吳卓羲最令人津津樂道當然是三年供完一層樓，視買磚頭為興趣，而且興趣廣泛，仲愛買名錶買名車。開講有話玩物喪志，不過有錢就買乜都得，好似古仔古天樂咁，早於十幾年前已經有米到斥資買過萬呎工廈做玩具倉，吳卓羲亦有樣學樣，19年在北京開了全國第一間figure博物館，齊齊做玩具大王。
撰文：東方新地 ｜圖片：吳卓羲微博、東方新地
吳卓羲除了當買樓及收藏電影模型玩具為興趣外，原來仲有鋪買車買錶癮，在伍詠薇、林盛斌主持的《Tiger’s Talk》上被嘉賓之一的陳山聰爆料，指吳卓羲在十多年前還算是新人時，拍攝古裝劇《大唐雙龍傳》時已戴勞力士開工：「呢條友，嗰時佢已經戴Rolex Daytona、白面嘅，嗰時我戴膠錶咋，佢嗰隻錶依家升值到三十幾萬啦。」
吳卓羲獨愛勞力士
吳卓羲當場被主持伍詠薇笑穿上古裝武劍都戴勞力士，好威水，吳卓羲解釋：「嗰時冇咁貴，好平，幾萬左右﹗」他承認喜愛買錶而且獨愛「勞」，原來因為一個原因：「嗰時睇日劇見木村拓哉戴住369，呢個係每個男仔嘅夢想囉，會諗戴咗就變成木村咁﹗」又指自己約有四十隻名錶，而且獨愛勞力士。
吳卓羲擁7輛車
講完名錶到名車，阿Bob問嘉賓們有幾多架車，大家都指住吳卓羲指佢是愛車之一，在逼供下，吳卓羲答：「七架﹗」伍詠薇笑問：「有七架車？你可唔可租一間畀我住？」吳卓羲解釋因為當中有限量版的車，有錢都買唔到而且會升值，又指甚少會見到他在街上，因為出入開車，大部分時間在車上，而且熱愛遊車河，伍姑娘笑他：「佢冇腳㗎﹗」阿Bob笑佢：「人哋去放狗，你去放車﹗」
新玩具大王古天樂 耗資千萬創建私人玩具王國
男仔玩具可大可小，睇古天樂就知，一直是超級科幻電影迷，家住億萬豪宅的他，以收藏電影模型玩具為樂，更耗資千萬元在火炭創建他的私人玩具王國，收藏天價玩具得閒自娛，好誇張。
古天樂除了是香港近年的娛樂大亨，仲係新的玩具大王，十年前他已擁有過萬呎的玩具倉，不過從未作公開展覽，一直只 選擇性招呼自己友「入宮」 欣賞他的珍藏品，裡面珍藏無數件絕版1:1恍如真人的模型之外，更是主人家平時「閉關」的秘密私人地帶，絕對讓人歎為觀止。
吳卓羲撲水買玩具 去北京開博物館
早年為古仔伴舞而識於微時的吳卓羲亦有樣學樣，19初，在北京開了全國第一間figure博物館，名為《吳卓羲個人雕像模玩博物館》，展出了他收藏的超級英雄figure，包括Marvel、DC都有，非常豐富。
因〈今期流行〉MV結緣 與古仔玩味相投
知情者說：「古仔同阿Ron（吳卓羲）識咗好多年，當年古仔唱〈今期流行〉，阿Ron 就係其中一個dancer，以前佢哋一見面會傾車傾玩具，大家有同樣嘅興趣自然投契，之後古仔紅到發紫，收藏嘅玩具同模型全部都係天價，阿Ron嗰時仲未上位得個恨字，到近年總算喺大陸有市場，返香港又有戲拍，搵到錢就喺北京開博物館滿足吓自己，雖然有國內單位同佢合作，不過都要負責部分費用，再加上阿Ron仲不停搜購新玩物，真係搵少啲都唔掂。」據知博物館開業一年來，人流愈來愈少，而開支每月都實報實銷，要keep住呢個玩具夢真係要用錢去維持，難怪吳卓羲要努力搵錢供養佢啲珍藏啦！