人妻主播可宜入廟拜神　照求桃花嚇親人

混血索女主播可宜昨日（7日）趁初七人日到濟公廟祈福，雖然自細在外國長大，但對入廟拜神完全唔抗拒，仲覺得呢個傳統好得意。入到廟她第一時間要求桃花，以為鬼妹仔唔識求，因為去年才正式成為人妻。原來可宜一早收晒風，知道不少藝人有拜和合二仙習慣，好似阿Sa同李佳芯都有來過。她笑說：「我要桃花唔係求姻緣，係要人緣啫，娛樂圈好講人緣，所以要催旺呢方面，愈多愈好。」

可宜自爆小時候很頑皮，經常跟父母頂嘴，母親曾到濟公廟指點迷津，然而，今次卻是她首次到濟公廟，並順道替老公攝太歲。她表示：「以往有喺其他廟幫自己攝太歲，但就冇咁正式，因為呢度有師傅從旁指導，希望更加靈驗。我知道嚟緊東華三院會接管番濟公廟，廟入面嘅師傅唔知有冇得留低，我覺得保留佢哋好重要，尤其對我呢種唔熟程序嘅人。」

另外，今年是可宜婚後首個春節，她坦言跟做女時分別很大：「好多準備過節功夫要做，例如要幫老公封利是，要做好多大掃除家務，又要買年花同揮春。」問到虎年願望是否添丁？她說：「順其自然啦，係天賜嘅禮物，希望工作順利，疫情快走。」

東網網站 : https://on.cc/東網Facebook專頁 : https://www.facebook.com/onccnews/