香港網路，硬膠世界
香港地最出名嘅最多人用嘅潮語，莫過於一個字「膠」！呢個字，最初喺香港網路文化始祖，「高登」論壇發展揚光大，直至而家香港人個個都識用。「膠」、「硬膠」，都係諧音一個粗口字，相信大家讀落都知喇。呢種「硬膠文化」一直發展到今時今日，已經有好多演變，話一個人「膠」，都有好多種唔同嘅「膠」法。當我哋對某件事太過痴迷執著，好容易就俾人形容做「膠」，係負面形容詞嚟。你又知唔知有幾多種「膠」？今日就等DailyView用網路大數據話你知，最多香港網民話嘅「膠人」係邊10個喇！
DV小教室：網路溫度計透過《KEYPO大數據關鍵引擎》，觀測、爬梳港澳地區近萬個網站、頻道，其中包括新聞頻道、各大討論區、FB、IG以及Blog，從中取得資料樣本數，並以AI語意程式作數據分析。「網路熱度」為主題項目相關的網路posts和comments ，數值愈大代表主題項目的討論度愈高。
NO.10 環保膠（355筆）
香港人，其實好多時唔太環保，成日俾人批評浪費資源。近年香港有唔少人開始提倡環保，咁環保本身係好事，好似環保少女咁，幫助維護世界和平咁。不過，有堆人好鍾意將自己嘅環保標準放落其他人到，甚至批判其他人唔係真環保，佢哋呢種做法，就俾網民形容做「環保膠」。環保無錯，但點樣令人接受，就要我哋有更多思考喇。
網民：「咩都要環保，咁我用咩先？」
image source:FB/大嘥鬼 Big Waster
NO.9 腳膠（1896筆）
「腳膠」，即係形容果種有戀足、戀鞋、戀襪等，對腳部有特別情意結嘅「膠」人。其實今時今日社會好多元嘅，每個人都有自己特別鍾意嘅事物，而戀足癖呢個喜好，都有俾人廣泛研究、討論過。呢個文化嘅網路名人，要數高登知名用戶腦魔二世，成日講「玩腳玩成晚」，到而家佢獨特嘅Icon表情，都有好多同腳有關嘅動作，真係始祖嚟。
網民：「只係對腳我都畀滿分喇！」
image source:FB/東九龍社區關注組
NO.8 鐵膠（2325筆）
近日肺炎咁勁，自從打邊爐家族之後，人心惶惶，香港人真係無咩事都唔會出門口，更加唔好講多人嘅地方喇。但喺2月14號，偏偏有一群熱愛地鐵文化嘅香港人，不畏肺炎，齊齊去啟德站外面，通宵等搭頭班車！啟德站首次通車，大批網民形容為「鐵膠」嘅人上晒報紙，好多人都笑佢哋唔怕死，為咗真愛，願意付出埋生命，認真「膠」。
網民：「如果有一個人中招，全部都出事。」
image source:FB/RTHK直播截圖
NO.7 巴膠（4576筆）
佢哋，係一群熱愛香港巴士嘅Fans。只係有新車首次開動，又或者有舊車即將退休，佢哋都會連群結隊咁出現，上晒新聞。呢個時候，網路就會有唔少人形容佢哋做「巴膠」，無方法理解佢哋點解咁鍾意巴士，甚至係深夜時分都出去，只係為咗見心愛嘅巴士。其實好多追星朋友都係咁，又有咩問題呢？「巴膠」，只係興趣唔同我哋啫！
網民：「巴士都係香港文化，有人鍾意好正常。」
image source:FB/Jacky Lim 林鴻達
NO.6 煩膠（6693筆）
「煩膠」係咩意思？其實「煩膠」係由「假膠」引申出嚟形容詞，即係當「假膠」俾人識破，但佢哋依然無收手，為咗上位keep住各種膠言膠行，煩到人哋睇到都嬲。佢哋會煩到咩程度？至少都會狂咁洗版，令到好多網民都頂唔順，希望有人可以封咗佢個AC。好似高登、連登，講求言論自由，用戶唯係Show Blocked User，唔好煩到自己。
網民：「唔好再洗版，咁煩膠係到阻住晒！」
image source:FB/K LUN
NO.5 大中華膠（6918筆）
起來、起來、起來！中國係美好嘅，我哋要維持中國統一，唔好俾外國人話我哋係東亞病夫，一齊建設民主中國，等中國呢條巨龍再次偉大起嚟！Make China Great Again！呢種大中華主義思想，喺今時今日好多香港後生仔眼中，就係所謂嘅「大中華膠」喇。香港自己都無未搞得掂，遠水不能救火，唔通仲要幫手咩？「大中華膠」，咪「膠」喺呢到。
網民：「一點都不能少？唔係咁大中華膠喇。」
image source:FB/Tommy Cheung 張秀賢
NO.4 真心膠（9160筆）
喂，你真心咩？「真心膠」，係相對「假膠」嘅一個形容詞，講緊真真正正發自內心嘅「膠」，而唔係為咗上位扮晒嘢嘅「假膠」。好多「真心膠」講錯嘢，又或者做錯事，俾其他網民點出咗之後，佢哋依然死撐無問題。其中最出名嘅，可以數陶傑誤引兒童自瀆過度潮文事件，將假嘢當真，又話自己知係假嘢，呢種「死雞撐飯蓋」就相當「真心膠」。
網民：「吓你真心定假膠，咁都問得出？
image source:FB/米高TV
NO.3 假膠（9512筆）
問世間「膠」為何物？點解會有樣嘢叫做「假膠」？負面形容詞都有得假？因為呢個世界係有好多人想要引人注目，簡單講，即係想借用「膠」嘅言行，扮晒嘢咁嘩眾取寵，只係為咗喺網路界留名上位。特登打錯字、洗版、出膠文、打火星文、扮MK仔⋯⋯總之各種膠言膠行，都係扮嘢咁做。好多時，大家演技都唔好，俾人識破就形容係「假膠」。
網民：「你扮到咁真，難分真與假！」
image source:FB/PassionTimes 熱血時報
NO.2 飛機膠（15299筆）
咩係「飛機膠」？千其唔好心邪諗咗其他嘢，「飛機膠」只係鍾意飛機嘅朋友啫。喜好嘅嘢，千奇百趣，正所謂青菜蘿蔔，各有喜好。不過，呢個世界無咁理想，有少數愛好嘅朋友，總係好容易俾其他人取笑。香港地，有一群好鍾意飛機嘅人，佢哋會特登去世界各地睇飛機，可以一眼認出飛機型號、出產地，同埋有咩特色咁，如痴如狂，咪俾人話膠囉。
網民：「飛機坐就坐得多，真係唔識分有咩分別喎。」
image source:FB/Flight Store
NO.1 左膠（69496筆）
喂咩你份人咁「左膠」嘅，唔同你做朋友喇！「左膠」呢個字，唔單止香港用，連台灣都有人用，指果種支持社會主義，滿口理想而無視現實情況嘅人。近年香港本土思潮興起，唔少人都批評 果種為咗大愛、包容出𧶠本土利益嘅人做「左膠」。早喺2009年社評人林忌就寫文用「左膠」形容泛民主派，因為佢哋認為香港政府只向永久居民派錢，無視新移民利益。
網民：「香港自己都未搞得掂，仲收肺炎難民咁左膠？」
image source:FB/粵典 words.hk
網路溫度計香港版嘅Telegram開咗喇！快D嚟follow我哋啦→https://t.me/dailyviewhk
【香港網路溫度計調查結果之圖文，未經授權請勿轉載、改寫】
分析說明：
本研究資料由《KEYPO大數據關鍵引擎》提供，分析時間範圍為2019年02月17日至2020年02月16日。
網路大數據系統觀測港澳地區上萬個網站頻道，包括新聞頻道、Facebook、Instagram及各大討論區、BLOG等，針對討論『網民討論度最多的膠人』相關文本進行分析，並根據網友就該議題之討論，作為本分析依據。
本文分析之結果，非參考投票、民調、網路問卷等資料，名次僅代表網路討論熱度大小，不代表網友正負評價。