港男3星期欲棄養貓 逼女友付錢購買！網民：兩母子都好自私

貓貓可愛的神情總是令人神魂顛倒，令人不禁成為貓奴。近日就有港男嘅媽咪因貪得意購入一隻名種貓，但因種種問題打算棄養，男方見女友同佢媽咪感情好，就要求女友俾錢買貓。最後女方拒絕，男友竟因此而要分手，令女友大感心寒。不少網民紛紛支持女友分手，仲話有呢種人做男朋友應該「早飛早著」！

男方媽咪衝動買貓 3星期萌棄養貓念頭

女方日前在討論區發文，指男友媽咪有次經過寵物店，好鍾意隻貓B所以衝動買下。但由於老人家的情緒和身體都不太好，又知道女方有養貓經驗，便提議她先行幫忙照顧貓B。可是，當貓B回到男方家中後，他媽咪便指貓貓太嘈，會打擾其休息便想棄養，問事主會否接收。

男友要求女友買貓被拒 直斥女方「想拎著數」

不過，男方的提議是有附帶條件，就係買返隻「緬因貓」俾佢（因為佢自己鐘意），或者比返錢佢呀媽，又指本身女友也想買貓，「幫人買不如幫佢買」，這樣大家也win win，男友亦不用她full pay，還會有折扣優惠。女友聽後直言「火都嚟」，怒斥「佢當隻貓係玩具玩完唔要搵我執都算，仲講到唔洗full pay返佢都有我著數。」

女友一口拒絕這場交易，她可以領養但就不會付錢，反被男友指她性格有問題，「趁佢呀媽唔想要就想free攞隻貓」、仲話「人地冇錢養仔要賣仔，唔通我見人地有需要賣就唔洗比錢」女友聽完都大感不惑。質疑如果真的付錢買貓咪，那日後她是否要原價接收所有男友不要的東西？又感嘆「男女之間物質嘅win win 把尺究竟係邊？」事後兩人吵架收場，男友因被拒絕而封鎖她，更直言「以後唔好搵佢」。

除了貓咪 仲有租屋事件睇清男友人格

女方事後補充：曾因租樓一事跟男友起爭執。內文指男友媽咪曾因疫情有物業半年未有成功出租，因此男友建議她租來住，方便照顧貓B，而且「反正都係租，租佢屋企仲平啲，大家都win win」。事後女方以租約和傢俬問題而拒絕，當時已被男方指「太貪心」、「唔肯win win」、「租樓啲錢比人都唔比佢」。租屋一事加上今次的貓咪事件，女方坦言終看清對方的真面目。

網民鼓勵分手 「半年睇清一個人係好事」

帖文一出即引起網民熱烈討論，大部分網民支持女方決定，更鼓勵她分手，「只係用半年睇清楚一個人，趁早走咪好事」；直指兩母子都有問題，「個男人裙腳仔嚟㗎」、「兩母子都搵你笨」、「他口中所講的win win永遠只係諗自己」。也有人指出最無辜的是貓貓，希望女方可以拯救貓貓，「最緊要隻貓一定要跟返你」。
Follow she.com on Facebook & Instagram