【頭條獨家】三代同堂 霍震霆沙灘湊孫曬太陽 霍啟剛做外賣仔照顧老嫩

星島日報 更新於 08月06日14:12 • 發布於 08月06日14:00
Kenneth早前化身「外賣仔」到寓所附近的餐廳買Dinner,又陪仔女去沙灘玩,玩完仲幫老人家收拾曬太陽孖寶,絕對係「多功能老公」!
Kenneth幫老竇擔遮和櫈回家,霍震霆行得好輕鬆,孫仔孫女就尾隨爺爺。
穿波鞋長褲的Kenneth高溫下戴住口罩陪子女玩沙。
Kenneth去寓所附近餐廳買外賣畀家人食。
戴住口罩嘅郭媽媽除了陪乖孫砌沙,仲同孫女一齊落水洗「架生」。
爹哋吹雞返屋企,但大仔Lawrence唔願走繼續玩。
Kenneth幫老竇收拾太陽遮,準備離開。
霍震霆摺極都摺唔埋張沙灘椅,最終要兒子出手。
曬到隻手兩截色嘅霍震霆拎住口罩及帽輕鬆行返歸!
郭晶晶希望子女好好讀書,所以成日鼓勵囝囝多閱讀。
郭晶晶年初為霍家添多個B女「中怡」。
Kenneth本來已買定飛帶大仔和次女去行書展,惟書展最終延期舉行。

貴為霍英東集團副總裁的霍啟剛(Kenneth),身兼港協暨奧委會副會長和香港出版總會名譽會長,近日積極為業界爭取政府支援,雖然公事繁忙,但都不及Family day行程咁緊湊!在「封灘令」前的周末,Kenneth於攝氏30幾度高溫下,戴住口罩陪6歲大仔霍中曦(Lawrence)及3歲次女霍中妍(Laurissa)喺淺水灣寓所旁的沙灘玩,同行仲有74歲的父親霍震霆及外母;至傍晚時,貼心的Kenneth化身「外賣仔」到附近的餐廳買定Dinner,再返回沙灘接仔女及幫老人家收拾曬太陽孖寶,即太陽遮同沙灘椅,而白到反光嘅霍震霆就拎住個口罩爽住返歸。採訪:張詠森最近,霍太郭晶晶接受訪問,透露不會讓小朋友繼承衣缽,反而希望仔女好好讀書,所以自幼便培養大仔Lawrence的閱讀習慣,而霍啟剛更早已買定4張書展入場券諗住帶妻兒去掃貨,可惜因第三波疫情在港爆發,貿發局宣佈書展延期舉行。
沙灘亦戴罩
因為第三波疫情嚴峻,專家已作出勸告希望市民盡量留家,不過大人忍到小朋友就難啲。早前傍晚5點幾,剛搬入逾1.6億港幣淺水灣豪宅的Kenneth,就同外母帶住大仔Lawrence及次女Laurissa去寓所附近的海灘玩水,而爸爸霍震霆亦有跟埋去,郭晶晶則未有同行,相信留家湊細女「中怡」。雖然當日攝氏30幾度,烈日當空曬到應一應,但穿白Tee、長褲加波鞋的Kenneth仍全程「罩」不離口,見佢踎喺側邊𥄫住一對寶貝玩沙同玩水,唔怕焗,防疫做足100分,真係抵讚!多功能老公
其間,郭媽媽充當「小助手」幫兩個孫一齊砌城堡,霍震霆就瞓喺自備沙灘椅上享受日光浴,74歲嘅佢白到反晒光,身形算係咁!見差不多夠鐘食晚飯,Kenneth就開始勸仔女執嘢返屋企,郭媽媽亦帶住Laurissa落水洗「架生」,但Lawrence似乎意猶未盡繼續玩,Kenneth亦冇咁好氣,見老竇企起身摺起張櫈準備走,佢都即刻上前幫忙收遮、孭櫈離開,之後Kenneth又化身「外賣仔」到餐廳取回預先Order好的晚餐,「多功能老公」非你莫屬啦!最後要提醒大家,鑒於疫情嚴重,為己為人都係多留家中,就算外出都謹記戴口罩呀!