買樓置業，係唔少香港人的目標，但要買邊區嘅樓？有網友就奉勸大家千祈唔好買天水圍，並分析了當中4大原因，要對這個曾經被稱為「悲情城市」的地區避之則吉。不過，網友意見兩極，有不少人贊助唔好買天水圍的同時，亦有人反駁天水圍唔係咁差，仲有其好處。唔知大家又點睇？
撰文：Yin｜圖片來源：香港討論區截圖、Google地圖截圖
有網民在香港討論區發帖，以一個住了29年的天水圍街坊身份，忠告網友買樓唔好買天水圍，並列出4大原因，包括：居民質素、樓盤質素、社區設施和教育，最後就是投資價值。
第一：天水圍居民素質
樓主指出，天水圍有大量新移民和公共屋邨，家庭月入長期處於全港最低水平，而教育水平平均亦是係全香港最低。他認為，假如有小朋友搬入天水圍住，絕對令小朋友受損，並且區內商場和街市的消費，也絕對不比元朗屯門甚至市區為低。
第二：天水圍樓盤素質
近20至30年，天水圍基本上只得嘉湖山莊呢類舊樓，就算近十年八載有柏慧豪園、慧景軒等等私樓，但八成都是被公屋包圍。即使近期有鄰近濕地公園的樓盤，但濕地公園本身的位置偏僻，而且蚊蟲多，樓主稱：「真係比我都唔住。」所以他認定，天水圍在跌市一定是第一個跌，上升亦是最後一個升。
第三：天水圍社區設備及教育
成個天水圍除左公屋街市，以及最近在天逸同天一商城空地起的食環臨時街市之外，連一個似樣的街市都無，導致買餸要硬食貴價菜同肉，不似元朗有兩三個公營街市同街舖。
康樂設施方面，除左天水圍西鐵間圖書館外，區內的康文設施嚴重不足，只得一個天水圍公園。
在教育方面，天水圍的學校除了天耀的信義中學之外，大部分都係Band 2、Band 3的學校。樓主認為，所謂近珠者赤，家長總希望仔女入到名校，因為就算自己兒子讀唔成書，但他們的同學將來都會有醫生律師朋友，有望擺脫公屋圈「輪迴」。
第四：天水圍投資價值
樓主認為，憑上述3個原因，可以判斷買天水圍樓是「死路一條」，而且同樣價錢，選擇買屯門和元朗樓，起碼有上升潛力，又食到發展潛力，但天水圍卻是毫無好處。
網友同意部分論點 天水圍公屋多但物價貴
樓主對於天水圍的狠狠批評，網友反應兩極。有網友表示，自己曾經住過栢慧一年，同意樓主其中一個論點，就是天水圍公屋雖然多，但物價一點都不平。另有網友在近20年前住過天水圍，當時情況亦是切合樓主的說法。
有關天水圍多新移民的說法，部分網友亦表示認同，通街都是「大媽」，感覺似是返上了內地，那麼倒不如搬上羅湖住。亦有人不滿天水圍交通差，搭西鐵往往太多人、太迫，搭巴士又經常被迫要轉車。
反駁天水圍唔係咁差 有景觀亦有前景
不過，帖文的網友亦不是一面倒批評天水圍，都總有人認為天水圍有僅得欣賞的地方，例如是全港罕有的濕地和魚塘景觀。
也有網友提到，政府正在搞北部都會區，而且鄰近前海，因此睇好天水圍樓市前景，不應該用之前30年去跟未來30年比較。另外，有人則欣賞天水圍往深圳灣很快。
網友: 天水圍樓價反映一切
無論天水圍是好是壞，區內樓價其實亦已經反映了質素，正是因為存在一些不足之處，才會有平至$11,000的呎價，這亦是市區樓無法比擬。