疫情打撃各行各業，不過香港人最叻應變，隨著疫情緩和，不少餐廳都相繼出手，當中最令CONY心心眼嘅，係唔少高級中菜食府都推出任食點心優惠。近日CONY就去咗其中一間認為係最值得一試嘅餐廳——擁有米芝蓮一星榮譽嘅「都爹利會館」，每位$268（另收加一）就可以任點任食超過30款懷舊點心。
餐廳現逢星期三至五下午6時起推出「懷舊點心夜」，集合多款現時坊間少見的傳統點心和街頭小食，例如蛋散、鵪鶉蛋燒賣、碗仔翅、白糖糕和芝麻卷等，全部都製作花時，需要巧手工藝，但就可以喺度任食任點，每位加$148仲可以有兩小時任飲指定紅白餐酒、烈酒、汽水及啤酒等。
雖然餐廳設計摩登雅致，充滿藝術氣息，但為咗配合「懷舊」主題，餐廳搭咗個點心攤檔，客人可以自行挑選煎物和蒸點，而全部點心都有覆蓋，並有師傅協助提取，確保衛生。至於其他炸物、街頭小食和甜品等就可以劃紙落單，等侍應奉上。
餐廳擁有米芝蓮加持，水準一定有返咁上下，加上餐廳的行政總廚李文龍師傅有14年高級粵菜烹飪經驗，更曾為多間米芝蓮中菜廳如「天龍軒」工作，佢嘅功力相當紮實，即使係感覺最普通嘅蝦餃、燒賣和糯米雞都令人印象深刻，除了手工好，亦因為食材新鮮又夠足料。除此之外，CONY首推叉燒餐包，皮薄得嚟又夠香夠軟熟，加上餡料充足，叉燒粒粒鬆化，而且佢嘅體積唔係好大，唔怕食完會滯。而「鵪鶉蛋燒賣」係CONY最愛嘅懷舊點心，都係必食推介。
食完鹹點梗係要滿足埋「第二個胃」。佢哋嘅甜品亦值得一讚，款式多又有誠意。好似有鬆脆香口嘅蛋散，仲有份量十足嘅港式蛋撻，佢嘅酥皮鬆化，蛋漿夠香且甜度適中。CONY又特別鍾意古法馬拉糕，鬆軟如棉花糖般，並帶有一種獨特甜香。最後當然記得食埋超講究功藝嘅「菲林筒」芝麻卷和白糖糕，才算得上度過咗一個懷舊點心之夜。
總括而言，「懷舊點心之夜」嘅點心選擇其實唔算特別多，但整體水準高，而且價錢相宜，值得一試。如果要挑剔嘅或者係素食點心選擇唔算多，同行朋友有素食者要留意，同埋都爹利會館嘅招牌創新點心在今次主題欠奉，想試嘅朋友都係要畀正價一試。
都爹利會館
地址：中環都爹利街1號上海灘3樓及4樓
電話：2525 9191
