疫情反覆，經濟亦都充滿不明朗因素，九七以後，香港再迎來另一波移民潮，唔少人看淡未來急急放盤！不過有危就必有機，有人放盤亦有唔少人趁住樓價調整入市，今年就有唔少藝人明星買樓及放盤，圈中物業成交特別多。
撰文、圖片：東方新地
袁偉豪 張寶兒擲七千萬購愛巢
求完婚定下婚期，下一步梗係物色愛巢！去年九月喺加拿大求婚成功後，袁偉豪孖未婚妻張寶兒就以6,568萬，聯名入手清水灣豪宅傲瀧複式連私人花園特色單位，順手又聯名用400萬連掃兩個車位，認真豪氣。
杜汶澤 田蕊妮放售康樂園愛巢
一直放售康樂園愛巢嘅杜汶澤，兩個月前亦終於等到買家。據悉去年5月本來以2,600萬叫價放盤，勁劈652萬最後以1,948萬成交。不過兩公婆2013年以1,400萬買入，都仲有548萬進帳。出售康樂園後，近日傳出杜汶澤夫婦以月租4.6萬租住上水天巒洋房、三房運花園，又是低密度住宅。
裕美「首期幾十萬，一炮過搞掂 」
男朋友林作鍾意事無大小，都第一時間喺網上開心 share 展示個人能力，所以早兩個月女友裕美以800萬購入將軍澳新盤 SEA TO SKY 一個兩房單位，都係林作負責出 po 公布，當然要劃出重點「首期幾十萬，一炮過搞掂 」，說明搵錢好重要，以及女友唔使靠自己。
龔嘉欣豪擲935萬升格做業主
密密做又夠慳，儲埋儲埋多年私己錢，龔嘉欣喺今年初豪擲935萬購入將軍澳維景灣畔單位升格做業主。嘉欣話由16歲做模特兒開始，就一個戶口出糧、一個戶口儲一半糧，儲蓄成就連自己見到都話有滿足感。
曾志偉賺近億
至於今年售樓賺得最多，非獎門人曾志偉莫屬。今個月就有消息指曾志偉以一億港元出售位於西貢清水灣彩濤別墅洋房。留意番，獎門人88年以403萬購入，今年以一億成功售出，轉手獲利9,597萬，升值25倍！
張栢芝1.28億購入世紀大廈頂層特色單位
張栢芝11年以1.28億購入世紀大廈頂層特色單位，實用面積2,786呎，曾經都入住過。不過栢芝帶住三個仔一時搬去新加坡、一時移民加拿大，最後回流都冇返世紀大廈自住。14年曾經試過以2億元放售，今年五月再放以1.4億元脫手。
呂慧儀專攻屯門中價樓
圈中小富婆呂慧儀一向喜歡買磚頭，並專攻屯門中價樓，早年上車後，11年再買多個700呎單位收租，去年尾又再度出手，以996.7萬買入屯門上源高層實用超過780呎單位，今次就係愈搬愈大買嚟自住。
樂易玲帳面淨賺1,650萬
好多明星名人入住嘅西貢匡湖居，連無綫高層樂易玲都曾經係住戶之一。據悉05年以公司名義，用930萬購入嘅1,323呎獨立屋連1,600呎特大花園，今年10月以2,580萬元成功放售，帳面淨賺1,650萬。每年生日及新年，藝人輪住上門賀樂小姐，同時間招呼三、四十人冇問題。
李明慧中半山羅便臣道豪宅放盤
97年香港小姐選舉唔止季軍佘詩曼有成就，冠軍翁嘉穗同亞軍李明慧奪夫大戰亦都深入民心。多年過去翁嘉穗同鄔友正開枝散葉，李明慧都嫁畀陳樹渠二子並生下龍鳳胎。近日夫妻名下共同持有嘅中半山羅便臣道豪宅放盤，附送超豪二千萬裝修，叫價1.15億。