楊樂文新劇靠尷尬搞笑　廖子妤任「喊擔當」無難度

由廖子妤、楊樂文、陳健朗、李敏等主演的ViuTV原創劇《十七年命運週期》由下星期一晚（9月23日）起播出。劇集講述眾人再次面對人生好運與厄運的週期交替時的抉擇，關於成長和療癒自身的故事。

廖子妤（Fish）被導演羅嘉駿（Steve）選為今次劇集的「喊擔當」，她笑言自己就是一個喊包，今次真是「搵啱人」。Fish十分喜歡今次所飾演的角色：「因為佢有好多童年創傷，原生家庭對佢嘅影響好深。佢有一個咁嘅背景令到我更加容易投入同清楚點解佢會有咁嘅性格。可能佢望落去好似無咩情緒，但其實佢係好壓抑。」

楊樂文（Lokman@MIRROR）表示，今次在劇中需要自製舞台開棟篤笑，但角色完全無搞笑天份：「好笑嘅位係我個人夠尷尬所以好笑。好彩現實中自己跳舞追夢嘅過程就幸運過角色少少。」他指這次合作班底都十分風趣，無聊時大家更會用不同方法去演繹已拍攝的戲份，過足戲癮。