李克勤的「弦續李克勤・港樂演唱會」昨晚（20日）在紅館舉行最後一場，請來劉德華擔任嘉賓，兩人合唱《如果有一天》及《我恨我痴心》，氣氛熱烈非常！
克勤每晚也會選唱一首其他歌手的作品，他昨晚表示：「今晚我揀的歌，呢個人點形容佢？我問過佢，你情願人讚你靚仔，定係讚你唱歌好，演戲好，佢話靚仔！我但凡有咩奇難雜症，我都會去搵呢個人，遇上困難佢係我明燈，以前每一次我做演唱會，佢一定來睇綵排，以下呢首歌，送俾劉德華先生——《如果有一天》。」
克勤唱了幾句後，劉德華由台下升上來，現場觀眾驚喜萬分，歡呼聲震耳欲聾。華仔之後說：「其實我一直都好驚。」克勤好奇：「吓？你驚？你都會驚？」華仔笑說：「驚呀，上一次我都係唱呢首歌（《如果有一天》），我吊喺上空兜咗一個圈，就要同大家講下次再見啦。所以今日再唱呢隻歌，對我來講係好有意義，但又好驚，個心慌㗎。」克勤又問：「咁你幾時再開呀？你記得叫我來呀。」華仔說：「好快㗎啦。」然後叫全場觀眾企起身，再跟克勤合唱《我恨我痴心》，將氣氛推到最高點。
昨晚尾場，克勤由頭開始收禮物，鮮花、利是、玩具，每次他走近觀眾都接禮物，他說 :「真係好多謝大家，利是就係我兩個仔助學基金，呢幾日都有返屋企拆禮物，睇大家寫俾我的信呀咁，我發覺，我收到波衫、Lego、玩具啦，仲有護膚用品、防曬用品，抗皺面膜‥‥‥都有，哈哈哈，連護膚都要大家提我，照顧我，真係多謝大家一番心意。」
此外，克勤又唱出半首《傻女》，令捧場的原唱陳慧嫻成為焦點，被觀眾不停用電話集郵，他見慧嫻被包圍即說：「哎呀，寶麗金之友，哎呀，唔好意思，係我衰，引咗大家注意你㖭。」他又示意控制台趕快關燈，好讓慧嫻可以安靜享受演唱會。
克勤與觀眾互動時，全場大合唱《 紅日》，之後大讚：「呢邊唱得咁勁，唔怪得啦，原來張敬軒喺到！哈哈。」 軒仔不只跟着唱《紅日》，很多首歌也站立又揮手又跳舞，看得十分投入，令台上的克勤不時做回心心手勢多謝。
來到最後一首歌《告別校園時》，全場大叫安歌，克勤連續唱了三首歌，觀眾一直點亮手機燈把紅館變成燈海，又跟着大合唱，令克勤很感動：「我要記住呢個畫面，我覺得我好幸運，我只係一個好喜歡唱歌嘅人，唱歌可以成為我職業，由1987 年第一隻唱片，到依家好一段時間，大家同我一齊成長，時間過得飛快，昨日炎明熹來做嘉賓，佢18歲，我個仔都15歲啦，我仲同佢唱情歌，我都唔知點投入，哈哈‥‥‥時間過得好快，尤其疫情，每個人都學會好珍惜身邊每一樣嘢，今日你哋仲帶咁多燈牌，其實無論有冇燈牌，我都好珍惜大家對我嘅愛護，冇人會知道下次演唱會係幾時，工作係無止境，追求都無止境，但知足應該會有‥‥‥喺寶麗金年代，畫子（關維麟）揀呢首歌比我嗰陣，我最初好唔鍾意，覺得好『娘』，佢話你信我啦，你可能會唱一萬次。我冇諗過，呢隻歌咁多人鍾意，多謝大家。」然後為大家獻上《一生不變》，觀眾則跟着大合唱，場面感人。
完場之後，大部份歌迷一直不肯離去，喊安歌喊了近十五分鐘，最後克勤難抵大家熱情，再一次上台，笑道：「真係咁真係咁痴纏？」然後再唱了《誰願分手》及《沒有你嬴了世界又如何》才真正完結演唱會。
克勤在演唱會後表示歌迷及觀眾的熱情令他非常感動，可能太久沒做演唱會，歌迷特別痴纏，「今晚都算非常完滿結束啦，我估我可能係香港開埠以來，喺紅館收得最多利是的歌手，哈哈。」
演唱會反應好，克勤暫未計劃開part2，「但呢個騷會喺世界各地不同地方做，九月或者去澳門再做，歡迎大家去開旅行一齊去世界各地睇。」他又坦言唱《一生不變》時差點感動落淚，「的確係好感動，但男人老狗老真係盡量唔想喊啦，唔鍾意自己喊，唱『別了那一天不知再相見』真係要忍住‥‥‥」昨晚不少歌迷高舉大燈牌，說他飛多遠會陪多遠，又有寫禁止他退休，克勤笑道：「係呀，佢地好驚我退休，大家唔使擔心住，我家庭負擔重，唔會退休住啦。」