【山城破謬】不存在的「綠蛋島」

運動筆記HK 更新於 08月11日15:55 • 發布於 08月09日08:45 • 山城縱走 hkhiker

山友近日傳來維基百科上一條名為「綠蛋島」的條目,內文如下:「綠蛋島(英語:Green Egg Island),又稱爛排,是香港的一個島嶼,地區行政上屬於西貢區清水灣,位於清水灣郊野公園外海域。」
唔睇由自可、一睇把幾火,簡直荒天下之大謬!翻查典籍,不論係70年代的《長風野外之友遊踪彙刊》、90年代的《香港奇景探勝遊》、00年代的《西貢海嶼美》及《香港海岸洞穴圖鑑》,地圖均標示該處島礁名為「爛排」或「牛仔排」,「綠蛋島」呢個名根本從來無出現過。

《香港奇景探勝遊》梁榮亨著

《香港探勝遊》 梁榮亨著

《西貢海嶼美》祁麟峰著

《香港海岸洞穴圖鑑》李季林著

筆者翻閱幾本書籍,均未有找到「綠蛋島」

關於呢兩個名,有人話主島係「爛排」、副島係「牛仔排」;亦有人認為「爛排」同「牛仔排」都係該處島礁的統稱。麻煩各位打卡人士同 KOL 留意返,「綠蛋島」不過係近年大家去多左影相而老作出來的名而已。你睇開的「香港遠足路線」App不過係人人都改得的地圖黎,絕對唔代表正確地名。
每一個地名都有背後的獨特文化同意義,唔係任由我哋去胡亂纂改。大家改下別名叫佢綠蛋島本身無咩所謂,但如果唔了解埋真實地名,其實又同我地笑人用匪語有咩分別呢?一眾標榜推廣行山文化的專頁同KOL,如果連你地都宣揚錯誤資訊,久而久之其實同幫手抹煞歷史有咩唔同?
大家都話自己很鍾意香港,但真係愛呢個地方的話,就應該追本溯源,虛心學習下先係呀。

山城縱走 hkhiker

▼Facebook:facebook.com/hongkonghiker

▼ IG:instagram.com/hkhiker

查看原始文章