【搵食CONY】5款在家口痕必備新品 燒味亂入薯片夠過癮

LINE TODAY 發布於 05月26日11:04 • 搵食CONY

雖然限聚令放寬,不過我哋嘅生活習慣都改變不少,好像更加「痴家」,又會在家囤貨儲糧以防萬一。有見及此,CONY一路都有為大家注意市面上有咩新貨新品值得推介,由零食、飲品、冰品,到急凍食品,等CONY為大家報料!

地道風味薯片夠過癮

卡樂B近期不斷推出期間限定的港式風味薯片。今次取材超地道的燒味,推出「叉燒飯味薯片」及「薑蓉切雞飯味薯片」,全由香港工場生產,確保新鮮。叉燒飯味薯片帶點燒烤醬mix蜜糖的味道,而薑蓉切雞飯味薯片的確能吃得出點點薑蓉味,但切雞味CONY就覺得太過輕微。如果你問CONY兩款薯片的味道似唔似叉燒飯和薑蓉切雞飯,CONY梗係會答你自己去試清楚,同朋友玩blind tasting仲更過癮好玩。

銷售點:各大超級市場、便利店及零售店

香脆鰻魚飯?

卡樂B一向積極推陳出新,早前推出的零食產品「米住米條」,仲不斷有創新口味。最新出嘅「鰻重味」,即係日本料理中屬上盛的鰻魚飯「鰻魚加重箱」。當香脆嘅米條配合蒲燒鰻魚醬汁,鹹香微甜,而且帶米香的脆條真係冇得輸,CONY食唔停口呀!

銷售點:各大超級市場、便利店及零售店

升級果香甜馥冰爽

天氣轉熱,雪糕又係時候登場。Häagen-Dazs全新「香甜哈密瓜」及「濃郁芒果雪糕」口味清新,分別嚴選歐洲及地中海的哈密瓜,以及將芒果混合各國多品種的果粒果蓉調配而成的升級配方,食起來果味更重,夏天食就更消暑清新。

哈密瓜的味道濃郁,而且有粒粒果肉。
其實品牌平時都有芒果味雪糕,不過今次係升級配方,芒果雪糕和芒果醬的味道均更濃郁。

銷售點:
迷你杯:7-11便利店、OK便利店、超級市場及日資超市
家庭裝:超級市場及日資超市

隨時隨地飲細滑奶茶

有時宅在家中又想飲奶茶?可以試下新出的「NESTEA皇室奶茶」系列,佢有兩款口味——原味及低糖,並嚴選優質紅茶葉為茶底,再配搭香醇濃滑奶味而成。佢嘅口感比較輕盈細膩,而低糖口味就更能飲得到茶香。

話明係「皇室奶茶」,包裝設計走高雅路線,黃色係原味,而藍色係低糖口味。
話明係「皇室奶茶」,包裝設計走高雅路線,黃色係原味,而藍色係低糖口味。

銷售點:全線各大便利店、超級市場及士多

低脂無防腐素餃

近年素食主義當道,而「灣仔碼頭」近日亦推出「新豬肉純植物肉素水餃」系列,包括「黑椒香菇新豬肉水餃」及「紫甘藍粟米新豬肉水餃」兩款口味,讓素食者多個選擇之餘,採用「新豬肉」製成的素餃亦讓一眾「食肉獸」更容易接受素食。產品更係低脂又冇添加防腐劑,適合各位追求健康嘅人士。

「黑椒香菇新豬肉水餃」的黑胡椒味頗濃烈,而香菇為餃子更添爽口質感。
「紫甘藍粟米新豬肉水餃」的口感層次豐富,爽脆的紫甘藍配上鮮甜的粟米,清新可口。

銷售點:Green Common、百佳、惠康、大昌、華潤、Aeon永旺、Apita、YATA一田及HKTVmall