容祖兒（Joey）《PRETTY CRAZY》紅館演唱會第11場請來了古天樂（古仔）做嘉賓。在古仔未出場前，Joey大賣關子要大家齊估是誰，「今日到底係邊個好呢？呢一位係男神嚟㗎，我相信全香港冇人唔鍾意佢嘅！佢由細到大都好錫我！佢曾經喺我演唱會擔任過一次嘉賓。」之後更希望歌迷一齊做動作迎接古仔：「音樂一起，大家喺適當嘅時間一齊做一個動作。」Joey示範了《今期流行》的「拜神舞」動作，導致全場即時瘋狂起哄，更響起《今期流行》歌曲音樂，隨後，古仔現身和Joey大唱《今期流行》，歌迷「叫到拆天」。
唱完後，Joey說：「我第十一場表演嘉賓古天樂，真係癲倒眾生呀！」古仔就話自己是帶病上陣，也是第一次live唱《今期流行》。Joey說：「係呀，佢呢輩子未現場演繹過呢首經典金曲。你真係好錫我呀你，你係咪前世欠咗我㗎？」Joey更問古仔：「你記唔記得你好多好多年前你做過我演唱會嘉賓㗎？」古仔笑著回答：「你當我老人癡呆症喎，我以前同你影過張相嘛。」Joey更調皮取笑古仔「係呀，嗰陣時你好白嘅，但你依家都唔係好黑。」他們之後就回憶過往，古天樂就表示：「你嗰陣時同你阿媽去電視台。」Joey就話：「你嗰陣時仲喺電視台度拍緊劇嘅，咁我就鼠咗入電視城度，竟然畀我撞到你喎！咁我梗係唔會放過呢個機會啦，就係呢一張相呀，就畀我溝掂咗你啦！」其後，笑着解釋只是開玩笑，自己當然不敢。
古仔之後就投訴稱「谷鬼氣」，不想戴ear mon，會聽唔到現場的聲音。Joey驚訝大呼：「唔係啊嘛！唔通今日啲觀眾太熱烈喇！」古仔否認稱，想唱多次《今期流行》呀！Joey聞言便愕然話：「你真係好鍾意唱歌喎！」古仔望著Joey就表示，驚over run？你點都加多了一場啦。Joey回答，唔驚，會給他唱埋落去都仲得。二人再次大唱大跳《今期流行》，將氣氛推到最高峰，歌迷尖叫連連。
唱完後，Joey見到古仔上氣不接下氣就說：「抖一抖先啦，最受歡迎男歌手！」無抖的古仔竟然表示要玩遊戲，誰叫得大聲就可以上台與他們合照，再將氣氛推至更高。Joey就說：「向來都知道古天樂人好好，佢雖然外表好似好惡，但內心就好善良，但佢史無前例咁搶我個台啲咪講嘢，又搶埋啲觀眾上台！」其後，古仔當然不理她，與歌迷玩起遊戲，最後選了3個歌迷上台合照。之後，古仔想走人，Joey當然不肯，「你咁鍾意唱歌，你唱多首啦！」古仔就和Joey合唱完《男朋友》才離開。