Wyman公開填詞隱藏服務 改英文歌名非暗寸唱片公司求其

黃偉文(Wyman)填詞無數，早前卻在IG自爆原來還有售後服務，這個為興趣的服務就是為歌曲改英文名，當中就提到不少歌曲的英文名，亦都應要求為Edan兩首歌〈E先生連環不幸事件〉、〈一表人才/年青有為〉改英文名。不過他就在文中表名係「善意嘅提醒」「希望唔好傳傳吓或者被其他媒體報道咗出嚟變成『Wyman暗寸唱片公司求乸其』。」

在限時動態中，Wyman就解答了Edan兩首歌的英文名問題。〈E先生連環不幸事件〉會改為〈Mr.E's A Series of Unfortunate Events〉，〈一表人才/年青有為〉會改為〈Promising Young Man A/Promising Young Man B〉。

而長文中亦有提到多首歌曲的英文名字：「好多唱片公司都可能唔知道有呢個選項：搵黃偉文填詞，係包埋「改英文名」嘅。😆因為近年市面上多咗幾個需要有「廣東歌 English Title 」輸入嘅平台，例如 Apple Music， Billboard ⋯⋯ 所以都會要求唱片公司出歌嘅時候，提供埋英文名。雖然呢啲英文名市民大眾其實可能都未必留意到接觸到，但我哋呢啲對作品每個細節都有要求嘅人，就會覺得如果個歌名純粹變成一堆拼音，始終好似唔夠藝術又或者唔夠用心咁，所以如果唱片公司打嚟叫我改埋個英文名，我係一定冇托手踭嘅。
事實上，作為一個鍾意文字嘅人，我甚至覺得幾好玩𠻹，所以久而久之，一啲比較多溝通嘅唱片公司同事，例如係華納同寰亞嘅 A&R，到時到候就會打俾我吹吓水，視一齊改英文名為一個有趣嘅智力遊戲兼聯誼活動。

所以大家睇到呢張圖入面嘅四個英文名，頭三個其實都係我有份改嘅（亦都因為我哋以為應該冇乜人會注意到，所以改嘅時候都會為所欲為，順便自娛，例如《世一》點解叫 The One for You 呢，除咗因為首歌入面成日唱 for you 之外， @robinchi 同我都想首歌簡寫叫 T.O.F.U.，係咪好無聊呢？哈哈哈！咁《老派約會之必要》叫 A Gentleman’s Guide to Old-fashioned Dating 都算有花過心機吖。）
言歸正傳，如果俾我改，《寧靜海》我會叫做 「 Vale , Mare Tranquillitatis 」(即係「Farewell, Sea of Tranquility」嘅拉丁原名，如果熟拉丁文嘅朋友發現有錯，歡迎指正。）

但公道講句，唱片公司要兼顧嘅工作都好多，亦都唔知我有提供呢個服務，所以趁今日一次過提醒返，我其實係有呢個免費嘅 after-sale service 嘅，歡迎幫襯，隨時候命。
真係溫柔而善意嘅提醒，希望唔好傳傳吓或者被其他媒體報道咗出嚟變成「Wyman暗寸唱片公司求乸其」，哈哈哈，我真係唔該晒大家。
（順便分享多幾個：

給缺席的人唱首歌 Song for the Absentees
銀河修理員 Galactic Repairman
豐乳肥臀 Big Boobs Bubble Butts ( BBBB ) )

#唔敢話自己英文好但好在夠努力同肯花時間

#邊一個發明了Pinyin」