金燕玲抗癌割除五器官　失眠時跟癌細胞傾偈：我死你都死

近日參演電影《破.地獄》演出「蓮姐」一角的金燕玲，近日去到鄭裕玲YouTube頻道「The Do Show」接受訪問。當中提到2019年開始先後患上子宮頸癌及乳癌，兩度堅強抗癌的經歷。

訪問中69歲的金燕玲提到記得當年有日是年廿八，她送女兒上機返英國後第二日就見醫生，知道癌指數升了再接受抽組織化驗︰「直到年初三入院，年初四開刀做手術，如果幸運嘅話，我只需要接受微創手術，切除子宮同其他器官組織，手術就完成。結果進一步檢驗之後發現，我嘅情況一定要開刀做手術。」最終割除了五個器宫：「除子宮、淋巴等器官，甚至連盲腸同大網膜都要一拼切除。」醫生解釋因為「腫瘤好惡」，如果復發多數會在這些位置擴散，所以要全數切除。

她亦提到患病初期她只告訴了伴侶蘇絲黃及好友關之琳，直至留醫十日，完成化療要人接出院才告知妹妹。更提到當知道患病時腦內一片空白：「我冇胡思亂想，譬如擔憂自己處境有幾嚴重、仲剩返幾多壽命，通通都冇諗，只想年初二睇煙火，年初三入院做手術，腦海就係一片空白。」
Do姐之後問到是否已完全康復，金燕玲說︰「可以做嘅做晒。」醫生指三年內會有機會復發，慶幸過了第一個三年比較放心。

但去到2021年她做伸展運動時發現胸部有硬塊：「又係正值新年……首先開刀取出組織化驗，先可以知道乳癌第幾期，醫生話當進一步擴散嘅話，整個乳房就要割除。我而家都就快70歲喇，呢件事發生喺幾年前，作為一個60幾歲嘅女人，如果需要切除乳房就切除啦，又唔係咩大不了嘅事，但問題係，我而家切一個定兩個？我唔鍾意有嘢困擾我、拖泥帶水，問題係你唔知道呢件事應唔應該做……矽膠袋會令假乳房挺啲，真乳房會隨年紀下垂，咁點？每日就面對唔對稱嘅乳房，變相提醒我呢啲唔開心嘅事，作為一個女人，你可不可以喺鏡前面對自己，我做唔到！我唔係需要乳房，但我冇辦法可以咁樣面對。」慶幸經化驗後最終不用全乳切除。
而患病期間，她更曾因失眠而和癌細胞對話：「我半夜三、四點都未瞓……化療期間，因為甩晒啲頭髮變光頭，夜晚又瞓唔著，我一邊摸住自己光禿禿嘅頭頂，同我啲癌細胞傾偈，我話如果我再瞓唔到就會死，咁我死你都死埋。我覺得佢哋唔會冇晒唔會走，只係數量多少，咁我同佢哋共存。」