簡淑兒離開TVB相信自己有價值！終極回應整容傳聞：之後唔會再答

由林柏希主持的網上節目《月傾會》，最新一集嘉賓請來剛離開TVB的簡淑兒（Jessica）。簡淑兒入行10年，她表示決心要跳出舒適圈：「10年前嘅我，都係因為跳出咗自己嘅comfort zone，先會入到呢一行；10年之後，不如再試下跳出comfort zone，睇下會唔會有更多進步！嚟到呢個位，自己好似stuck住咗，所以想跳出去囉！」

今次離開TVB的決定，男友麥大力亦表示支持，兩人至今拍拖已經超過1年。簡淑兒表示當初沒想過要公開：「好老實講，真係因為影到，嗰陣時大家都冇諗住公開㗎！」簡淑兒表示，當初和麥大力發展，對方真的上天下海乜都做齊：「我問佢有冇興趣去行山，因為我係夜晚黑去行，跟住之後就去潛水啦，仲有一次就係我去捐血！行山嗰次，佢本身諗住女仔行山都係行下啫，但係嗰次我哋攞埋繩去爬，跟住就刮損咗佢！佢就話，如果我都追唔到呢個女仔，我都唔知仲有啲咩可以做喇，佢講完俾我聽，我都覺得有少少感動！」

簡淑兒表示：「依家自由身，有好多嘢自己想試囉，唔一定要有公司先有你嘅價值，一個人嘅價值，應該去到邊度都有！我依家就好努力去build up自己價值，睇下嚟緊會唔會有唔同project，或者自己試下拍片！」一直有傳簡淑兒是有錢女，她說：「我真係唔係好有錢，屋企人就算搵幾多都好，都同你冇乜關連，因為你自己都要有你自己生活，冇理由呢一世都係靠屋企㗎嘛！」

除了有錢女傳聞，整容話題亦圍繞她多年，簡淑兒說：「由我一入行到依家，選完（港姐）出嚟就已經咁講，其實我已經答過無數咁多次，我已經唔想再答喇！如果要繼續講，呢個當然我控制唔到，但係我就選擇咗唔會再答呢個問題！」