被封「現代韋小寶」的鄧兆尊，多年來keep住「3C女友兵團」，女友三個夠晒數，早前與拍拖三年的骨妹三奶Claire分手，即有細十幾年的國產G奶中女補位，新歡L小姐姓陳又係C字頭，仲買大送細帶埋十幾歲的女孩進駐過氣三奶的灣仔後宮，三頭住家究竟點樣分配時間與金錢？
撰文、圖片：東方新地
鄧兆尊獨寵新歡 兩房爭風呷醋
53歲的鄧兆尊身形瘦削卻精力旺盛，多年來馭女有術能同時交三位女朋友，還經常一拖「3C女友團」出巡，早前他宣布與三奶Claire緣盡，其位置即由國產L小姐頂上，兆尊唔止公開承認新歡，仲話唔介意L小姐帶著十幾歲的女孩，總之緣份到就好好發展。對住熱情如火的新三奶，兆尊多年道行已失守，早前他被本刊記者影到與L小姐及一女孩去銅鑼灣shopping，二人行街不時打情罵俏，兆尊更慈父上身對女孩呵護備至，出錢出力幫手攞戰利品，又排隊買飲品侍候周到，對一大一細極之體貼，恃寵的L小姐全程展現風騷勝利笑容。
知情者評L小姐：「春情大爆發，成日用對G奶引誘兆尊⋯⋯」
在兆尊的調校下，舊3C女友兵團一直相處融洽，過去不時四人行，試過三個女友一齊病要入院，兆尊安排三人同住一間醫院，每日分時段陪女，唔會令任何一個唔開心，可惜新三奶L小姐的加入，令整個關係有所變化。據知L小姐恃住自己比正印Carmen及二奶車厘子年輕，再加上G奶激凸身材，對於兆尊來說，新鮮感與激情度同樣高企，知情者透露：「三個女人共侍一夫，話冇爭風呷醋就假，正印Carmen及二奶車厘子平分秋色三十年，後來多個三奶Claire開始各有怨言，到兆尊同Claire玩完L小姐加入，呢位國產女友春情大爆發，成日用對G奶引誘兆尊，佢依家得寵要乜有乜，仲唔有風駛盡𢃇咩？之前兆尊一個星期都會陪勻三個女友，依家成日都畀L小姐獨霸，另外嗰兩個敢怒不敢言，驚激嬲兆尊被踢走，真係斷米路㗎！」
鄧兆尊每月豪花20萬養三頭家
貴為新馬師曾長子，含住金鎖匙出世，但鄧兆尊揀女友條件唔一定有樣有身材，過去曾被網友指他愛「鋸扒」，正印Carmen與車厘子都是身材略胖姿色平庸，而新三奶L小姐的G奶更是青出於藍，為此兆尊早前接受訪問時笑言自己後生時都是識食之人，不過一個人去到某一個年紀，已經不是講愛情，是講感情，所以他絕對唔介意女友愈來愈肥。有指兆尊每月豪花20萬養三頭家，行宮更安排周到，除了正印Carmen與他同住永祥大廈，二奶三奶就分別住灣仔菲林明道同駱克道舊樓，行勻三頭家都唔使十分鐘，夠晒方便快捷。
要養三個女人真係唔易，除了要適當地分配時間，衣、食、住、行每月花費都唔少。兆尊堅稱唔會用錢箍女友，不過會定期發放家用，每次畀大筆錢（以十萬起跳）她們，當她們花光所有錢才可以再問他拎。