陳柏宇Jason 一向想法多多。近日他接受新挑戰，首次擔任新歌〈七折〉MV的導演。〈七折〉是結合 Wyman 的貼地歌詞以及 Cousin Fung 的曲，由Jason 唱出男女對愛情的自愛愛情觀。監製 Edward Chan表示：「Cousin 的旋律向來優美，本來已做到耐聽的感覺，但 Wyman 寫詞時用上的一些韻是Jason 較少唱的，所以我與Jason 便刻意研究〈七折〉的唱法，特別是尾音的演繹，好等 Jason 突出歌詞那份晦氣感覺之餘，也增加歌曲的個性。」
做歌手或演員時被人「導」得多，今次首次要擔起重任去執導，Jason坦言心情很迷惘。他直言：「以往做演員時，有時會唔明導演嘅要求，點解要咁演？到自己執導時，有時知道自己想要乜嘢，但唔知點樣拍到或表達出嚟，所以係超級迷惘。」幸好，與 Jason合作無間的 MV導演阿權今次全力支持他，給他不同意見和支持，又給予Jaso很大的自由度。Jason說：「其實都幾開心，因為可以自己話事，阿權又好配合，佢俾咗好多信心我，可以從自己嘅視覺去做，尤其是當做到嘅時候，係好開心嘅！」
雖然Jason 以看似輕鬆的心情對待，但他的準備功夫做到足。由MV 的構思、籌備到拍攝，Jason 都親力親為。由於歌詞展示晦氣的感覺，所有MV 也帶點暗黑感。在悲情的故事中，加插多場複雜的內心戲。今次更邀請周俊偉及蔣祖曼兩位專業演員，來為 Jason演繹故事。周俊偉在MV 中飾演陪伴女友走過悲傷、但自己卻走不出陰霾的角色。他坦言今次的演繹有一定的難度，周俊偉說：「因為個故仔講發生咗件事，觸動到我傷心處時，因為唔會有太多動作同劇情去交代，所以我要靠表情同情緒上嘅爆發去表達角色，係比較內心啲嘅戲。」
提到最難忘的一場戲，周俊偉坦言是浸進浴缸的一幕，他說：「好難！因為要拍到要一個好靚嘅浸落浴缸嘅鏡頭，啲水一定會入到鼻，一定會嗆到，我其實飲咗幾啖水，好想即刻衝返出嚟，但係死都喺水底度忍住。」他又笑言今次拍攝的過程很愉快，除了曾多次合作的蔣祖曼做拍檔之外，還因為 MV 中可以演出不同的感情，有很多內心戲讓他發揮。
被問到對新晉導演 Jason 的評價，蔣祖曼笑言以前曾在一套劇集中與Jason 合作過，看到他以「演員」和「導演」兩個身份的不同表現。蔣祖曼透露：「就咁睇現場嘅 Jason，已經覺得佢非常認真，如果你平時認識佢個人，就更加覺得佢今次係極度超級認真！未見過佢講咁少嘢嘅，哈哈：以前同佢拍過一套劇集，嗰陣時佢成日掛住玩，被導演鬧，今日到我喺現場見到佢，我忍唔住笑佢『你都有今日喇！』我好想影低 Jason 張相，再send 俾我哋當日個導演睇。不過其實我都有同Jason 傾過，佢個樣雖然好苦惱，但佢其實好enjoy 同好開心。」
至於周俊偉則說：「我覺得Jason 係一個非常非常之認真嘅人，我見佢拍攝嘅過程當中都不斷地去思考，每一個擺機位、每一個想要表達嘅情感，佢都好認真咁去思考、去微調，其實佢都清楚自己想要啲咩，只要跟住佢嘅引導，其實都好容易可以get 到佢希望要嗰種情感。」周俊偉更提議Jason 可以考慮拍一套戲。
而Jason 可以嘗試新角色，他笑言全因老闆放膽讓他嘗試。對於未來會否再執導，Jason 表示有興趣：「如果真係有機會，我諗我暫時會鍾意拍一啲有故事性嘅嘢，拍MV 始終有啲難，因為入面可以包含一啲唔係故事內容嘅嘢，例如有啲係氣氛烘托啲嘅，但我又未必知道件事要點樣做，我諗嘅時候都辛苦㗎！但如果是拍短篇故事的話，可能會容易啲，下次可以試吓。」