歐陽震華《聲生不息》灑淚談回歸　想搣甩英文名Bobby︰要中文名就夠

由內地芒果TV同無綫聯手製作的歌唱節目《聲生不息》先後邀請中、港兩地不同歌手演出，引起不少話題，適逢7月1日是香港回歸25周年，節目就以「港樂與我共此時」做主題，請來歐陽震華（Bobby）拍片分享回歸感受，當中Bobby坦言想搣甩「Bobby」呢個名。

訪問入面，Boddy突然表示想搣甩「Bobby」個名：「因為我年紀大，不想要一個小孩名字。另外，我要一個中文名字就夠。叫我華哥華仔，過兩年叫華叔都可以。」又話自己係節目的忠實觀眾，最鍾意周筆暢、安崎及李健老師，老婆就鍾意炎明熹。Bobby又言自己拍過好多劇集，但已經不想再做警察︰「香港應該要拍下呢啲，唔好成日叫我做警察，人哋睇落會問呢個警察未退休咩？演過政府好多部門職員，就連律師都演過很多次。」

之後Boddy又分享香港回歸的感受，見到解放軍車隊駛入香港時：「我哋呢個仔出去流浪咁多年，爸爸媽媽終於嚟接我返屋企。最重要係我有真正身份，你問我咩人，我係中國，來自中國香港。無變嘅地方？我呢度（指住心口）冇變。」