同日推單飛新歌！Edan被網民極速改hehe版 肥仔減肥俾女圍

繼姜濤、Ian陳卓賢、Anson Kong江𤒹生、Anson Lo盧瀚霆、Jer柳應廷先後「單飛」後，MIRROR成員Edan呂爵安與ERROR隊長Fatboy梁業亦首次「單飛」，於昨日（1月27日）分別推出新歌《E先生 連環不幸事件》及《Lady Killa》。二人早前為新歌拍攝MV，Edan化身學生跟林家熙（Locker）、譚旻萱（Mandy）大玩「三角戀」，盡顯青蔥氣色；另邊廂的Fatboy就收起惹笑形象，以多個「型男」造型上陣。

Edan新歌《E先生 連環不幸事件》講述一位不幸人的愛情故事，填詞人黃偉文（Wyman）將Edan「黑仔」的特質配入曲中，MV亦滲透不少Edan自身元素，既出動私伙鋼琴，又特別返母校取景拍攝，他表示新歌別具記念價值：「感覺好特別，第一次拍個人MV，個場景係返回中學母校，其實近幾年都冇返過嚟，今次返嚟感覺環境都好熟悉，有助情緒容易入戲。」回想中學時期，熱衷參與課外活動的Edan自爆是「風頭躉」：「實不相瞞，中學時我都被稱之為『男神』，低年級嘅女同學好多時會崇拜師兄，搵啲師兄影合照，所以我都算係風頭躉。」

Edan的新歌MV講述三位好朋友之間的「三角戀」故事，當中一場「攤牌」戲，三位主角更要情感大爆發，Edan表示：「呢將戲係最難忘，因為喊戲對自己難度極高，本身係唔易喊嘅人，好彩兩位對手表現好好，我都畀佢哋嘅情緒感染。」提到首次「單飛」，Edan坦言心情緊張：「不過我好彩有其實隊員做咗個榜樣畀我睇，等我知道應該點樣做。」

MV推出未夠24小時，「我睇咗啲乜嘢」channel已極速推出「強行走女版MV」二次製作hehe版本，看來香港觀眾真的很渴BL戲，連Edan本尊都留言「笑死我」。

至於同日推出新歌《Lady Killa》的Fatboy，日前出動半百工作人員及10多位舞蹈員拍攝MV，還邀請靚女模特兒關雅芳（Vagary）擔任女主角，為配合歌曲風靡萬千少女的主題，Fatboy以多個型男look上陣，對於首度「單飛」出歌，Fatboy大叫緊張，不僅花近兩個月籌備MV，更刻意減肥上陣，而且更碌盡人情卡邀請朋友幫手：「今次Idea自己係一塊唐僧肉，有好多女仔圍繞身邊，所有舞蹈員、武術指導都嚟幫手，基本上為咗今次MV拍盡人生所有膊頭。」

問到Fatboy今次MV女主角，為何不邀請在《男排女將》中成功「抄牌」的鄧麗欣？他表示：「女主角都篩選咗好幾個，最想搵欣宜，因為女主角係Queen嚟，佢跳得、而且出嚟好有霸氣，但可惜時間配合唔到，至於Stephy都有諗過搵，但自己太怕醜，最後都係唔敢搵佢。」此外，Fatboy又表示，當收到花姐通知可以「單飛」出歌時非常開心，並感謝許廷鏗給予意見：「音樂人我識唔多，好多謝許廷鏗介紹音樂人畀我，而且又畀咗好多意見，令我可以促成今次呢首歌，錄完之後，我都有畀佢聽，佢話OK，增強咗我唔少信心。」

撰文：機