16年同羅仲謙結婚已不設防努力造人的楊怡，一直恨做媽媽，為了趕生B更停工兩年養身，終於在40歲迎來好消息，楊怡夫婦日前便透過社交網開心報喜，公布喜訊後，謙謙獨自外出做健身，更透露BB預產期在五月底。一直將楊怡寵上天的謙謙，老婆陀金叵羅後緊張得貼身照顧周到，出 入陪到實， 老婆做家中女王，老婆話一佢唔敢話二，二月中再度投入拍攝新劇《陀槍師姐2020》的他，撞啱新型肺炎疫情下開工，更加嚴陣以待。據悉楊怡為安全至上，全面監控老公做足防疫保護，保護措施多不勝數，除咗要謙謙拍完劇返家要即時除鞋、換晒衫褲先入屋，並第一時間沖涼，還禁止親友到訪，就連家姐楊卓娜都不例外，以防掛一漏萬，近日更隔離老公分房瞓，高度戒備全面保護腹中心肝寶貝！
撰文、圖片：東方新地
楊怡IG晒超聲波相報喜
久未有公開露面的楊怡，近半年在社交網po相幾乎見樣不見身，原來踏入40歲的她已造人成功，始終屬高齡產婦，陀上金叵羅的她既興奮又緊張，為免BB小器，依足傳統未到三個月全面封嘴，即使家姐楊卓娜，亦在BB滿三個月後才得知喜訊，對身邊好友更加秘而不宣。 直至近日，已經陀B六個月步入穩定期，楊怡終於放心報喜，日前同老公謙謙透過社交網公布升任新手爸媽的喜訊，更以小小電燈膽形容腹中寶貝，又表示第一次聽BB心跳聲感覺如同火車經過，似乎甚麼都令她新鮮難忘。楊怡留言表示：「從今以後⋯我們多了一個身份！寶貝，願你在未來的日子裡時刻照亮我們的生命，願我們在未來的日子裡幸福快樂！謝謝你選擇了我們。」
禁親友到訪家姐卓娜都無情講
高齡陀B撞正新型肺炎肆虐，向來衞生意識高的楊怡更變緊張媽媽，陀B後寓所已成禁地，除雙方父母，嚴禁親友到訪。據知情者透露：「始終40歲高齡先至陀B，阿怡知道有咗之後好緊張，雖然好開心好想同人分享，但因為怕 BB小器，忍口忍得好辛苦，只係講咗畀兩邊嘅父母知道，就連家姐卓娜都係知道無耐，而且呢排武漢肺炎肆虐，佢怕畀人帶細菌入屋企，立即下禁令，由一月開始，已經唔准人去佢哋屋企，就連拜年都唔可以，陀B之後，卓娜都係去過細妹屋企一次，其餘時間兩個都只係通電話，卓娜好明白細妹嘅憂慮，不過都有叫阿怡放鬆心情，唔好畀咁大壓力自己，又同細妹分享咗好多自己嘅養胎 心得，等阿怡有多啲心理準備。」
雖高齡陀B但妊娠反應少
早已是寵妻號的謙謙，婚後對老婆愛錫繼續升級，老婆陀住金叵羅更成家中女王，家裡大小決定都交畀老婆全權話事。據知情者透露：「過年嗰陣都有唔少朋友話想去佢哋屋企拜年，謙謙都聽老婆話全部推晒！總之最緊要阿怡安心，佢好緊張老婆健康，成日會提住老婆要多啲休息，雖然依家肺炎問題，被迫要減少外出，但孕婦始終要做一啲輕度運動，生BB時會舒服啲，生完身體亦會復原得快啲，所以謙謙呢排會陪阿怡喺屋苑內散步同做伸展， keep住一定運動量，好彩陀B以嚟，阿怡冇乜孕婦不適同嘔吐，算係陀得幾舒服。」
同羅仲謙分房瞓 製造無菌養胎空間
剛完成劇集《木棘証人》，當旺人爸羅仲謙，近日又要投入拍攝新劇《陀槍師姐2020 》，不過在疫情下開工，謙謙亦不敢掉以輕心，楊怡每天亦會為老公準備防疫用品外出拍劇。據知情者透露：「依家陀住BB，阿怡更加緊張，謙謙開始開新劇，無論拍廠景定外景，周圍都好多菌，阿怡擔心老公，依家每日都會為謙謙準備好多防疫用品，好似口罩、搓手液同消毒紙巾咁，仲成日提醒謙謙喺外邊做嘢一定要小心，就算休息時間都一定要記得戴番口罩，謙謙拍完劇返屋企仲大陣仗，要消毒全身除鞋，換晒衫褲先畀入屋，更加要第一時間去沖涼，她亦吩咐工人姐姐喺屋企密密做消毒同清潔，要屋企變成無菌空間，見呢排疫情緊張，仲加強咗防禦，兩公婆有晒共識減少親密接觸，暫時兩個先分房瞓以策安全。」 多個身份的楊怡羅仲謙，抗疫緊張度超標在所難免，最重要是大人BB都健康，繼續同大家報喜！