香港樂壇，再創潮流
好多人都成日緬懷香港樂壇廣東歌嘅黃金年代，話而家已經今非昔比，但係事實並唔係咁嘅！想當年四大天王仲係新人，又有邊個諗到佢哋會紅遍全球呢？我哋會有重古輕今、貴遠賤近嘅心態，或者係因為少咗留意香港樂壇嘅新力軍。呢批新世代，或者呢一刻並未大放光彩，但以佢哋嘅才華，好快就會有所作為。長江後浪推前浪，一代新人勝舊人，今日就等DailyView用網路大數據話你知，2019年度嘅最多人留意嘅十大樂壇個人新星係邊個喇！
DV小教室：網路溫度計透過《KEYPO大數據關鍵引擎》，觀測、爬梳港澳地區近萬個網站、頻道，其中包括新聞頻道、各大討論區、FB、IG以及Blog，從中取得資料樣本數，並以AI語意程式作數據分析。「網路熱度」為主題項目相關的網路posts和comments ，數值愈大代表主題項目的討論度愈高。
NO.10 劉子碩
——離開有甚麼可怕
劉子碩 Zac，十位超新星之中，佢係最特別嘅！點解咁講？皆因佢唔係香港人，遠從台灣嚟到香港發展，認真唔簡單！劉子碩一直對演藝事業有興趣，曾經參加台灣節目《我要當歌手2》，其後喺拍攝《反斗紅星冇暑假 嘩鬼上學去》時俾吳若希發掘，2018年仲決定嚟香港發展。2019年8月，推出《離開有甚麼可怕》首支單曲，唱廣東話，字正腔圓，網民個個聽完都力讚。
網民：「第一次聽佢個名，上wiki望下佢幾多歲先知原來佢係台灣人，嚟咗香港冇耐。啲廣東話好標準，應該落咗好多苦功。」
image source:
NO.9 涂毓麟
——二人一世界
涂毓麟 Oscar，2018年，佢參加咗《全民造星》，喺呢個節目之中嘅演出，引嚟唔少人嘅關注。好多人都力讚佢形象討好，態度唔錯，而且精通各種樂器，有「鋼琴王子」嘅綽號。佢咁有潛力，難怪成為參賽者之中最快推出單曲嘅人喇！《二人一世界》呢首歌，一出台即刻引嚟關注，雖然網民認為佢仲有唔少空間可以改善，但一致認為佢係可造之材，努力落去會係明日之星！
網民：「曲係幾好聽，但唱腔有啲old school，咬字要改改啦怪怪地聽落唔順耳，但形象幾討好，Oscar要加油呀。」
image source:
NO.8 施匡翹
——初心
施匡翹 Zaina，目前係香港歌手、模特兒、電影及廣告特約演員，認真多才多藝。最近，佢先勇奪新城「勁爆劇場版歌曲獎」，亦都喺新城開始播出廣播劇，一再證明呢位超新星嘅魅力。2019年9月，施匡翹推出首支單曲《初心》，以歌表心聲，講出自己追求夢想嘅諗法，網民聽完都話感受到佢份熱情，話好鬼勵志喎！首歌出咗無耐，已經突破咗十萬點擊，真係難能可貴。
網民：「天地有正氣，我有我的初心！聽完呢首歌，超感動！希望再聽到你下一首歌，勿忘初心，我實會支持你，加油！」
image source:
NO.7 陳凱詠
——想突然
陳凱詠 Jace，又有個綽號叫做「九碗飯」。點解叫「九碗飯」？佢自己好玩得咁解釋，話同譚詠麟吃飯，見到好多嘢未食晒，於是一口氣食晒，話自己有次吃咗九碗飯，所以有呢個綽號喎。陳凱詠外向玩得，多才多藝，主播、演戲同唱歌都咁叻，2019嘅新歌《想突然》，仲要好受網民歡迎！《想突然》唔係一般唱歌咁易，入面仲有RAP，配合埋佢嘅皮褸造型，真係襯到絕一絕呀！
網民：「好中意個mv，拍攝團隊一定落足功夫！好高汁既一個mv 2019必火！著皮褸著得好睇既女仔特別有魅力！」
image source:
NO.6 李靖筠
——第三顆行星
文青系美少女歌手，李靖筠 Gladys，最初出道係喺ViuTV《三一如三》 入面飾演「阿花」一角，當時佢出色嘅演技，已經吸引好多留意呢位新人。其後佢喺各個電視台都有演出，電影、綜藝節目以至MV都有佢份，經驗十足。2019年，多才多藝嘅佢仲殺入樂壇，乍一出道已經勇奪新城「勁爆新人獎」。其中《第三顆行星》一曲，佢唱出太空嘅動人美麗，清新嘅歌喉，網民當然力讚喇！
網民：「好好聽啊！好啱邊聽呢隻歌邊嘆杯咖啡，支持Gladys!估唔到你會出道做歌手，把聲好好聽 ，好fresh。」
image source:
NO.5 林家謙
——下一位前度
林家謙 Terence，一位充滿才華嘅唱作人，唔單止喺台前唱得，仲要連音樂創作都相當出色。佢主要創作粵語及華語流行曲，代表作有林宥嘉嘅《壞與更壞》及《飛》、張敬軒的《潛水》、楊千嬅的《余春嬌》等，首首都深入民心。2019年，林家謙以獨立歌手身分發表首支自己作曲、編曲、監制同主唱嘅單曲《下一位前度》，即刻打入各大流行榜，成為多個音樂平台下載次數最高嘅歌曲。
網民：「暫時係近年聽過最有個人唱風同埋有好特別唱法嘅歌，聽得好舒服，超越普通流行曲嘅水準，期待你嘅新歌，正！」
image source:
NO.4 陳卓賢
——另一個諾貝爾
陳卓賢 Ian Chan，香港超新星之中，佢最有陽光魅力！陳卓賢係做歌手之前，其實本身係一位運動員，為前香港男子排球隊代表及甲一球隊南華成員。2018年，佢參加《全民造星》獲得亞軍，成為男團MIRROR其中一員，正式出道。陳卓賢至今已經出咗兩首單曲，其中《另一個諾貝爾》，以溫柔嘅聲線唱出動人嘅愛情故事，引嚟眾多網民嘅共鳴。好多人都話，聽完首歌已經即刻圈粉咗！
網民：「lan 的歌聲有種說故事的感覺，這首歌他唱出那種傷感沉重的心情，期待你有更多唔同的曲風同演繹，加油！」
image source:
NO.3 姜濤
——亞特蘭提斯
可能係全香港新生代嘅多女Fans嘅超新星，姜濤，以佢俊俏嘅外表，出色嘅聲線，高質嘅演出，令好多人對佢為之傾倒。呢種情況，香港樂壇已經好多年未見過喇！自從姜濤喺《全民造星》勇奪冠軍，以男團MIRROR出道，更喺2019年6月推出首支單曲《一號種籽》，大受歡迎。而第二首《亞特蘭提斯》，更加突破三十七萬點擊！姜濤喺香港少女心中，正係消失已久嘅秘景，魅力十足。
網民：「希望有多D姜濤的SOLO作品，ViuTV唔好浪費一位咁優秀既人材！相信外間會對姜濤呢位小伙子虎視眈眈！」
image source:
NO.2 謝東閔
——得失一笑中
謝東閔 Brian，參加過多個歌唱比賽，取得無數佳績，多番嘅磨練，加入TVB，亦都造就咗出色嘅演出技巧，吸引咗唔少Fans。謝東閔2010年參加TVB歌唱選秀節目《超級巨聲2》，喺眾多人之中取得第四名。2013年，佢喺TVB全球華人新秀歌唱大賽進入16強，表現不俗。謝東閔今年主唱劇集《倚天屠龍記》主題曲《得失一笑中》，好多網民都力讚佢歌得唔錯，期待佢唱更多歌。
網民：「好好聽，好鍾意Brian嘅聲線，已經狂Loop咗幾日喇！我支持你，好好加油！」
image source:
NO.1 林穎彤
——忽然又想起你
林穎彤 Bella，由細細個開始，已經歌藝、演技出色，喺亞洲電視電視劇《萬家燈火》做童星，又推出過兒歌唱片，喺香港、大陸嘅商場都有演出過。2006年，參加雜誌《Yes!》嘅校花校草選舉，勇奪甜美校花獎及才藝大獎。其後加入咗TVB，拍劇做節目都好有觀眾緣。2019年，佢出咗新歌《忽然又想起你》，重出樂壇，勁多人都話林穎彤人靚聲甜，會成為未來嘅香港天后！
網民：「星夢唔好再浪費資源啦，捧Bella好過啦，好有新鮮感啊！人靚聲甜，加油啊Bella！」
image source:
【以上圖文為香港網路溫度計調查結果，未經授權請勿轉載、改寫】
分析說明：
本研究資料由《KEYPO大數據關鍵引擎》提供，分析時間範圍為2019年01月01日至2019年12月20日。
網路大數據系統觀測港澳地區上萬個網站頻道，包括新聞頻道、Facebook、Instagram及各大討論區、BLOG等，針對討論『2019年香港樂壇新人』相關文本進行分析，並根據網友就該議題之討論，作為本分析依據。
本文分析之結果，非參考投票、民調、網路問卷等資料，名次僅代表網路討論熱度大小，不代表網友正負評價。
𝕮ɧཞıʂ༉🐾🐾🐈🐱 吓！？？爆紅？如果唔係bella同謝東閔tvb, 我都唔識
2019年12月23日06:04
顯示全部