歌手鄭伊健「HERE & NOW EKIN IN CONCERT 2023」世界巡迴演唱會，首場周末（22/4）於澳門開鑼，門票火速售罄，演唱會氣氛超High，「伊健嫂」蒙嘉慧、Nowhere Boys主音Van與太太台下捧場，跟住又唱又跳，非常投入。有指蒙嘉慧帶同日本友人入場觀賞，惟大家一度分開，蒙嘉慧就企舞台前徘徊，並用日文叫喊「Aki先生」（音譯），而粉絲亦以日文稱呼蒙嘉慧，蒙嘉慧再用日文表示「這個」，並走到另一個方向與粉絲握手。不過因為蒙嘉慧在香港講日本片段被公開後，引發爭議。
有歌迷一開場就喊，伊健在台上亦一度眼濕濕，完騷後他說：「今晚太多回憶，唔可以一下子講晒，作為一個歌手藝人，佢哋嘅支持係我哋嘅能量。我有見到佢哋嘅反應，會返去回味。好多嘢唔係必然，我哋都要珍惜！」
今次演唱會舞台設計與歌曲流程都接近香港紅館演唱會，伊健以《一個為你甘去蹈火海的人》、《我願你知道》、《直至消失天與地》和《不要哭了》等金曲，與舞者上演一場戲劇。及後當《友情歲月》前奏響起，全場歌迷尖叫並起身，部份更湧到前排觀眾席。期間伊健一邊唱歌一邊與舞者玩掟波仔時「中頭獎」，幸好他反應快，只是擦過額頭，閃過後忍不住傻笑。疫情過後再開騷，伊健看到台下歌迷的熱情，他說：「我哋開呢個演唱會，就係想帶畀大家希望。當時我哋希望唔使戴口罩，依家真係唔使戴啦！」獲得全場掌聲。
之後音樂總監陳光榮率領樂手台上與伊健Jam歌，伊健就帶埋小師妹黃淑蔓（Feanna）、雲浩影（Cloud）和Rapper朱雋言登場，伊健說：「香港開騷我哋就叫做『Cup Noodle』，嚟到澳門我哋叫『即食蝦子麵』，哈哈，我知呢度好多人鍾意食，唔係賣廣告呀！」他們合唱《For U & Me》、《心照》和《一對對》。伊健請三位新人向觀眾自我介紹時， 朱雋言Rap了一段，而兩個小師妹即興清唱一段自己的歌曲，Cloud演唱《氣流》後，Feanna說：「雖然我係佢（Cloud）師姐但我仍然係『寰亞孻女』，我唱呢首歌你哋可能會知我係邊個。」然後唱了幾句出道作品《差一點我們會飛》，觀眾報以掌聲，果然認出她。演唱會接近尾聲，伊健唱《只會因你唱》中段時，說：「呢首歌特別送畀一位歌迷，佢做咗個手術，希望佢醒番，睇到呢條片。」全場觀眾大合唱，他一度感觸眼泛淚光，甩了兩句歌詞，深呼吸後才繼續唱。最後，他以《打開你未來》和《Stronger》為澳門站演出畫上完美句號。
完騷後伊健、Feanna和Cloud接受訪問，伊健感激歌迷支持和給他能量，他又大讚兩位小師妹台上清唱好勇敢：「你哋真係好大膽，即興唱自己嘅歌，證明佢哋真係好有準備。我哋以前唔敢啦，仲要清唱喎，我覺得好好睇！」Feanna和Cloud坦言當時在台上又驚又緊張。之後她們與伊健搞笑互窒，首先她們表示好開心跟大師兄走埠表演，但伊健笑指她們另有目的，說：「佢哋今次嚟嘅目的唔係唱歌，係為咗Shopping。」Feanna透露買了很多杏仁餅和豬肉乾，伊健笑說：「你識唔識買㗎？人哋話要去排晒長龍嗰啲先好食㗎喎！」她信以為真。然後Cloud自爆入賭場被查身份證，超開心。伊健笑說：「佢好無眼光，咁都睇唔出！」Cloud扁咀。聽到兩位小師妹表示要跟他去其他地方巡唱，伊健笑說：「希望繼續開騷都可以帶埋佢哋一齊去。（會去邊度？）南非、瓦努阿圖⋯⋯」她們明知伊健隨口噏，仍然七咀八舌追問，非常搞笑。
東網網站 : https://on.cc/東網Facebook專頁 : https://www.facebook.com/onccnews/