前日（星期三）嘅《嫁到這世界邊端2》就講到住喺九龍半島嘅一個女仔Belle，嫁到法羅群島！
法羅群島係丹麥嘅海外自治領地，位於挪威同冰島之間嘅隱世小島。 佢哋冬季氣候唔算太嚴寒，平均溫度約攝氏3～4度；夏季氣候偏涼，平均溫度約攝氏9.5～10.5度。
由於地理位置問題，法羅群島長期大風，Belle仲話大風到似10號風球、又會經常落大雨。每年平均260個降雨日，其他時間多數係陰天，甚少見到萬里無雲嘅晴天。
即使陰天日數較多，但風景依舊美麗，仲多咗份憂鬱咁，特別有mood！
夜晚見到滿天星星，咩煩惱都冇晒！仲有機會見到極光添！
喺法羅群島首都嘅酒店（hotel foroyar)入面，可以一覽首都托爾斯港、諾爾島同北大西洋嘅景色，非常愜意！
法羅群島嘅貨幣係咁嘅樣～
因為當地交通唔方便，搭直升機分分鐘多過搭車。Belle仲話：「喺法羅群島搭直升機平過喺香港搭的士，215蚊丹麥克朗一個人，即係300蚊港幣左右。呢度咁平，係因為法羅群島政府有資助到直昇機，因為有啲島好遍遠，車係到唔到，一係搭船，另一種就係搭直昇機。」
法羅群島人妻Belle就推介2個靚景旅遊地方：
1.Sørvágsvatn (海上湖)
海上湖係法羅群島最大嘅湖泊，佢最大特色就係佢身處喺懸崖邊，懸崖有 100 米高，所以睇上去好似比大海高好多！而海上湖嘅盡頭係Bøsdalafossur waterfall(農田谷瀑布)同Trælanípa(奴隸崖)。
2.Saksun（斯特萊默島）
Saksun（斯特萊默島）被譽為法羅群島最靚嘅地方。呢度有條小村落只有8個人居住，兩邊有延綿不斷嘅群山，群山之間係一個潟湖。Saksun只有寥寥可數嘅屋，零星嘅茅草屋頂黑色小木屋，以及簡單樸素嘅白色小教堂，畀人一種遠離塵囂嘅寧靜。潮退時，沿著潟湖旁嘅小路走到群山盡頭會見到一個黑沙灘。仲有Tjørnuvík，喺呢度有個小小沙灘，可以遠望出名嘅巨人同巫婆石。
如果可以喺呢個咁寧靜、風景又優美嘅地方居住，得閒就行下山，真係人生一大樂事！
Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）