話咁快又就快中秋（9月24日）啦！屋企準備好過節未啊？無論準備咗未，都希望大家留意吓每年中秋過後，都會遺留大堆垃圾，好似月餅同螢光棒等等。
環保團體「綠色力量」每年都會進行《中秋節消費及慶祝習慣》嘅調查，而早前就公布咗去年（2017）嘅調查結果。調查發現無論月餅定螢光棒嘅丟棄數目都有所下降，市民嘅環保意識有所提高，然而丟棄數量仍然頗高，情況仍然嚴重。
調查顯示，去年（2017）螢光棒嘅丟棄數目超過3000萬支，較前一年（2016）少1000萬支。每個家庭平均丟棄46.7支，推算全港家庭共丟棄超過3000萬支螢光棒。
團體表示，螢光棒內含多種有毒化學物，包括螢光劑如溴化乙錠、羅丹明B，螢光棒不能回收或重用，棄置不當更會污染土壤同水源。
而月餅丟棄數目則低過100萬，逾97萬個，創15年新低。受訪者家庭平均丟棄0.38個月餅，推算全港家庭月餅丟棄量超過97萬個，係自2004年開始調查以來，第一次紀錄到低於100萬個。
團體觀察所得，一般盒裝四件月餅，至少有10個包裝組件，有啲品牌更刻意製造比實質需要大嘅月餅盒，以致更多塑膠組件產生，亦有品牌繼續送贈膠刀。
約有6成受訪者偏向唔鍾意獲贈月餅，而月餅嘅丟棄主因係「過期」（43%）同「味道不好」（33%）。團體建議市民應該減少送贈月餅或先了解喜好。
大家盡量環保啲，唔好購買過量月餅導致有「食唔晒」同「過期」嘅問題，送禮前亦可以先了解對方嘅喜好同需求先好送啦！萬一真係有過量嘅月餅，可以轉贈俾有需要人士同慈善機構啦。希望大家過一個環保又開心嘅中秋！
Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）