黃子華最後一場棟篤笑《金盆𠺘口》在2018年連開26場，作為「收山」之作，當時曾經聲言唔會出碟、不作紀錄，只與入場觀眾分享。但在2020年3月11日深夜，黃子華的專頁「子華本部」忽然流出《金盆𠺘口》最後一場的開幕短片，網友紛紛忖測，會唔會有得上網睇？！
撰文 : 東方新地 | 圖片 :子華本部fb、新傳媒圖片、黎曉靈IG
黃子華 – 子華本部流出《金盆𠺘口》短片！
2018年的《金盆𠺘口》曾經聲明「不設巡回、香港玩曬」，更有傳唔會出DVD，但其實現場紀錄肯定有拍，演出期間子華自己都不時將感謝嘉賓的影片放上網，到底最後會在Netflix還是好友蕭生的HMVOD播出呢？趁住2020抗疫期間可以網上streaming重溫，真係網民之福呀！
有網友忖測，莫非係因為《乜代宗師》票房唔夠好，黃子華要回歸舞台，又或者靠《金盆𠺘口》的版權贖返層樓？！
網友熱烈回應：唔使急、最緊要快！
面對不夠3分鐘的「預告」，網友表現超級雀躍，出片1小時已經有二千幾個like，回應多數支持子華復出：
型仔出場，睇片：
Posted by 黃子華 – 子華本部 on Wednesday, 11 March 2020
黃子華親筆倒數《金盆𠺘口》依依不捨
《金盆𠺘口》原則上係黃子華的最後一次棟篤笑演出，並只在香港舉行，不設世界巡迴演出，作為收山之作，當年演出日期係2018年7月6日－7月31日，合共26場。臨別金句：「領養穿山甲，放生陳冠希」（睇過嘅先會明白），在最後10場，佢更加喺後台化妝間作出最後倒數，當時每天在facebook出相，盡現不捨之情⋯⋯
重溫！《金盆𠺘口》尾場星光熠熠 黃子華講到強忍涙水眼濕濕
黃子華嘅棟篤笑「封咪作」《金盆𠺘口》在2018年7月20日圓滿結束，最後一場全場爆滿，更有唔少圈中人前來捧場！當晚除咗一班粉絲觀眾不捨之餘，其實子華神自己都不禁動容眼濕濕，臨完場同觀眾鞠躬時更拿出紙巾抹眼淚、擤鼻涕，更提起當年點解會搞咗第一場棟篤笑！
群星撐反口 黃子華 封咪留後路
話到明最後一次的26場《金盆𠺘口》畫上句號，好消息係子華神當場預告「有機會反口」，連老友古巨基都開po撐佢《金盆反口》，搵食大晒，又有群星齊齊撐，子華反口不是夢！
黃子華 「最後棟篤」只限2018年！？
可能係全行keep得最好60後藝人，目測咪最多四張，其實子華60年出世、2020年月就滿60歲，所以一口氣棟足26場，尾場子華明顯特別感觸，喊完又喊，又回憶番當年第一次開棟篤笑13個原因，原來當年因為朋友得了腎病、失眠、想做一個不是喜劇的個人表演、收工後唔想番屋企，最後一點係「因為我就快30歲了！」如今60歲都嚟緊，點解要封咪：
「好多人對我封咪有好多揣測，其實因為我成日唔記得嘢，好容易畀觀眾打斷，我好難頂得順演出時有咁多嘢插入嚟。」
其實棟篤足30年、今次講足26晚，尾場子華既沒有顯露老態，亦不見疲態，更不時爆肚臨場加笑料，不過無論子華定觀眾都充滿不捨就肯定。話說觀眾氣氛熱烈不停起哄，子華就讚完大家有力量時又叫住觀眾：「唔好太煽情！」
當飲啖水都搞到台下瘋狂時，子華都忍唔住笑：「依家好麻煩，我飲杯水啫。我喺屋企都係咁，我一飲水，全家人食緊飯都放低筷子拍手掌。」當子華當正最後一場嚟做、群星當正最後一場嚟撐、忠實fans都當最後一場嚟撲飛時，大家唔使咁絕望，子華神臨尾竟然賣關子預告有轉機喎：「今年唔會再做(棟篤笑)！搵食啫！報警呀？！」到底係搞gag，定係真係反口，真係得子華神自己最清楚！
人人以為子華神有口齒再冇下次，點知尾場又留懸念：「今年唔會再做！」
佘詩曼現身捧場
係電視、電影最佳拍檔，佘詩曼等到最尾場壓軸捧場，仲拉埋大隊帶齊七仙女。
多年好兄弟吳鎮宇絕對係最神心最「有頭有尾」一個，頭場撐完，尾場再同張達明睇多場。
梁芷珊在FB貼完合照，亦同基仔一樣不捨子華封咪，留言說：「唔好口浪口得唔得呀！」
基仔撐金盆反口
倪震周慧敏夫婦、古巨基及太太，仲有天后容祖兒亦結伴撐子華神尾場，古巨基更在社交平台留言：「不捨，可否金盤(盆)反口？」
感謝祭
開騷即成全城瘋搶盛事，今時今日貴為子華神，黃子華除咗轉數快精警到一個點，最可取之處其實仲有念舊同知恩圖報，可能係最後一次棟篤笑，子華今次特別感觸，亦都特別把握機會，多次在台上感謝多年來扶過自己一把的人。
自稱上街野生捕獲發哥再邀請對方睇騷，發哥發嫂當真坐在台下時，子華亦都回憶當年兩次遇上發哥經歷。第一次名不經傳卻被發哥主動握手、第二次拍外景偶遇，兩個月後竟然收到發哥親攝親frame玉照一張。
雖然老友青雲夫妻今次未有到場，不過子華講到與青雲舊事時一度感動流淚：「以前做一場騷已經賺得少，多數又用咗嚟慶功，次次都白做。有一次做完又有人嗌慶功食日本嘢，日本人最叻嗰樣係發明所有食物冇樣嘢係平，但係我想畀錢時，職員話張單有人幫你埋咗喇⋯⋯嗰位仁兄係劉青雲。」
繼第二場姚嘉妮後台抱頭痛哭後，林祖輝尾場再帶埋老婆撐場。原來當年棟篤笑個名林祖輝有份度、開騷申請場地表格係林祖輝幫手攞、首次棟篤笑《娛樂圈血淚史》銷情慘淡，都係林祖輝捱義氣親自上陣周圍貼街招。
仲有對修哥、陸永等人嘅感謝祭。
再來重溫吓子華神發嘅後台福利～
最後棟篤笑尾場 黃子華含淚重提初衷
去到尾聲，講完節目內容嘅子華逐一對四面台鞠躬，當下忍唔住眼濕濕，然後攞出紙巾印去淚水，最後拎起今次棟篤笑嘅「回水杯」，向全場觀眾敬咗一杯！飲完水，子華仲送埋隻杯俾一位台下粉絲。按照慣例，子華完場前都會開金口唱粵曲，但當晚除咗唱粵曲，子華仲難得提起當年搞首場棟篤笑嘅原因。
回憶當初為何搞棟篤笑，原因有13個！
子華表示1990年首次在文化中心搞棟篤笑《娛樂圈血肉史》嗰陣，其實有出一本小冊子，入面列出13個「點解要辦棟篤笑」嘅原因。
原因各式各樣，包括：
1、一個朋友患了腎病
2、時常失眠
3、做了一個不是喜劇的個人表演，卻引來不少笑聲
4、下班後不想回家，回家後不想上班
5、搞笑show流行起來
6、第一場多謝過的葉潔馨小姐說，你應該做stand up comedy
7、讀了一本邊緣棟篤笑的書
8、看了Eddie Murphy 的棟篤笑
9、迷茫，書都不想看
10、存了好耐的小量金錢，一下子又被借光了
11、看見許冠文在Sam的演唱會做棟篤笑
12、太寂寞，養了一條狗
13、快三十歲
唱完粵曲，子華雙手合十，走返後台嘅時候有向觀眾揮手，而返到後台後，子華再轉向觀眾，鞠躬答謝，顯得十分不捨。
好友兼恩人忽然撐場 成功搞喊黃子華⋯
在《黃子華棟篤笑金盆𠺘口》頭幾場入面，有一位老友嚟睇騷，子華喺後台一見到對方，喊到失控，到底邊個有咁嘅能力令子華神咁激動⋯⋯
邊個好友搞喊黃子華？
之唔係同子華識於微時嘅林祖輝囉！子華多場騷都在台上提到祖輝，表示當年自己第一次開棟篤笑時，因擔心銷情慘淡而到處貼街招宣傳，當年幸得祖輝仗義幫忙，期間講到哽咽。估唔到，子華完騷後一入後台，就見到對方原來嚟咗捧場，子華激動到一見到祖輝就挨喺佢肩膀喊，朋友都立即遞上紙巾畀佢拭淚。
有報道更指出當年係祖輝幫子華去紅館攞表，申請文化中心個場地，佢哋又一齊度棟篤笑個名，而在2003年，子華公演《無炭用》時撞正「沙士」，祖輝仲幫手喺門外派口罩畀觀眾入場，真係好兄弟！
企喺側邊嘅邱淑貞見到子華喊到咁，都唔知點好！
當晚有份睇騷嘅鄭啟泰都有貼同子華及林祖輝合照，留言話：「第一次認識子華應該是1990年，我在電台做small potato,商台搞咗個single party,當時仍然是DJ的黃子華走過來講咗句說話「呢個係最desperate 嘅party!」嚇得我吖🤣原來果陣林祖輝幫佢響尖沙嘴貼poster宣傳第一個楝篤笑。」
第一次認識子華應該是1990年，我在電台做small potato,商台搞咗個single party,當時仍然是DJ的黃子華走過來講咗句說話「呢個係最desperate 嘅party!」嚇得我吖🤣原來果陣林祖輝幫佢響尖沙嘴貼poster宣傳第一個楝篤笑。thx Thomas! #金盤𠺘口 #黃子華 #goodshow #brotherhood
Cheng Kai Tai 鄭啟泰（@cheng_kai_tai）分享的貼文 於 PDT 2018 年 7月 月 7 日 上午 8:24 張貼
子華同祖輝相識逾30年，1988年二人在商台有份主持節目「咪前7先鋒」，大家認得子華嘛？！
大家之所以見到子華同祖輝喺後台激動相會，原來係名媛黎曉靈(Kimmy)分享相片及拍片放上其IG，又留言﹕「男神不忘初心感動落淚了！與女神們一起去看我的男神。從自己貼街招拍沒有人來，到現在一票難求，實在為你的堅毅驕傲#黃子華 #cry #感動的淚」
男神不忘初心感動落淚了！ 與女神們一起去看我的男神💕👍🏻💪🏻 從自己貼街招拍沒有人來，到現在一票難求，實在為你的堅毅驕傲🙏🏻💕 #黃子華 #cry #感動的淚
kimmy_lai（@kimmy_lai）分享的貼文 於 PDT 2018 年 7月 月 8 日 上午 10:07 張貼
而睇頭場圈中人眾多，包括古巨基夫婦、關心妍夫婦、蘇永康夫婦、蔡一傑、蘇絲黃、金燕玲等！
View this post on Instagram
恭喜子華第一場Goodshow! #黃子華金盤𠺘口棟篤笑 有笑有涙有能量 💪🏻 感謝你令我們感受香港的所有 “the most the best” ! #黃子華
A post shared by 關心妍 Jade Kwan (@kwansumyinjade) on Jul 6, 2018 at 9:39am PDT
黃子華棟篤笑 售限量𠺘口杯
「棟篤男神」黃子華嘅最後一個棟篤笑騷《黃子華棟篤笑金盆𠺘口》，上周五晚喺紅館開鑼，為咗趕絕黃牛，子華神一口氣開足26場，一眾粉絲熱切期待！個騷講明係十八禁，仲要只限香港，不設巡迴，題目都離不開關於香港本土，講民生，諷刺時弊……
頭場晚上七時喺紅館門外大會已有攤檔賣紀念品，就係「金盆𠺘口」杯，子華事前喺Facebook留言：「飲水又得，食飯又得，𠺘口又得，擺設又得，紀念又得，總之…..你想到就得，而最緊要，係限量㗎！」限量喎！賣100蚊，抵啦！當然仲有就係《唔黐線唔正常》嘅DVD，賣$150，逾百人排隊幫襯，十分墟冚。
晚上八時十分, 開場前場內廣播宣佈：黃子華棟篤笑，即將開始，將會一氣呵成兩個多小時，大家要好好準備喇。如果晏瞓爭取時間恰一陣，鍾意講野爭取時間講哂佢！
一如以往，棟篤笑開騷前，播出由1990年黃子華第一個棟篤笑開始——《娛樂圈血肉史》、《色情家庭》、《末世財神》、《棟篤笑雙打之玩無可玩》、《秋前算帳》、《唔黐線 唔正常》等歷年棟篤笑金句片段！其中《唔黐線 唔正常》畫面播出子華雞蛋高牆片段：「我哋有仁，有勇，我希望我哋都有智慧，去保護我哋自己，不容一粒雞蛋粉碎，好唔好？」全場報以熱烈掌聲，精華片段播足十幾分鐘。之後廣播繼續：請大家放低手機。不准拍攝錄影，勸身邊朋友唔好玩電腦……
論黃屍藍屍阿爺 子華：「大家對顏色嘅喜好唔同啫…」
千呼萬喚嘅子華神棟篤笑，終於在八時半出場 ，全場嗌到地板都震埋，一開始子華就話要同大家講最重要嘅兩句金句：
「就係，就係……回水冇得傾！除褲冇得傾，太高清！冇錯，金盆𠺘口喇，最後喇！有得嗌好嗌！嗌唔嗌呢，唔需要懶煽情，因為都係你哋搞到我冇得做嘅啫！大家都知今時今日喺香港做個藝人係幾咁困難啦，大家對顏色嘅喜好唔同啫，冇得撈啦。『佢好鍾意黃色㗎，死咗呢條屍唔要發黑，要發黃呀！黃屍嚟㗎！黃屍華，冇得撈啦！佢就唔啦，佢襟撈呀，佢個人好憂鬱，好blue，變藍屍。』咁點解襟撈？有孝心，瀨阿爺吖嘛。瀨阿爺喎，仲唔係廿四孝之最？『阿爺早晨，你邊度痕？』」全場笑到肚痛！
想生存 扮色盲
「今時今日喺香港做藝人唯一生存機會係色盲，我都唔知黃同藍有咩分別， 黑同白我都唔係太清楚，彩虹我就分到，彩虹係咖啡色嘛，彩熊即係啤啤熊啫！識唱歌㗎嘛。今時今日係識唱歌嘅啤啤熊都死呀，係以前你唱歌勁就叫勁㗎啦，我叫做張國友呀，我係張國榮加張學友呀，王菲見到我因為我太勁，都要改姓，依家叫做張菲呀，我一人唱歌都未輸過，但係依家就輸俾一個，都唔知係咩人嚟㗎，爛口爛舌，佢唔係唱贏我呀，佢係喺上面唱我呀！
「梁振英係好嘢嚟嘅！」
「咁樣今時今日，我哋做一個藝人，搵食唯有咁，有老婆仔女，咁就唯有唔講嘢啦，但唔講嘢又講：『搵人仔…』乜你講到好似拐子佬咁喎，捉啲人仔當錢洗，咁所以我依家喺大陸搵嘅錢，我會同人解釋清楚，我唔係exactly係大陸搵嘅，我係過關嗰時搵嘅，我係一路過關一路唱：『做個勇敢中港人…』一地兩唱ok吖，你話一地兩唱OK，你又會冇得撈㗎喇。
「你唔生性又講一句：『梁振英係好嘢嚟嘅！』但係冇得連任，共產黨冇眼光啦，恭喜你喇，你邊度都唔使去喇，從此你嘅職業就係𠺘口，人哋返工你𠺘口就得喇，邊度都唔使去，依家做生意真係好困難。」
子華續說：「睇佢前面憎佢後面，唔係，係睇佢後面憎佢前面，我點知佢咩樣啫，佢睇籮友就知佢小器，兩股嘢夾實晒。喂，依家香港唔使睇喇，係聽到佢把聲，憎埋自己個friend。
以前係一竹篙打一船人，依家係一竹篙打最後一隻救生艇。『你隔籬沉咗喇，唔好理啦。』『嗰度有隻救生艇喎，個個咪黃子華！』之後扮普通話講：『你還看甚麼，叫我呀，叫救命呀！』由得佢，收工，有冇咁過份呀？你知唔知依家香港，係會恭祝人哋屋企死人，撞正生日仲有歌聽。」之後子華唱恭喜你今日個仔摺埋，晚上再恐死埋老竇，年年都有今日，你晚晚都要裝香，恭喜你。』
「人哋屋企死人，你恭喜佢，你有冇人性呀？社會上群起辯論，竟然係有得辯論，因為宜家辯論嘅邏輯變咗係，『希特拉死老母應否恭喜佢？』『希特拉X家鏟應否成為公眾假期呢？』咁邊個係希特拉呢？咁就睇吓你鍾意嘢顏色，暗角7警、暗角打鑊，冇可能係啱啩？」
暗角打鑊啱定唔啱？
「呢度完全冇人敢表態？你睇吓香港幾恐佈，呢啲不嬲日日報紙，個個發晒癲，但係入到場冇人敢表態？你哋醒目，因為我影低你哋。暗角7警、暗角打鑊認為啱嘅，拍吓手？(子華再問現場觀眾 )認為唔啱嘅？」全場即有不少人拍手。
「歷代嘅忠良，係俾啲狗官迫害」
子華說：「認為啱嗰啲，官都判埋喎，點解有得拗呢？歷代嘅忠良都係俾啲狗官迫害，打人就唔啱，岳飛咪唔啱，打人所以咪死囉，但係岳飛死之前，都有幾塊金牌喎！依家真係難分真與假，呢個社會真係…我喺街見到一幅對聯，你點演繹呢？佢寫住：『暗角7警執死雞、善用私刑龍咁威！』」
外母比喻佔中
「特焦（焦慮症）大爆發，你諗下喇，焦慮症崩潰，佔中嘅口號係乜嘢呀，係『用愛與和平佔領中環』，你要佔領人哋個女，你都唔可以咁樂觀啦，剩係得呢兩樣嘢，你都要約伯母出嚟飲茶，『你有咩即管問吖伯母！』，太古城，問我有冇，不如你問我有冇郭富城吖！
「我屋企有兩個figure，我有兩個呀，現金我係有嘅，不過依家月底呢……過幾日我又會再有，伯母不如你直接啲，我想同你個女結婚，我係有兩樣嘅，愛、和平。「我係唔搞嘢，你唔係咁都要考慮呀，一個人樂觀成咁，其實係一個焦慮症嘅反彈，真正嘅問題係呢個焦慮症要點醫，呢個焦慮症係點嚟㗎？呢數點計，係咪要計到鴉片戰爭咁遠？無論你點計，個問題係，香港已經大撕裂開始咗喇。點解決？唔知，因為呢啲嘢係從來未發生過。有人話，等如香港依家啲樓係咁升，冇得解決？no，香港啲樓係跌過㗎嘛！幾時？沙士。所以你依家想啲樓跌好容易，你去睇樓，你拖隻穿山甲去囉。」
「左手拖隻穿山甲，右手拖隻果子狸，睇你買邊層。然後最緊要搵個示範單位，搵個風口位，隊隻雞上去(扮吹屁股)，呢啲嘢發生過，我哋知點解決，香港大撕裂之前冇發生過，唔知道點解決。真係嘅！依家好簡單，阿強，同阿爺點解，我都唔知。阿強哥得罪咗阿爺！」
「嗱，阿強咁依家你即係當正湯唯啦阿強你係，咁你搵到你嘅梁朝偉未？『黐線，我點會搵個男人？我梗係搵個女人，西環有女人㗎嘛係咪呀？』『我真係唔係好熟，應該有嘅。咁你有冇諗住佔領邊個？』『都係嗰啲囉，5尺7、8吋高、唔好過30歲，29+1頂到盡，瓜子口臉，整過容都得，但要整得實淨，你知啦，調情呢家嘢，好激烈o架嘛。』「『阿強，如果真係畀你佔領到一個喇，你可唔可以話我聽你打算點？』阿強話：『我打算點？我打算長期打算，充份利用。』」
談警員被問候 「依家喺香港做警察你要好脾氣過教宗」
講到警察被人侮辱，子華說：「你唔會知我講乜，你唔好拍(掌)拍得咁快，可能唔係你想聽嘅嘢，點解叫『武』警？唔係武力個武，係伯母嘅母呀，因為依家香港做警察嘅首要條件，就係願意接受人哋問候呀伯母，我係網上睇條片有個警察抄牌，嗰個被抄嘅一分鐘問候咗佢60次，我哋正常人嘅語速係一秒講4粒字，啱啱好啦，X老母……，60次（全場拍掌），一秒鐘都冇嘥，當然有啲人會話警察係抵㗎啦，各位，大家仲記唔記得有本叫《查理周刊》呢《查理周刊》當年喺法國就取笑回教徒話（晚晚）發生恐襲，被恐襲，整死好多人，全世界都憲責、教宗當然都憲責啦，但教宗同時又講：「不過你成日問候我阿媽，我都會揼你個鼻㗎，即係呢，你依家喺香港做警察你要好脾氣過教宗，我可以想像到啊各位，依家警察喺學堂，最重要嘅訓練係乜嘢？企喺度！立正！FXXK YOU！FXXK your mother！FXXK FXXK FXXK FXXK FXXK！」
黑社會入侵影圈 黃子華：「5個電影老闆係幫會」
「92年等如香港黃金的水尾，依家好多年輕人好懷念香港黃金年代，即係由香港嘅70年到90年代，各位我嘅黃金年華就搭正喺香港黃金年代，咁即係大家懷念嘅係我…唔好叫我黃子華，叫我黃金華﹗嗰陣時黑社會有全世界最強勁公關…亞洲荷李活，香港嘅電影圈，我哋唔單止10套戲裏面有9套講黑社會，我哋10個電影老闆有5個就係幫會，我唔會叫佢哋黑社會，我叫幫會，因為好多都幫過我嘅！
其實10個裏面唔係得5個咁少㗎各位，其實10個裏面有成8個㗎，點解話得5個？因為有3個…死咗，仲係畀人打死咗，你有冇諗過你聽日唔使返工，唔係因為打風，係因為你老闆畀人打死咗，好彩冇人拍手，仲係畀對家個老闆打死咗喎，即係依家係講緊『麥當勞休息一天，因為肯德雞做咗嘢！』」
「香港最危險嘅職業係影評人…」
「香港最危險，我認為最勇武嘅職業係乜，就係影評人，你做馬評人呀、股評人呀，就算你累死人，你好少會聽到佢哋俾人打㗎喎，點解呀？因為你落咗注，無論係股票又好，隊個冧目，一嘢就落咗去㗎喎。但係你拍戲唔同喎，你拍戲係一個漫長嘅過程呀，我要日日用把槍指住呢個小器華，指到手指都抽筋，然後指指下我個細佬又俾啃德雞啃死咗，我要當睇唔到，然後我晚晚臨瞓前，舐下個雞籮柚，卧身嚐籮，然後我千辛萬苦，腥風血雨，拍完我呢部傑作，母女風雲食鴨棍，無錯你無聽錯，唔係食夾棍，係食鴨棍，剩係呢個名都收八千萬啦，依家就俾你條四眼仔影評人，一嚟就兩句說話：『小心入場…睇完會內傷…』」
喬裝者勿去靈堂
大家都知，子華其中一句金句係「卸妝認得你叫化妝﹐卸妝唔認得你叫喬裝」呢晚佢對喬裝，再有一番說明…
「你去到靈堂，你都會見到，『靈堂範圍，面斥不雅』，咩意思呢？你係可以鞠躬，但你真係唔好太喬裝，唔係你陣間瞻仰遺容時候，你個妝仲厚過佢，咁，依家都唔知邊個死咗，係唔係？講嚟講去，面斥不雅咩意思，無非好簡單，你知㗎，大家心裡面都有把尺嘅，你知道應該係點樣做㗎，唔使講到明，係咪？成個香港好似大嘅武館咁，上面寫住『切磋武藝，面斥不雅』，即係咩意思？即係講手，唔好拆祠堂，點解呀？因為你唔係拆卸公司，你係『一代宗師』，係唔係？唔係『一代乞兒』，面斥就不雅。」
「各位，喺香港嘅黃金年代，我哋去到一個境界係可以面斥不雅，全香港大街小巷，因為我哋大家練咗香港呢套內功：Jetso得嚟賑災，王晶得嚟家衛。佢既返幫會，同時亦都返教會，大家唔係聖人，但都唔係人……渣，『全球獨家 面斥不雅』。」
首場尾聲 喊住清唱
到尾聲時觀眾歡呼大嗌「除褲」、「唱歌」，子華亦叫大家繼續嗌，現場氣氛高漲，之後佢話：「呢啲時候好羨慕啲歌星，歌星唔使講乜嘢，唱多一首，我哋巨星收山一定唱一首歌，係咪，當然我哋巨星收山都復出﹗（全場歡呼）放心，我唔係巨星，我只係有啲觀眾緣，但係……我就係想唱歌，我唔單止想唱歌，仲想唱啲巨星唔會唱嘅歌，我要唱時代曲，仲要唱香港第一代時代曲，即係粵曲﹗死未﹗
我唔知有無人睇過，以前TVB有套劇情叫做《幻海奇情》，專講靈異、鬼馬、奇怪嘢，我呢首歌就叫《幻海奇情》，係清唱，OK？…勞碌半生，忙打拼，想係太平盛世…做個小明星，贏咗有粒糖，一輸乜都無剩，光陰已…（子華忍不住喊，拿出紙巾抹眼，觀眾大叫唔好喊）
唉！無用…人生在世真係需要正能量，幾多難關難過，講亦講唔清，我回首望，望住紅館，能夠與各位喺度歡樂一宵，都係屬於幻海…奇情﹗」子華清唱係晚上11點，正式完成首場棟篤笑。
圈中人紛朝聖
子華人緣極佳，睇頭場嘅圈中人勁多，包括子華神老友古巨基夫婦、黎耀祥一家三口、吳鎮宇、劉嘉玲、李嘉欣、蔡一傑、谷德昭同女友林子瑄、鄭中基、林子善夫婦、金燕玲，蘇絲黃、蘇永康夫婦、關心妍夫婦、蕭定一、鄺美雲，就連90歲嘅「仙姐」白雪仙都出山，同徒弟陳寶珠捧場。