兔兔鍾意Shopping就係人都知，早排「雙十一」購物節，兔兔就喺X寶、X貓掃了一大堆戰利品。呢兩個網購平台係阿里巴巴集團旗下，兔兔得知阿里巴巴（新上市編號：9988）近日喺香港招股上市，就好有興趣認購，原因係十個女人九個都鍾意Shopping，女人錢咁易賺，網購/電商呢個行業未來應該好有前景。
兔兔：熊大！阿里巴巴嚟香港上市，不如我用孖展入飛抽，話唔定轉眼間可以賺個Double。
熊大：雖然大型新股一般上市後股價波動性唔會好大，事實上，唔係每隻大型新股上市後都一定有錢賺。炒作新股唔係你想像中咁簡單，正所謂「the devil in the details」。
兔兔：嗯？！devil？details？
熊大：係呀，新股股價冇往績表現作參考，分分鐘急升過後就會急跌。投資者沽唔切貨，原本賺錢分分鐘會變成輸錢，少些風險胃納的人都唔啱玩。
兔兔：熊大，其實抽新股有咩地方要注意？
熊大：首先，當然要熟讀招股書，了解公司背景、行業前景，再判斷其定價、市盈率跟同行相比係平抑或係貴，諗清楚先決定入飛抽，唔好盲目跟隨潮流、「見人抽我又抽」的心態。至於你話要孖展入飛抽，就要衡量風險，好多證券行提供的新股孖展可以高達9成借貸，不過就要畀相對的利息同手續費。即使抽孖展抽唔中，都一定要畀利息。
兔兔：新股的孖展超購倍數愈高，係咪意味招股反應好，其上市首日表現都唔會太差？
熊大：其實都唔一定。如果新股招股反應熱烈，公開認購超額超出一定的倍數，就會啟動回撥機制。到時新股貨源要喺國際配售回撥至公開發售，令公開發售佔比有機會高達50%。原先國際配售：公開發售的比例係9:1，就會改變成5:5，令市場的流通量大增，到時莊家要收齊貨、炒高股價的難度就會加大。當然，回撥之後的新股亦有可能照樣炒上，背後涉及到市場供求問題。新股貴一貴都有人接貨，即係個個都睇好其前景而爭住搶高股價，咁樣就會令回撥之後的新股都有機會炒上，情況就好似當年閱文（772.HK），上市頭兩日炒到顛一樣。
兔兔：我成日聽人講「頂頭槌飛」，又話新股有分A、B組機制，究竟咩係「頂頭槌飛」？咩係A、B組？點解A組同B組個中籤率有時差咁遠？
熊大：認購新股，一般會分為A、B兩組，散戶認購一、兩手屬A組（認購總金額少於500萬元）；所謂大戶的機構投資者或散戶以大額孖展認購則屬B組（認購總金額多於500萬元）。本身兩組分配比例係50:50，除非其中一組的認購不足額，否則唔會貿然改變分配比例。而「頂頭槌飛」，係指認購新股的股份數目達到上限，即佔公開發售數目一半。
熊大繼續說：大熱新股的B組認購總股數通常都多過A組（可能因為本地市場流行低息借孖展抽新股），但因為兩個組別分配的總股數一樣，所以會令B組的中籤率低過A組。而一般情況下，A組人數少，意味招股反應唔算熱烈，即係呢隻股份的中籤率會較高。
兔兔：原來抽新股背後有咁多複雜的概念，我一心以為借錢抽就一定會賺大錢。
熊大：兔兔你唔可以咁諗架。抱住賭博的心態去抽新股，股價升就開心啫，但股價一跌你就要蝕價又蝕息。我不嬲都係等手上有閒錢先抽新股，當玩抽獎，好彩的話，唔使孖展都有機會抽中幾手。
結果，兔兔好聽熊大話，冇借孖展抽新股，但佢就動用朋友仔總動員去抽，每人抽幾手，希望人人都可以中獎。
