雖然本地確診數字下降，但對抗疫症大家都不敢鬆懈，加上政府延長限聚令，留家抗疫日子還有一段路要走，即是又要繼續儲糧啦！相信呢段日子除咗有人成為廚神，亦有唔少人成為咗採購高手，好似CONY咁就不時留意懶人或手殘人士必備食品。而無私嘅CONY決定同大家分享新出嘅留家抗疫恩物資訊。想試的朋友勞煩入貨時輕手啲，留番畀CONY呀！
1. 重拾童年回憶
首先登場的當然係久違了的「Viennetta 千層雪糕」。呢款甜品由英國雪糕公司WALL’S 於1989年推出市場，係唔少80、90後嘅童年回憶，不過一度在香港絕跡，近日終於有超市重新引入，掀起搶購熱潮。好彩CONY都成功搶到一盒，係最經典的雲呢嗱口味。
銷售點：惠康、 Market Place by Jasons、7-11便利店
2. 低卡叮叮點心
素食超市Green Common近排積極研發方便食用的急凍產品「OmniEat新善食」，而新推出嘅手工點心包括「新豬肉珍珠餃」及「新豬肉包」，採用純植物製造的 「OmniPork 新豬肉」為主要食材，無論外型同味道都教人難以分辨到底係素食定肉食，但就零膽固醇兼低卡，鍾意食叮叮點心做早餐又或者過口癮嘅朋友值得一試。
銷售點：全線Green Common及網店
3. 拉麵控必試
宅在家中要解決一日三餐，即食麵扮演住一個好重要嘅角色！新引入嘅「Norit Japan比內地雞拉麵系列」，湯包用上被譽為日本三大美味地雞之一的「比內地雞」作基調，製作出擔擔拌麵、鹽味、味噌味及醬油味湯拉麵，並配上幼直麵條。
銷售點：city’super
4. 懶人必備大阪風煎餃
最後係CONY嘅私心推介「大阪王將餃子」。其實呢款唔係新品，不過就陪伴CONY度過咗好多個「思鄉」嘅日子……講嘅係香港人嘅鄉下「日本」呀！大家都知CONY出名手殘，呢款餃子無須加油加水，放入鑊排靚靚，校到中細火冚蓋煮7分鐘就可以輕鬆煎出大阪風味嘅餃子。
銷售點：各大超市
