張致恒細仔滿月 雯雯長文多謝老公

張致恒(Steven)的細仔張天牧日前滿月，他與太太雯雯準備了一個蛋糕及紅雞蛋，一家四口留在家中慶祝，十分溫馨。Steven留言說︰「話咁快就滿月啦，呢一個月日以繼夜咁樣湊佢，雖然真係好攰，但係湊仔嘅時間好滿足，望住佢哋兩個嘅樣就覺得人生咩都冇曬都得，但係冇咗佢哋就唔得（當然係包括老婆啦）！」

Steven因為被揭一腳踏五腳，搞到形象插水，為了養妻活兒，於是做散工賺取收入，早前更有指他投身地產行業。今日太太在社交平台有感而發，大讚Steven是個好老公，十分愛錫家庭，並指在這段人生低潮中見盡人情冷暖。雯雯寫道︰「呢個世界就係好現實，你有本事你風光嘅時候大把人會埋身，但係當你衰到貼地跌落谷底嘅時候，就算識咗幾耐幾好朋友都會遠離自己，好似覺得會影衰自己咁……坦白講有邊個會鍾意不停去求人幫忙？唔係去到絕路冇辦法都一定唔會選擇行呢條路，但係世界上太多冷血同絕情嘅人，就算唔幫忙都要趕盡殺絕。」

她在文中更表明「論依家條路有幾難行，就算只係食好普通嘅餸菜， 有幾多人睇死我哋呢個家庭，為咗兩個小朋友我哋一定唔會放棄。」並向老公承諾︰「無論咩環境咩處境……你就係你……我選擇得戴呢隻戒指，就唔會放棄，我會喺度。」