沈鵬曾經係一個獲判終生監禁嘅殺人犯，做齊「嫖賭淫蕩吹」，佢喺節目入面都以窮凶極惡嚟形容自己。佢喺1997年喺英國獲假釋，番返香港。
富二代生活糜爛 聲色犬馬
沈鵬家境非常富裕，爸爸經營珠寶生意，喺半島酒店、香港酒店，甚至美國都有生意。不過佢係二奶仔，難聽啲講即係私生子。
爸爸不斷做生意搵錢，媽咪就周圍應酬、賭錢，所以從小缺乏家庭關注同照顧。14歲前仲係on居居，15歲先小學畢業（喺監獄先知，自己有讀寫障礙）。就喺佢15、6歲就已經去舞廳、色情場所（俗稱：魚蛋檔）。群埋一班黑社會，黑社會因為知道佢嘅身分勢力，就自然多人識，得閒就同人開片，佢就負責響朵。
佢有個細佬喺英國讀書。有一日佢爸爸就叫咗佢坐低傾。佢爸爸就同佢講：「其實我都唔想送你出國，我覺得好晒錢！不過當搏下～」佢嗰時心諗「當遊埠」囉～但去到英國，佢番咗幾日學就冇番！
因為生活苦悶，染賭癮！（店舖好早關晒，睇電影又睇晒！開得最長時間嘅就喺Casino賭場）有一次，輸咗幾百鎊，唔忿氣，要攞番，咁就出事！
佢決心返工！但佢返工唔係為咗還債，佢當時根本唔洗攤大手板問人借，只要開句聲就好多人借錢比佢，因為佢地覺得一定有得還！佢返工就係想戒賭癮！
返工嘅老闆Robert好信任佢，但都幫唔到佢戒賭！之後有次同朋友喺酒吧吹水，講起打劫好易，就由佢「扑槌」打劫！
唔熟唔食 打劫殺人
當年係1981年，佢本身仲有2個朋友一齊，有一個就臨時甩底。佢另一個FD就喺佢打劫前，同佢講咗一句：「整間攞完錢，還完債，即走！我一個仙都唔要！」
但沈鵬補充話：「老闆娘好好人，冇人喺佢屋企住過！我係第一個！」
主持區錦棠問：「點解要揀自己人？你唔覺得忘恩負義？」佢答：係！但嗰時唔諗咁多，只係想解決問題（欠債）。
最後佢偷咗現金千幾鎊，拎埋自己媽媽放低嘅首飾～
本身拎完走得，點知一打開大門就見到女房東11歲嘅女（Elaine)
當時唔知點做，本身冇諗住殺人，但佢不斷喺到鬧：「我媽咪幾錫你…….」
之後佢就同同黨講：「扑暈佢走啦！」沈鵬話：「我以為睇粵語長片咁，一扑就暈！」
當時拎左張凳仔扑佢，點知，一扑佢就大叫，嗰刻好似好多10幾年嘅影片喺個腦到走出嚟，但同時隻手就不斷扑！扑到佢唔識嗌！本身可以當失咗理性，但之後就開始陰毒喇！
「我唔可以話我好錫佢，但都當佢係妹妹咁，周圍帶佢去玩～」沈鵬開始面對唔到自己：「又偷人嘢，Auntie又對我咁好！」「我唔想比人知，亦唔敢比人知！」突然間就生咗惡念：把心一橫殺人放火！
望到條電話線，就蚊咗過嚟，cool 住佢條頸，然後比條線同黨，一人一頭！
女房東作供表面插佢 實際幫佢
上庭作供嘅時候，「佢就喺我前面，我唔敢面對佢！」女房東以德報怨，作供時自己額外加多咗句：「Elaine唔鍾意佢！」街外人都以為女房東插緊佢，但佢知道，女房東係幫緊佢。如果佢話elaine 好鍾意佢，就會令個官覺得佢更衰！
坐監曾被雞姦、被人用圓規刺背險終生癱瘓
佢講番以前坐監嘅時候同一個囚犯行得好埋，其他囚犯話：「嗰個人曾經喺監獄殺人，仲劏開人哋個腦，係一個變態犯！」但佢冇聽，之後就比呢個變態犯雞姦。
又有一次，佢畀其他犯人用圓規刺背！「本身只係痛，半個鐘後就癱咗，郁唔到！醫生同佢講，「你都算好彩，再過多半釐米，你就會終生殘廢！」
呢件事之後，佢望住本聖經，覺得好苦涰，喺度諗：「點解要做好人！」所以對住天花板發誓，「從此唔做好人！佢哋踢我一腳，我要還番佢哋10腳！」
佢再講：「最痛嘅唔係傷口，而係『腦』！要鬥智鬥力，佢行到邊，跟到邊！仲慘過我捅番佢轉頭！」
搖身變大毒梟 再遇仇人
開頭比人利用帶毒品，但後來覺得有利可圖，跛豪係佢當時嘅偶像！
之後遇番搵人捅我幾刀嘅嗰個人，但係我做緊大生意，我就好有風度行上前同佢握手！點知幾日後，有嘅第二個監獄之前嘅朋友同我講：「佢買咗兩條友隊冧你！」佢話：我幫你搞掂佢！我即刻話：「唔洗！佢係我咖！我要比佢知，我唔再係10年前嗰條?仔！」
沈鵬就話：「我翻到去即刻磨刀摩叉，磨晒所有架生，因為佢高我成個頭！我諗住聽日佢一定死梗！插到佢箭豬咁！」
佢自嘲話：「雖然我做咗好多壞事，但每一朝都跪喺到祈禱！」佢話佢想上帝祈禱，係因為相信奇蹟。祈禱內容係：「如果你可以以唔見血嘅方式解決成件事，就交比你！但唔得嘅話，佢就一定嚟見你！」
祈完禱，本身已經放低晒啲刀槍，點知一開門就見到佢！「我即刻拎起個玻璃杯扑落佢到，再抆落佢塊面到！我要所有人知，得罪我嘅人，後果就係咁！」
最後沈鵬總結佢嘅犯罪人生：「喺我角度，我冇嘢欠社會，I Paid，我已經坐咗15年監，我還晒咖啦！但對於嗰家人嚟講，我永遠都還唔晒！」「最痛苦嘅懲罰唔係你坐監，而係當你清醒過來，你知道曾經做過啲咩嘅罪疚感跟你一世，撇唔甩！」
依家嘅佢，因為一位外籍女士，真正有咗信仰，喺1997年假釋番香港，仲成為咗一位牧師！
P.S：內容純屬沈鵬個人經歷，切勿模仿！
資料來源：ViuTV
Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）