:其實好似供又死,唔供又死。如果供完之後股價仲跌,咁我咪「GG」!

熊大:係㗎,所以供股又視為利淡股價訊號之一。你仲要諗吓,供一次都話有能力應付,但如果間公司久唔久就宣布供股,咁班股東就真係上咗賊船了!