現正播映的《婚姻合伙人》廣受好評，不少觀眾都讚賞其貼地題材，而此劇亦是黃德斌離開無綫前的最後作品。黃德斌在劇中飾演地產發展公司的大老闆邢呇，貴為鑽石王老五的他，不少女士都對他虎視眈眈，更會主動向他投懷送抱，不乏女色。不過，戲外黃德斌卻是個感情專一的人，他更感激太太在他患抑鬱症跌落情緒谷底時，扶持他去捱過難關。
撰文：Kammy｜圖片來源：新傳媒資料室，黃德斌微博，Facebook
黃德斌與妻相愛14年
現年56歲的黃德斌，入行至今已有32年，拍攝過不少的電視劇，而《婚姻合伙人》則是他離開無綫前的最後作品。劇中黃德斌十分多情，為了不得失好友，甘願被對方「抽水」摸大脾，其後對方更要求他塗太陽油，幸得高海寧及時阻止，繼而發展感情關係！不過，戲外黃德斌卻是個感情專一的人。
遇到有情人，應該是人生最大福氣。現實中，黃德斌同年輕16年的黃太Joyce Wong (黃美恩) 患難見真情，二人相愛至今已14年。兩人05年相識，當時黃德斌拍完電視劇《金枝慾孽》，事業剛開始有起色，之後連拍多部劇集《火舞黃沙》、《珠光寶氣》等都擔演重要角色，受觀眾關注，不過，11年他就因連拍兩部角色沉重的電視劇《天與地》及《心戰》，長期要徘徊情緒低位，令他一度抑鬱不能自拔，幸當時得Joyce陪伴支持才得以振作。
太太陪伴走過抑鬱症陰霾
據知情者透露：「嗰時佢啱啱拍完《天與地》，無耐又接到《心戰》嘅角色，為咗演陳豪嘅心魔『邪惡』，Kenny因為太過投入，搞到跌落情緒谷底，當時佢都唔知自己有病，只係突然之間心情好低落，完全唔想見人，將自己收埋喺間屋度，冇晒鬥志，不過Joyce都對佢不離不棄，一路喺佢身邊鼓勵同支持佢，幫佢走出困局！所以Kenny成日都話，Joyce係最了解佢嘅人，如果冇咗佢，自己都未必可以捱到今時今日。」
受太太影響 接受自己的缺陷
自細家境清貧的他，早年更試過耳朵入水發炎，因延誤求醫而導致右耳失聰。據知情者透露：「中學畢業之後，佢做過一排跟車工人，嗰時每朝返工前，佢都會去游水，一次唔小心入咗水落耳仔度，就算唔舒服都冇錢睇私家醫生，去政府醫院排期要等一年半，點知有朝早佢瞓醒發現枕頭都係血，原來耳仔發炎流膿，佢阿媽嚇到即刻同佢去睇急症，醫生要佢即時入院開刀，不過最後都因為醫得太遲，依家佢右耳只剩番三成嘅聽力！」
雖然人生多災多難，但黃德斌學會提醒自己要保持正能量，除了遺傳自母親的堅毅精神，亦多得女友的樂天性格影響。據知情者透露：「入行以嚟，佢遇過好多波折，捱咗咁多年，但佢從來冇諗過放棄，佢好有毅力，但豁達性格可以話係畀Joyce感染，Joyce份人好樂天，就連岳父岳母都好玩得，呢幾年Kenny都開咗竅，好多嘢都唔再執著！」
黃德斌愛的宣言冧老婆
2018年，黃德斌與Joyce感情開花結果，在金鐘一間酒店舉行Cocktail Party註冊拉埋天窗。展開人生新一頁，黃德斌冇選擇大排筵席，只在酒店舉行簡單而隆重的婚宴，與一班至親好友慶祝人生大事，黃德斌愛的宣言亦簡單直接：「佢好了解我！婚前婚後大家都係互相欣賞、遷就、信任和尊重。」
一切從簡 連求婚都省略
德斌同阿Joyce 一齊14年，已經猶如老夫老妻，所以當德斌被問及求婚情況時，亦笑說：「冇呀～結婚咯！咁咪結婚囉！」就連跪地，戒指仔都冇，但係女友一樣肯嫁畀佢。
申請結婚被發現！
黃德斌對Joyce錫到燶，幾年前就打本畀女友在尖沙咀開時裝店，不用開工二人亦秤不離砣。二人在假日不用工作的時間，經常拍拖踩單車，非常恩愛！
湊B出巡
婚後黃德斌已火速復工，為《逆流大叔》謝票，新婚的他被問到可有努力造人，型佬黃德斌幽默表示：「唔話你知，呢啲咁私人嘅問題，得喇！總之我會保重身體！」不過，早於三年前，黃德斌同女友的身邊就經常出現一個神秘B仔，兩人一得閒就孖住湊B，雖然黃德斌已經否認是B仔老竇，表示是幫朋友湊B，但湊住人哋個B都如同己出一樣細心，可見黃氏夫婦相當鍾意小朋友。日前，黃德斌又揸車「一家三口」去奧海城買玩具，只見黃德斌同老婆帶B仔去揀玩具車，更慈父上身陪B仔慢慢揀，揀完禮物，他又急不及待抱起B仔，邊行邊逗佢玩，父愛氾濫的黃德斌，生仔有心有力，相信好快會有好消息公布！
稱幫朋友湊
15年初，黃德斌被發現與女友之間多咗個「神秘B」，經常孖住湊仔。據知德斌話BB係佢朋友個仔，叫做稀稀，佢同女友都好錫個BB，女友仲成日湊埋個B返時裝店開工㖭！不用工作的日子，黃德斌將全副心機時間去湊仔，本月中，二人湊住B仔到尖沙咀一間平民餐廳開餐，入到去黃德斌先揀個隱蔽位置抱住B仔坐好，B仔忽然扭計扁晒嘴，德斌就緊張到即刻哄埋去狂啜B仔，氹到BB即時笑番。
女友錫手仔
吃了大約一小時埋單走人，黃德斌抱住B仔同女友行去附近攞車，路過報紙檔見到有玩具車賣，佢又即刻買畀B仔玩，期間黃德斌女友不時用手摸B仔面珠及撥他頭髮，更忽然冧爆捉住B仔手仔錫，雖然多次否認係BB老竇，更曾揚言同BB毫無關係，但當日所見，卻似足一家三口幸福家庭樂！
B仔不離手
雖自稱幫朋友湊B，但黃德斌就算同圈中好友戚其義、郭少芸的飯局，例牌一家三口列席，而女友為父母慶生都抱埋B仔，關係非常親密！