由田總主辦的「季前田徑測試賽暨接力嘉年華2025」，一連兩天假將軍澳運動場順利完成，賽事接受所有 2009 年或以前出生之田總註冊運動員參與。當中 10000 米賽事，男子組由剛病癒的「葉Sir」 葉雅傑跑出 32:12.59 力克紀嘉文、鄭文皓等好手勇奪冠軍；女子姐方面，姚潔貞跑出 36:13.42 擊敗屈旨盈及侯嘉欣封后。
在賽事中同樣參加了 1500 米並以 4:17.78 奪冠的葉雅傑，賽後在社交平台透露，港珠澳半馬跟石門 10K 後連續三星期比賽，比賽前數天開始喉嚨痛：「星期六賽，星期三四直頭失聲星期五睇醫生，原本星期六要跑 1500m 同 5000m，星期日就跑10000m，星期五糾結咗好耐決定跑完 1500 再睇下之後點，1500m 成個比賽過程我都好集中去跑，結果跑得又唔算太差，但不幸地過終點後不慎跌倒，跑完決定放棄 5000m 跟10000m 賽事；回家發現只不過是皮外傷，結果第二天都係選擇去比賽，集中嘅力量戰勝病魔，完賽時間 32 分 12 秒，已經喺呢五年最快嘅時間，最尾1000m 仲跑到 2 分 58 秒！」他表示，完成季前田徑測試賽後目標將聚焦 2 月渣打馬拉松的 10K 賽事。
圖 / ig@ipngakit
女子組賽方面，賽前大熱姚潔貞跑出 36:13.42 擊敗屈旨盈及侯嘉欣等對手，她表示接近 9 年未著過釘鞋比賽，一嚟就跑一萬米，係有啲玩命：「其實對上最後一次同最長距離果次係喺日本跑 5000米。自從改例只可以著超簿底鞋跑 track race 之後都冇再掂過 track race。」
圖 / HKAAA
她透露賽前幾日試釘鞋，靠隊友提醒先知著錯款，同邊款型號適合：「可惜我成屋搵哂都冇呢個型號，唔係唔想早啲試嘅，不過上量後足弓近踭位一直有啲隱痛，又唔想影響練習同路賽。最後靠隊友借出釘鞋，細半號，家豪仲叫我索性棄賽，佢都傻嘅總要一試，訓練 mode 照去，大不了咪上岸！講係咁講，最壞情況已經諗過，包括生水泡、足底筋膜痛、拇指外翻位痛、頂趾瘀甲，係冇諗過會 pk… x2！最舒服只係頭兩圈，2k feel 到腳趾要撐爆對鞋，3k 開始痺，7k 腳弓有感，之後直路逆風諗住低頭前傾就pk，兩次都係呢個原因，之後就一直抬頭做人，心諗會唔會仲慢過機場十公里，但最緊要係完成。」
此文章由「香港運動筆記」最初發表於 https://reurl.cc/O5eOGD