Love is Love！現年44歲的男歌手小肥（徐智勇），過往曾經被多次質疑性取向。有媒體披露日前小肥接受陳志雲Youtube頻道節目《Stephen．傾》訪問時，終於承認同性戀者身份，終於公開出櫃。不少粉絲在社交媒體祝福小肥，而小肥亦簡單回應，指自己仍然感到緊張，「但我自豪」。
入行多年的小肥，早年因為在社交網站關注多位肌肉男，而一度被網民質疑是同性戀者，不過當時他極力否認，指自己不是男同志但不會歧視男同志。惟日前接受陳志雲節目訪問時，被對方問及多年一直被許多媒體問及是否喜歡男人，面對問題他會如何反應時，小肥支吾一輪突然承認出櫃，「未準備好，其實一路都驚，心裏面有啲負擔……我其實到28歲先確定某啲嘢，28年，我都一直否定緊自己某啲嘢，習慣咗，同埋一個恐懼，自己都驚咗，如果承認咗某啲嘢會點呢？」後來陳志雲再追問是否承認自己的性取向，小肥直認不諱點頭回答「係呀。」更指被自己突然其來的直接嚇了一跳，手足無措「我未……點講呀，我未準備好去面對，未行第一步，第一步畀咗你。」小肥失笑：「你真係大師，回想起2017年，如果真係有人問到我，我點呢？我其他都耍走佢，唔知點解你一問我，我覺得好似係時候要行呢一步。」
談及2017年製作專輯《睡前服》時，監製康家俊就曾指主題是「坦白」，小肥聽到後覺得應該為自己唱的歌帶出一點意思，哽咽回答「佢哋都有問我，如果他朝一日，記者再問你會點呢？」，他沉思一會，道出答案：「我想坦白，但係好難衝破，唔知點解。」節目中陳志雲又問了他過往的情史，以及在娛樂圈如何認識伴侶的事情。節目將會在今晚播出。消息傳出不少人到小肥的社交媒體上送上祝福，他簡單回應指「驚魂未定⋯⋯嚇親大家，唔好意思。仲好緊張，但我自豪」，更附上幾個代表性別少數群體（LGBT）的彩虹圖案。圈中好友陳慧敏、方力申等都留言支持。
Follow she.com on Facebook & Instagram
