【頭條獨家】自家低醣飲食法激減29磅 陳倩揚成網絡減肥紅人

星島日報 更新於 06月01日15:10 • 發布於 06月01日15:00
激減29嘅陳倩揚身形真係瘦咗兩個碼。
106磅嘅陳倩揚神采飛揚,絕對唔似有3子女嘅媽咪。
生完細女後,倩揚肥咗好多,𠵱家身形細返兩個碼。
成功瘦身後見返條腰。
倩揚獎勵減肥成功嘅學員Karly影婚紗相。
倩揚分享午餐菜單,有炒雜菜、白灼蝦及昆布豆腐味噌湯,合晒「低醣減肥法」午餐份量指標。
減肥前先認識食物分類概念,按照住餐單要求比例進食就可以。
倩揚一家五口相當溫馨。
蛋餅係倩揚拿手好菜,食得飽又好味。
倩揚自設午餐好豐富。

現年36歲,育有兩子一女嘅前港姐陳倩揚,兩年前生完細女Aurella後身形暴肥到160磅,雖然後來體重回落到135磅,但出鏡仍然唔好睇,所以由去年9月1日開始,決定挑戰「低醣減肥法」,至今回復返做女時106磅嘅苗條身形,還在網上開設減肥團,為唔少肥師奶及肥OL重拾自信。採訪:方騫平 服裝:MZ JJ 場地:怡紅院火鍋料理
陳倩揚自創食得飽,冇壓力減肥方法紅遍網絡,她常以「過來人」身份分享低醣飲食餐單及生活,Facebook專頁已吸納約6萬多粉絲支持,而減肥團都有2萬幾成員加入,喺倩揚同成員互動下,好多媽咪、OL成功減到肥,之前為咗表揚學員Karly減肥成果,特別安排對方影婚紗相。
分階段減肥
倩揚減肥行動分兩個階段,第一階段嘅6至8星期內,每日最少飲2公升水,戒甜及零食,減醣餐單重點避免攝取白飯、白粥、河粉及麵包等「精製澱粉質」,踏入第三星期就可以食「原形澱粉質」如糙米、藜麥、蕃薯、南瓜、粟米、紅菜頭等補充。午餐要攝取足夠蛋白質,肉類可選三文魚、雞扒、牛肉及蝦等。整體食材比例蔬菜佔大約60%、蛋白質40%,因為下午經已食到好飽,晚餐只食烚菜一碟。至於第二階段嘅3餐要縮短到早上10時至晚上6時內完成。
她興奮說:「其實我唔係乜嘢減肥達人,只係屬於團員嘅師姐級,要邊做邊學,我都冇諗過有咩商業上得益,佢哋肯信我經已好開心,經營一段婚姻及家庭唔容易,媽咪健康啲,Fit啲,成個人會更有自信及動力,我老公唔係跟足嚟食都瘦咗成10磅,冇咗個肚腩。」