新舊穿梭劇大對戰！十部熱議劇集你又最鍾意邊部？

新時代五大穿越劇

近排香港嘅穿越劇集，成為咗一時熱門嘅話題，好多男男女女，都分別追緊三地出名嘅穿越劇。點解穿越咁受歡迎？或者可以離開忙碌、平俗嘅現實，去到另一個時空，見識唔同嘅人事物，本身就係一件好吸引嘅事！之所以咁講，係因為穿越劇一直以嚟喺香港都好受歡迎，好多舊劇集都上咗神枱，令人記憶猶新。今日就等DailyView用網路大數劇話你知，新舊各五大廣受網民熱議嘅穿越劇喇！

DV小教室：網路溫度計透過《KEYPO大數據關鍵引擎》，觀測、爬梳港澳地區近萬個網站、頻道，其中包括新聞頻道、各大討論區、FB、IG以及Blog，從中取得資料樣本數，並以AI語意程式作數據分析。「網路熱度」為主題項目相關的網路posts和comments ，數值愈大代表主題項目的討論度愈高。

浪漫穿越，時空旅程

5 夢回（174筆）

2019年，中國大陸企鵝影視、唐人影視聯合出品嘅《夢回》，改編自作家金子嘅同名小說《夢回大清》。《夢回》故事係講一位二十一世紀嘅女仔，穿越到清朝宮廷嘅浪漫故事。喺呢次穿梭中，佢見熱情如火嘅十三阿哥、冷酷有型嘅四阿哥、充滿威嚴嘅康熙皇帝等等，編織咗一場古典浪漫嘅愛情故事，當然都唔少得宮心計嘅可怕。

網民：「清朝、型男，我都最想要嘅穿越！」

4 想見你（1523筆）

臺灣三鳳製作喺2019年，推出咗偶像穿越劇《想見你》，香港J2頻道喺2020年播出。臺灣唔少影評人都力讚，《想見你》喺繼《我們與惡的距離》後，最出色嘅臺灣劇集，故事巧妙咁融合咗愛情、穿越、推理、懸疑、驚悚等多種元素。劇集演員出色，柯佳嬿、許光漢、施柏宇、顏毓麟個個都演得入形入格。鍾意臺灣嘅，就一定要睇喇！

網民：「臺劇近年真係愈嚟愈好睇！」

3 慶餘年（1621筆）

2019年喺中國大陸發行，2020年3月TVB播放嘅穿越劇《慶餘年》，亦都大受歡迎。《慶餘年》嘅故仔相當文青，內容係講一位修讀文學嘅學生，為咗令一位教授收佢做學生，於是用寫小說嘅手法想說服老師。小說嘅故事，就係穿越嘅主體，而入面嘅故事係中國知名作家貓膩嘅作品改編，現代古代嘅衝突，笑中有淚，難怪爆紅中國嘅。

網民：「等緊出第二季，真係好睇。」

2 二月二十九（1717筆）

ViuTv喺2020年，推出咗愛情穿越劇《二月二十九》，成為咗ViuTv近年最受歡迎嘅劇集之一，香港人喺網路熱議嘅話題。《二月二十九》拍攝有如日本風格咁唯美，加埋女神吳海昕主演，配樂製作認真，真係令好多觀眾都耳目一新。穿越嘅愛情，似乎總係特別浪漫，由日本到香港，真係每個人都想試一次！今年咁紅，唔睇隨時無話題。

網民：「睇到我都好想拍拖呀！」

1 金宵大廈（58909筆）

第一名嘅穿越劇，係嚟自TVB嘅《金宵大廈》！呢部穿越劇咁受歡迎，到底有咩特別？皆因呢部劇取材獨特，內容用前世今生做主線，涉及夢、寓言、曼德拉效應、蝴蝶效應同平行時空等議題，真係相當有深度。最重要係識食香港本土，以尖沙咀嘅香檳大廈做主要故事背景，大家睇落特別有味道。TVB已經話要拍續集，真好令人期待！

網民：「希望第二集一樣咁精彩。」

經典五大穿越劇

5 超時空男臣（396筆）

好多穿越劇都係sell美女，但TVB 2017年推出嘅《超時空男臣》，就反其道而行，賣點係一眾古代男臣。故事背景係明朝，三位男臣，分別係蕭正楠演大將軍袁崇煥、曹永廉演大學士左光斗，同埋何廣沛飾太監李進忠，佢哋穿越返現代，呢部虛構喜劇，古代人返現代，有好多好笑劇情。有仔睇，又有得笑，受歡迎都好正常嘅！

網民：「真係每次睇都會笑出聲，正！」

4 回到三國（607筆）

2012年，TVB推出咗一部，睇落認真，實質相當搞笑有趣嘅穿越喜劇，《回到三國》。呢部劇播出果陣，好多人都以為係一部講史實嘅三國穿越劇，但又點知，原來係用三國做背景，但內容相當無厘頭嘅故事。馬國明、林峯做主角，兩位都演得相當出色，咁就正正令呢部刻睇落正經，但內容有趣更具反差，成就咁特別嘅三國穿越。

網民：「呢部係我睇過最好笑嘅三國劇。」

3 九五至尊（853筆）

《九五至尊》，2003年TVB出品，雖然事隔咁多年，但呢部劇依然令人念念不忘。男主角江華，演技出眾，可惜已經無拍劇好耐，呢部劇就成為好多人懷念佢其中一部作品。《九五至尊》講江華演嘅雍正皇帝，遇到張可頤演嘅呂四娘，結果兩位出事穿越到現代，引發好多笑彈。江華仲喺現代慢慢上位，做埋打工皇帝，認真精彩。

網民：「好掛住江華嘅霸氣演出！」

2 情逆三世緣（2225筆）

2013年，TVB推出嘅穿越劇《情逆三世緣》，相當令人驚喜。《情逆三世緣》單係主演，歐陽震華、關詠荷兩大勁人，已經唔簡單。加上呢次嘅故事，係一共穿越咗兩次！首先佢哋嘅時空係現代，然後穿越到包青天嘅古代，後嚟又去埋五十年代嘅香港。為咗愛情，三世因緣，人世間嘅浪漫，真係莫過於此，難怪咁多人都仲記得。

網民：「無情若是長久時⋯⋯」

1 尋秦記（4425筆）

講起穿越劇，香港TVB嘅《尋秦記》，話佢係第一名，真係當之無愧。改編文學大家黃易嘅小說，由古天樂型男演出項少龍，因為一次實驗失敗，將佢送返去戰國時代。項少龍展開咗佢英勇、浪漫，而又相當有趣嘅穿越故事，唔單止溝咗無數古代美女，仲遇上嬴政，立下咗千古偉業。《尋秦記》到今日都有人講，真係集體回憶嚟。

網民：「佢話自己第二，無人話係第一」

【香港網路溫度計調查結果之圖文，未經授權請勿轉載、改寫】

分析說明：

本研究資料由《KEYPO大數據關鍵引擎》提供，分析時間範圍為2019年03月16日至2020年03月15日。

網路大數據系統觀測港澳地區上萬個網站頻道，包括新聞頻道、Facebook、Instagram及各大討論區、BLOG等，針對討論『熱門穿越劇』相關文本進行分析，並根據網友就該議題之討論，作為本分析依據。

本文分析之結果，非參考投票、民調、網路問卷等資料，名次僅代表網路討論熱度大小，不代表網友正負評價。