【搵食CONY】丫頭做老闆！嘻笑怒罵的台飲店攻港

你冇眼花，CONY的確係同前黑澀會美眉「丫頭」（詹子晴）合照。因為佢有份投資嘅台式飲品店攻到香港，昨日正式開幕，佢仲嚟咗做一日店長。唔講咁多，費事大家以為入錯咗娛樂版，即睇呢間台飲店有咩特色啦！

品牌名為「不要對我尖叫，日常茶間」，淨係聽個名都覺得玩味十足，雖然店舖裝潢走簡潔北歐風，但加埋由插畫師Norman.normal創作的醜美風logo，以及「喜好真誠，討厭諂媚，但我不說。」這冷嘲熱諷的slogan，提醒大家「活在當下的片刻 ，別因為社會化而成為表裡不一的人。」品牌嘗試將飲品與生活態度掛勾，加埋明星效應，成個package令品牌迅速走紅，冇諗過仲咁快嚟到香港。

雖然話品牌強調生活態度，但飲品都有特色。不賣近期最hit的黑糖珍奶，招牌產品「冬瓜菊花」，以杭菊製作菊花水，配搭自家製冬瓜露，飲落唔會死甜，好解渴同感覺清新。

台飲店又點少得奶茶？呢度嘅奶茶以鮮奶製作，仲有多款少見口味，例如桂花鮮奶茶、青草鮮奶茶及玫瑰鮮奶茶，可以另加配料如白玉珍珠或地瓜芋圓。另外，品牌又有推出氣泡飲，適合喜歡感覺清爽的朋友，配搭爆漿珍珠增加口感，亦十分搭調。知道大家都鍾意打卡，所以飲品大多都有漸層效果，店員都會提醒返大家記得拌勻先好飲。

不要對我尖叫，日常茶間
地址：中環擺花街23號