鐵漢亦有柔情一面， 73歲鼎爺李家鼎，近年已經收晒火，全因被賢淑女友「李師奶」融化，早年遇上第二春，鼎爺對住女友即變小綿羊，躁火已成過去式。日前就孖實女友及其女兒與孫女歎茶享受家庭樂，平日剛烈的鼎爺慈祥公公上身，拖實哎吔孫女有講有笑，拍拖湊孫溫情洋溢，另一日鼎爺又有細仔泳豪陪按腳，盡享兒孫福！
撰文、圖片：東方新地
李家鼎遇第二春 火爆性格一去不返
老來不單事業行運，鼎爺感情生活一樣甜蜜，94年同施明離婚後，早年遇上第二春，現年年約60歲的鼎爺女友「李師奶」，外表斯文打扮樸實，同鼎爺一樣經歷過一段失敗婚姻，同是天涯淪落人，也因此二人能互相遷就體諒，鼎爺更被女友溫柔融化，火爆性格一去不返。
據知情者透露：「鼎爺以前脾氣好火爆，講嘢又粗聲粗氣，但自從同咗女友一齊，佢成個變晒，你睇佢主持《阿爺廚房》，有時畀拍檔阿譚（譚玉瑛）窒一句，佢都唔上火就知，對住女友講嘢更加陰聲細氣，連粗口都冇講，鼎爺女友好賢淑，對佢簡直千依百順，鼎爺話乜就乜，呢個女人陪鼎爺捱過低潮，嗰時鼎爺發展唔順利，女友畀咗好多鼓勵支持佢，所以近年鼎爺事業行 運，對女友更加珍惜，雖然冇再婚打算，但鼎爺早就當女 友係老婆，見親朋友都叫『我老婆』、『我女人』咁，兩個 仔亦好接受阿爸呢段新關係，一家人相處融洽！」
一個人擔起兩頭家 鼎爺享受教仔湊孫
一個人擔起兩頭家，鼎爺近年亦搵得就搵，除咗幕前演出，私房菜生意亦親力親為，同女友更好有默契，經常夫唱婦隨，女友不時陪鼎爺入電視城開工，又會落私房菜館幫手打點，幾年前女友做咗外婆，鼎爺更視女友孫女如親孫女一樣愛錫，一得閒便弄孫為樂。趁著新年假期，鼎爺忙完工作即把握時間陪家人共敍天倫。
日前，鼎爺就孖住女友與女友家人歎茶，當日鼎爺駕車載同女友由西貢寓所出發，鼎爺先到太子搵朋友攞嘢，之後將車泊到女友寓所停車場，然後同女友步行去附近的仕德福酒店，拍拖十多年感覺有如老夫老妻，雖然說話不多但好有默契，到達酒店內的酒樓，原來女友的女兒及孫女早已在內等候，孫女還著住校服相信是剛剛放學，鼎爺和女友更一左一右貼實孫女坐，不時夾嘢食給孫女照顧周到，同平日火爆性格大相逕庭。另一日，鼎爺則同細仔泳豪到九龍城按腳，然後去茶餐廳醫肚，曾話過最自豪就係教出兩個乖仔的鼎爺，吃飯期間對住泳豪講到口沫橫飛，難得畀阿爸哦足全程的泳豪，一直聽得入神冇反駁，嚴父出孝子，鼎爺果然教仔有方！
